Psychology igaragaza ko ubwonko bugorwa cyane no kwakira ibintu bitigeze birangira. Nk’uko bisobanurwa muri Zeigarnik Effect, yahimbwe na Bluma Zeigarnik mu 1927, ubwonko bwibuka cyane ibintu tutigeze turangiza kurusha ibyo twarangije.

Iyo ukoze ikintu ntikirangire, mu bwonko bwawe hazamo icyuho. Ibyo bitera icyitwa “brain loop” cyangwa se ukwisubiramo kw’ibitekerezo by’ibintu bitigeze birangira. Ukomeza gutekereza uwo muntu bidatewe n’uko umukunda cyane, ahubwo ari ukubera ko ubwonko bwawe bushaka kuziba icyo cyuho.

Iyo utigeze umarana igihe n’umuntu, uba umutekereza uko atari kandi ukamukabiriza. Uba umeze nk’uri muri filime y’Igihinde kuko uba utararambanye n’uwo muntu ngo umenye ibibi bye. Kuri wowe aguma ari umuntu utunganye wari kuzakubera isoko y’ibyishimo bidashira.

Iyo ukundana n’umuntu umenya uko ateye, ukamenya imico myiza ye n’ingeso ze mbi. Muratongana kandi mukarakaranya. Umenya uwo ari we bya nyabyo. Iyo mutandukanye, ubwonko bwawe buba bumwibuka uko ari nta bikabyo bushyizemo. Uba ufite impamvu zo kumwikuramo.