Bikubiye muri raporo ya Komisiyo y’Ubukungu n’Imari ya Sena yagejejwe ku Nteko Rusange ku wa 12 Ugushyingo 2026, ku gikorwa cyo kugenzura ibikorwa bya Guverinoma mu kugeza amashanyarazi ku baturage, cyakozwe kuva ku wa 14 Nyakanga kugeza ku wa 22 Nzeri 2026.

Iyi mishinga iteganyijwe kurangira mu bihe bitandukanye kuva mu 2027 kugeza mu Ukuboza 2030. Izatanga amashanyarazi akomoka ku mirasire y’izuba angana na megawatt 300, ayo kuri gaz méthane angana na megawatt 165 n’akomoka ku ngomero z’amazi angana na megawatt 58,76.

Raporo igaragaza ko mu 2026 amashanyarazi igihugu kibona yageze kuri megawatt 472,9, arimo megawatt 366,8 zituruka imbere mu gihugu na megawatt 106,1 zitumizwa mu mahanga.

Mu mishinga y’ingomero harimo Nyabarongo II izatanga megawatt 43,5, ikaba iteganyijwe kurangira mu Ukuboza 2027. Hari kandi Rukarara ya 6 izatanga megawatt 9,76, ikarangira muri Kamena 2027.

Urugomero rwa Muvumba ruzatanga megawatt imwe, ruteganyijwe kurangira muri Werurwe 2027, mu gihe urwa Nyundo ruzatanga megawatt 4,5, rukarangira muri Gashyantare 2028.

Nyabarongo II na Muvumba bizifashishwa kandi mu gutanga amashanyarazi akomoka ku mirasire y’izuba, binyuze mu gushyira ibikoresho biyabyaza amashanyarazi iyo mirasire hejuru y’amazi no ku butaka.

Kuri Nyabarongo II hateganyijwe umushinga w’imirasire y’izuba uzatanga megawatt 105, zirimo megawatt 80 zizaturuka ku bikoresho bizashyirwa hejuru y’amazi na megawatt 25 zizaturuka ku bizashyirwa ku butaka.

Perezida wa Komisiyo Nsengiyumva Fulgence, yasobanuye urugomero rwa Nyabarongo II ruzatanga amashanyarazi menshi binyuze mu kubyaza umusaruro umwanya wo hejuru y’amazi.

Ati “Ku byerekeranye n’imirasire y’izuba …hari ibintu bibiri. Ku mirasire y’izuba hari ibintu bimwe tutari tumenyereye kuko nka Nyabarongo II nababwiraga aho ivuye hano kuri Rulindo kugera kuri Ngororero ifite umurambararo wa kilometero 67, kikaba ari ikidendezi cy’amazi. Ni ukuvuga ngo za panneau solaire twabonaga zishyirwa ku butaka bazazubaka hejuru y’amazi noneho amashanyarazi abyarwe n’imirasire y’izuba ijya muri za batiri bazashyiraho noneho umuriro uzaboneka uzashyirwe mu muyoboro mugari.”

Uyu mushinga uriho n’igice cyo gushyira ibikoresho by’imirasire y’izuba ku butaka bizatanga megawatt 25.

Ati “Hari no ku butaka aho bagaragaza ko bazubaka panneau solaire kuri Nyabarongo II zigatanga megawatt 25. Murabona ko rero Nyabarongo itanze urugomero rwa Megawatt 43,5, ariko itanze na megawatt 105 zo ku mirasire y’izuba.”

Kuri Muvumba, umushinga w’imirasire y’izuba uzatanga megawatt 95. Muri zo, megawatt 70 zizaturuka ku bikoresho bizashyirwa hejuru y’amazi, naho megawatt 25 zituruke ku bizashyirwa ku butaka. Imishinga y’imirasire y’izuba ya Nyabarongo II na Muvumba iteganyijwe kurangira mu Ukuboza 2027.

Ati “Ni kimwe na Muvumba, mu rwego rw’urugomero izatanga megawatt 1, ariko ku mazi yayo za panneau solaire nababwiraga zijya hejuru y’amazi zitange megawatt 70 no ku butaka itange megawatt 25.”

Undi mushinga w’imirasire y’izuba ni uwa Rwabusoro/Ruhango na Bugesera uzatanga megawatt 100, ukaba uteganyijwe kurangira muri Werurwe 2029.

Umushinga wa munani ni uwo kubyaza amashanyarazi gaz méthane, witwa Gas to Power/G2P. Uzatanga megawatt 165, ukaba uteganyijwe kurangira mu Ukuboza 2030.

Uretse kongera ingano y’amashanyarazi, Komisiyo yagaragaje ko Ikigo cy’Igihugu gishinzwe Ingufu, REG, cyatangiye gusana no kuvugurura ibikorwaremezo by’amashanyarazi, harimo kubihindura biva kuri ‘monophasé’ bijya kuri ‘triphasé’.

REG yatangiye kandi kubaka imiyoboro mishya ifite uburebure bwa kilometero 381,8 n’ibigo bishya 11 bifasha guhindura ingufu z’amashanyarazi no kuyakwirakwiza, bizwi nka ‘substations’.

Ibi bikorwa bijyana no kongera ingo zifite amashanyarazi. Raporo igaragaza ko zavuye kuri 78,9% mu 2024 zikagera kuri 88,3% mu 2026, zingana n’ingo 3.273.772.

Muri zo, ingo 2.348.087 zifite amashanyarazi y’umuyoboro mugari, zingana na 63,3% by’ingo zose, naho 925.685 zikoresha amashanyarazi akomoka ku mirasire y’izuba itari ku muyoboro mugari, zingana na 25%.

Gahunda ya Guverinoma y’imyaka itanu, NST2, iteganya ko ingo zose zizaba zifite amashanyarazi mu mpera za 2029.

Mu korohereza abaturage kuyabona, REG igaragaza ko udafite ubushobozi bwo kwishyura mubazi ingunga imwe ashobora kuyishyura buhoro buhoro uko aguze amashanyarazi.

Igaragaza kandi ko umuturage agura kilowatt-saha 20 za mbere mu kwezi ku mafaranga 89 kuri Kwh imwe, bikorohereza abafite ubushobozi buke gukoresha amashanyarazi.

Abasenateri banasabye Guverinoma Gushyiraho uburyo bunoze bwo gukurikirana uko abaturage bagezwaho  amashanyarazi akomoka ku mirasire y’izuba, kugenzura ko ibikoresho bifashisha bikora neza no gusana ku gihe ibyangirika