00:00:00 IGIHE NETWORK KN KINYARWANDA EN ENGLISH FR FRANCAIS

Prof Fisseha uri mu Banyafurika b’inararibonye, yavuze imyato u Rwanda n’uko yimukiye i Kigali

Yanditswe na Iradukunda Serge, Muhonzire Sylvine
Kuya 22 Nzeri 2021 saa 06:45
Yasuwe :
0 0

Prof Senait Fisseha uri mu Banyafurika b’inararibonye akaba n’Umujyanama w’Umuyobozi Mukuru w’Ishami ry’Umuryango w’Abibumbye ryita ku Buzima, OMS, yavuze imyato u Rwanda n’uko yemeye kuva muri Leta Zunze Ubumwe za Amerika akiyemeza gutura muri Kigali.

Prof Senait Fisseha ni umwe mu baganga b’abahanga kandi b’inzobere mu bijyanye n’ubuvuzi bw’indwara z’abagore (Obstetrician-Gynecologists) Afurika ifite kuko yabiminujemo muri Southern Illinois University.

Uyu mugore nubwo ari Umunya-Ethiopia yakunze kuba muri Amerika kuko yavuye muri Ethiopia mu 1989, ubwo yari arangije amashuri yisumbuye ajya muri iki gihugu gukomerezayo kaminuza.

Amasomo ye y’icyiciro cya kabiri cya kaminuza yayize muri Rosary College (Ubu yitwa Dominican University) ahakura impamyabumenyi mu bijyanye na Siyansi (Bachelor of Science degree).

Mu 1999 Fisseha yaje kubona impamyabushobozi y’ikirenga mu buvuzi yakuye muri ‘Southern Illinois University’. Mu 2003 ni bwo yasoje amahugurwa ya nyuma amugira inzobere mu bijyanye n’ubuvuzi bw’abagore.

Uretse kuba inzobere mu bijyanye n’ubuzima, Prof Senait Fisseha afite n’impamyabushobozi mu by’amategeko yakuye muri Oxford University.

Muri Amerika yabaye mu myanya itandukanye ifite aho ihuriye n’urwego rw’ubuzima.

Yabaye Umuyobozi w’Ishami rishinzwe gukora ubushakashatsi ku misemburo igira uruhare mu myororokere n’ubugumba mu Bitaro bya Kaminuza ya Michigan, umwanya yagiyemo avuye ku kuba Umuyobozi ushinzwe ubuvuzi mu Kigo cy’iyi kaminuza gishinzwe ubuvuzi bujyanye n’ubuzima bw’imyororokere.

Uyu mugore yamenyekanye cyane mu 2016 ubwo yari umwe mu bakunze kugaragara bamamaza Dr. Tedros Adhanom ku mwanya wo kuyobora Ishami ry’Umuryango w’Abibumbye ryita ku buzima ndetse bikaza kurangira awegukanye.

Mu 2018 yashyizwe ku rutonde rw’Abanyafurika 100 bavuga rikijyana ndetse 2019 ashyirwa kuri uru rutonde iyo bije kuri politiki y’uburinganire.

Kuri ubu Prof Senait Fisseha ni Umuyobozi ushinzwe ibikorwa muri Susan Thompson Buffett Foundation, umuryango ukora ibikorwa by’ubugiraneza washinzwe n’umunyemari, Warren Buffet.

Afite kandi izindi nshingano zitandukanye zirimo kuba Umujyama w’Umuyobozi Mukuru wa OMS, umwe mu bagize Inama y’Ubutegetsi y’Umuryango w’Abaganga bo muri Amerika bafite inkomoko muri Ethiopia n’iya Kaminuza itanga amasomo ajyanye n’ubuvuzi, University of Global Health Equity (UGHE) iherereye i Butaro mu Karere ka Burera.

Ku wa Mbere yariki 20 Nzeri 2021 ubwo Perezida Kagame yagiranaga ikiganiro n’Umuyobozi wa African Leadership University, Fred Swaniker, Prof Senait Fisseha ni umwe mu bahawe ijambo kugira ngo agire icyo abwira urubyiruko rwiganjemo urwiga kaminuza rwari rwacyitabiriye.

Muri iki kiganiro, Prof Senait Fisseha yasangije uru rubyiruko urugendo rwe. Ati “Kubabona muri iki cyumba binyibutsa urugendo rwanjye rwatangiriye kuri uyu Mugabane mwiza, navukiye ndetse nkurira muri Ethiopia narezwe n’ababyeyi bashyira imbere uburezi ndetse banyemerera gukurikira inzozi zanjye.”

“Nagiye muri Amerika nkirangiza amashuri yisumbuye nk’uko Fred yabivuze niga ubuvuzi n’amategeko kuko nari nshishikajwe n’uburenganzira bw’ikiremwa muntu n’ubuzima nk’uburenganzira bwa muntu.”

Yakomeje avuga ko ubumenyi yahawe ari bwo bwagize uruhare mu kuba uwo ari we uyu munsi.

Ati “Ubwo bushobozi, ubwo burezi n’uko kwigenzura ku buzima bwanjye n’ahazaza hanjye byaharuriye inzira ubuzima bwanjye.”

Prof Senait Fisseha ni umwe mu bavuga rikijyana muri Afurika, aha yaganiraga na Barack Obama wabaye Perezida wa Leta Zunze Ubumwe za Amerika

Yafashe umwanzuro wo kwimukira i Kigali

Prof Senait Fisseha yavuze ko muri ibi bihe bya COVID-19 ari bwo yafashe umwanzuro wo kwimukira mu Rwanda ndetse yemeza ko ubu ari Umunyarwanda ku bw’amahitamo.

Ati “Hagati mu gihe cy’icyorezo cya COVID-19 ni bwo nafashe umwanzuro wo gupakira ibintu byanjye n’umuryango wanjye twimukira i Kigali, aha hantu heza kandi h’umwihariko ubu ntewe ishema no kwita mu rugo, mbwira buri wese ko ndi Umunya-Ethiopia kuko ari igihugu cyanjye cy’amavuko nkaba n’Umunyarwanda ku bw’amahitamo yanjye.”

Mu gushima ibyiza by’u Rwanda, Prof Senait Fisseha yahereye ku buryo rwitwaye mu kurwanya COVID-19.

Ati “Ubu tuvugana ku Isi hose, miliyoni 219 barwaye Coronavirus, hafi miliyoni 4.6 imaze kubahitana. Gusa na none twabonye ko guhangana n’iyi virus bidasaba kuba ufite imitungo myinshi cyangwa witwa ko uri igihugu cyateye imbere, cyangwa igihugu kikiri mu nzira y’amajyambere. Ahubwo twabonye ko ubuyobozi bwiza ari ryo pfundo ryafashije ibihugu guhangana n’icyorezo cya Covid-19.”

“Ntewe ishema cyane n’uko igihugu cyacu cy’u Rwanda ari kimwe muri ibyo. Ariko ntabwo byikoze, si byo? Bisaba ubuyobozi. Nyurwa cyane n’ubuyobozi bwa Perezida Paul Kagame, Guverinoma y’u Rwanda, abaturarwanda ndetse n’ ingabo zihora zitanga buri munsi ngo sosiyete yacu igire umutekano.”

Yakomeje agaragaza ko aterwa ishema n’ibyo ubuyobozi bw’u Rwanda burangajwe imbere na Perezida Kagame bukora.

Ati “Twese yaba abari muri iki cyumba ndetse n’Isi yose dushimira cyane ubuyobozi bwa Perezida Kagame ndetse n’isura yahaye iki gihugu mu ruhando rw’amahanga. Inshingano ze zizashyirwa ku bitugu byanyu. Mwebwe muri iki cyumba ni mwe mwatoranyijwe. Mufite amahirwe urubyiruko rwo hirya no hino muri Afurika rwifuza ariko rwabuze, yo kwicarana n’umuyobozi wabo bakaganira, kuko ndabona hano mwarabigize ibisanzwe. Ntimuzabiteshe agaciro.”

Prof Senait Fisseha yavuze ko uburyo u Rwanda ruri kwitwara bitanga icyizere ko ruzabasha guhashya COVID-19.

Ati “Dufite urugendo rurerure imbere ariko turasa nk’aho turi kururangiza. Ahazaza h’ubukungu n’imibereho y’iki gihugu biratangaje cyane kuko uko kiri kwitwara muri ibi bihe bya Covid-19 bitwereka ikinyabupfura, umutekano ndetse n’ubuyobozi buhamye wasanga hake ku Isi. Kuba ari ahantu heza washora imari, ndetse hakaba amahirwe yaba mu bukungu ndetse no mu burezi tubifite mu biganza byacu.”

Yakomeje avuga ko u Rwanda ruyoboye mu bintu byinshi birimo guhanga udushya ndetse agaragaza ko yatangajwe n’uburyo rwiyubatse vuba nyuma y’akaga ka Jenoside yakorewe Abatutsi.

Yashimye uburinganire n’ubwuzuzanye yahasanze

Mu bindi Prof Senait Fisseha yagaragaje ko yakundiye u Rwanda harimo n’ikijyanye n’uburinganire.

Yavuze ko kuba mu Rwanda abagore n’abagabo bahabwa amahirwe angana ari ibyo kwishimirwa kandi bikwiye no kuba isomo ku bandi.

Ati “U Rwanda ruyoboye isi mu bijyanye no kuziba icyuho mu bijyanye n’uburinganire n’ubwuzuzanye hagati y’abagabo n’abagore. Nk’uko mubizi inteko yacu igizwe na 64% by’abagore. Ibi bihita bikwereka uko mu buzima busanzwe bimeze, yaba guteza imbere abagore n’abakobwa mu bijyanye n’ubukungu, ubuzima, uburezi ndetse n’ibindi. Ibi byose bigira ingaruka nziza muri sosiyete yacu.”

“Rero ndashaka gufatirana aya mahirwe mbonye, nk’uko u Rwanda rwabigenje, ndasaba buri wese uri muri iki cyumba ndetse n’abandi bakirimo hifashishijwe ikorabuhanga, ko mwagira uruhare rukomeye mu gushyiriraho inzira abagore n’abakobwa bazaba abayobozi b’ejo.”

Prof Senait Fisseha yasabye uru rubyiruko kumva ko ari rwo ruzavamo abayobozi b’ejo kandi bakitegura gukemura ibibazo bitandukanye Isi ifite.

Yashimye uburyo amategeko yo mu Rwanda aha abagabo n'abagore amahirwe angana
Prof Senait Fisseha yavuze ibyiza byinshi yabonye mu Rwanda byanatumye arwimukiramo
Aha Prof Senait Fisseha yaganiraga na Madamu Jeannette Kagame
Prof Senait Fisseha yagaragaje ko ashima ibikorwa bya Perezida Kagame
Prof Senait Fisseha n'umurwango we basigaye batuye mu Rwanda
We n'abana be basura ibikorwa bitandukanye mu Rwanda
Aha umukobwa wa Prof Senait Fisseha yari yishimiye kumva uko kuragira bimera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .