{Umuhanzi Kizito Mihigo afatanyije na Fondation ye KMP (Kizito Mihigo for Peace), bamaze iminsi batangiye igikorwa kirekire bise “Umusanzu w’Umuhanzi mu burere mboneragihugu ku matora”, gikorerwa mu turere twose tw’u Rwanda, KMP ibifatanyije na Komisiyo y’Igihugu y’Amatora (NEC). }

Nyuma yo gusura Uturere twa Rubavu, Ngoma na Nyabihu, Umuhanzi Kizito Mihigo na Fondation ye bataramiye utwa Nyagatare, Rusizi, Nyamasheke, Huye na Nyaruguru.

Ibi bitaramo bigenda bitanga inyigisho ku burere mboneragihugu no ku matora, bimaze kugaragara ko byitabirwa n’abaturage benshi. Mu karere ka Nyagatare igitaramo cyabereye mu murenge wa Rwimiyaga, i Rusizi kibera mu mugi rwagati aho bita ku rya mbere, Nyamasheke bibera mu murenge wa Tyazo, muri Huye bibera hafi y’isoko rya Rugogwe, naho muri Nyaruguru bibera mu murenge wa Viro. Aho hose abaturage baje ari benshi cyane.

Muri ibi bitaramo, umuhanzi Kizito Mihigo aherekezwa n’abanyamuryango ba Fondation KMP, ndetse n’abahanzi Sofia Nzayisenga (uzwi mu nanga ya Kinyarwanda), ndetse na Ama-G the Black uzwi mu njyana ya Hip Hop; bakabifashwamo n’ umushyushyarugamba akaba n’umusizi Aimé Valens Tuyisenge.