Kuri uyu wa Kabiri, tariki ya 13 Kamena 2017, nibwo abakinnyi basiganwe ku ntera y’ibilometero 87.2, aho bahagurutse ahitwa i Osima berekeza i Senigallia mu cyiciro cya mbere. Kiraza gukurikirwa n’icyo abakinnyi baza gusiganwa ku giti cyabo (Individual Time Trial-ITT) ahitwa Campacavallo hareshya n’ibilometero 14.

Areruya Joseph yaje ku mwanya wa mbere akoresheje amasaha abiri n’amasegonda 52, asize Umurusiya Cherkasov ukinira Gazprom–RusVelo ho amasegonda abiri n’Umunya Australia Stannard Robert wa Mitchelton waje ku mwanya wa gatatu amusize atatu.

Mu gace ka kane kaherukaga gukinwa kavaga Gabicce Mare kerekeza Gabicce Mare ku ntera y’ibilometero 155.5, Areruya Joseph yasoje ku mwanya wa 25.

Iri rushanwa ryitabiriwe n’Abanyarwanda babiri barimo Areruya Joseph na Mugisha Samuel, bombi bakina muri Dimension Data for Qhubeka.

Areruya Joseph w’imyaka 21 umaze kwandika izina mu gusiganwa ku magare yegukanye umwanya wa kabiri muri Tour du Rwanda 2015 (yatwawe na Nsengimana Jean Bosco), mu ya 2016 aza ku wa gatanu.

Mugisha Samuel na we yigaragaje muri Tour du Rwanda 2016 aho yegukanye umwanya wa mbere mu bakinnyi baterera cyane.

Ku munsi w’ejo ku wa Gatatu, agace ka gatandatu kazakinwa abasiganwa bahaguruka ahitwa Francavilla Al Mare berekeza i Casalincontrada, ku ntera y’ibilometero 132,2.