Amarangamutima y’Abanyarwanda nyuma y’uko isaha y’ingendo yimuriwe saa Tatu

Yanditswe na Ferdinand Maniraguha
Kuya 11 Nzeri 2020 saa 09:53
Yasuwe :
0 0

Bamwe mu Banyarwanda bagaragaje amarangamutima y’ibyishimo ubwo bamenyaga ko Inama y’Abaminisitiri yateranye kuri uyu wa Kane yafashe umwanzuro wo gusubizaho isaha ya saa Tatu z’ijoro nk’iyo abantu batemerewe gukora ingendo, ikavanwa saa Moya mu rwego rwo kwirinda Coronavirus.

Isaha ya saa Moya igishyirwaho mu byumweru bibiri bishize, yagiye yinubirwa na benshi, bamwe bagaragaza ko ibabangamiye kuko haba hakiri kare, nk’abacuruza cyangwa abataha mu ngo zabo akenshi baba batarahagera.

Nk’imibare yatanzwe na Polisi kuva ku wa 27 kugera ku wa 29 Kanama 2020, igaragaza ko abafashwe bagenda nyuma ya saa Moya z’umugoroba ari 15515 aho umubare munini wabonetse ku wa 27 Kanama aho bari bari abantu 6052.

Hari amashusho yagiye asakazwa ku mbuga nkoranyambaga nk’aho hari agaragaramo imodoka igendera ku muvuduko ukabije imeze nk’iguruka, uwayakwirakwije akavuga ko saa Moya zari zegereje abantu bakubana ngo amasaha atabasanga mu nzira.

Kugenda mu muhanda saa Kumi n’ebyiri zageze nabwo byabaga biteye ubwoba kuko umuvuduko wabaga ari wose, ku buryo hari n’abagiye babihuza n’impanuka zimaze iminsi ziba mu masaha y’umugoroba.

Bamwe mu batanze ibitekerezo ku nkuru ya IGIHE ivuga ko amasaha yasubijwe saa Tatu, bagaragaje akanyamuneza ndetse bumvikanisha ko saa Moya yari ibangamye cyane.

Uwitwa Callixte yagize ati “Ni byiza rwose, Imana ibahe umugisha ku bwo kongeraho aya masaha abiri, bizatuma akazi gakorwa neza. Stress ya saa Moya yari iteye ubwoba.”

Uwitwa Richard yavuze ko hari bamwe mu bayobozi b’inzego z’ibanze bari batangiye kwitwaza isaha ya saa Moya bagahohotera abaturage cyangwa bakabyifashisha baka ruswa.

Ati “Nibyo dukomeze ingamba icyorezo gicike. Bamwe ntibari bakiryama birirwa bagishakiramo inyungu bashaka amaramuko nk’ab’amarondo, ba midugudu n’abo ku tugari. Abo saa Moya yari igiye gukiza kuri ruswa babihombeyemo bakure amaboko mu mifuka barye utwo baruhiye nk’abandi.”

Ngabire Eugénie we yavuze ko hari abari basigaye baburara kuko saa Moya yageraga batarajya guhaha.

Ati “Saa Moya yaribangamye pe! Abaturage bamwe bari basigaye baburara kubera kubura aho bahahira.”

Uwiyise Stephen yavuze ko nyuma ya saa Tatu, noneho uzafatwa yarengeje amasaha nta rwitwazo, asaba ko ubutaha hanarebwa ku zindi serivisi zitarakomorerwa.

Ati “Iyo nama yafashe umwanzuro mwiza cyane. Bivuze ko abazafatwa nyuma ya saa Tatu z’ijoro nta rwitwazo, gusa ubutaha hazigwe n’ingamba z’uko abafata ku gasembuye abazicururiza muri boutique, supermarket, restaurants na hotel bazahabwa uburenganzira bwo kuzitanga hakoreshejwe udukombe dukoreshwa rimwe kandi bagakurikiza amabwiriza runaka yashyirwaho kuko ubu inzoga zinyobwa mu ibanga rikomeye ari abazitanga n’abazinywa baba bakebaguzwa batinya amande.”

Hari n’abasabye ko ubutaha hazigwa no ku ngendo rusange zihuza Umujyi wa Kigali n’intara.

Ku cyumweru gishize, bamwe mu bacururiza mu nyubako ya T2000 mu mujyi rwagati batakambiye Minisitiri w’Ikoranabuhanga na Inovasiyo, Ingabire Paula, basaba ko isaha ya saa Moya yakwigizwa inyuma kuko ituma badacuruza. Bavugaga ko amasaha ya saa Kumi abantu babaga bavuye mu kazi baje guhaha muri iyo nyubako, bahitaga bitahira abacuruzi bagahomba.

Guhera saa Kumi n’ebyiri z’umugoroba, nta modoka rusange yari yemerewe kongera gutwara abantu muri gare zo mu Mujyi wa Kigali. Byatumaga benshi bagenda n’amaguru cyangwa se bagafatirwa mu nzira kuko batubahirje amasaha. Ayo masaha abamotari babaga bameze nk’amadolari, kugira ngo agutware igiciro akagikuba kabiri cyangwa gatatu, hakaba n’ubwo bigeze bakavuga ko baratwara abajya mu byerekezo batahamo gusa.

Hari benshi bagiye bagaragaza ko isaha ya saa Moya yari ibangamye ku kuba abantu bose bageze mu ngo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .