00:00:00 IGIHE NETWORK KN KINYARWANDA EN ENGLISH FR FRANCAIS

Iwabo bamutaye bazi ko yapfuye: Ibitaravuzwe kuri Gafuku wabaye Padiri wa mbere w’Umunyarwanda mu 1917

Yanditswe na Iradukunda Serge
Kuya 8 Ugushyingo 2021 saa 11:26
Yasuwe :
0 0

Hashize imyaka 104, u Rwanda rubonye umupadiri wa mbere w’Umunyarwanda, nyuma y’igihe kinini cyashize ijambo ry’Imana muri Kiliziya Gatolika ryigishwa n’Abapadiri bera.

Ku wa 17 Ukwakira 1917 nibwo Kiliziya Gatolika mu Rwanda yabonye Abapadiri bayo babiri ba mbere b’Abanyarwanda, abo ni Donati Reberaho wavukaga i Save na Balitazari Gafuku wavukaga i Zaza mu yahoze ari Kibungo (ubu ni mu Karere ka Ngomba).

Musenyeri Hiriti Yozefu wagize uruhare mu gutangiza Kiliziya y’u Rwanda niwe wabohereje kwiga i Bukoba muri Tanzania mu Iseminari. Icyo gihe hari mu 1904.

Ni na we wabahaye Ubusaseridoti, i Kabgayi mu birori byahuriranye n’ishingwa rya Misiyoni ya Rwamagana. Abo bapadiri b’abenegihugu batumye barushaho kwizera misiyoni.

Kuba Abapadiri kw’aba bagabo babiri yari intambwe ikomeye kuri Kiliziya y’u Rwanda muri icyo rwari rutuwe n’umubare munini w’abatazi gusoma no kwandika.

Padiri Gafuku niwe wari mukuru, akomoka muri Diyosezi ya Cyangugu. Yavutse mu 1885 ku ngoma y’Umwami Rwabugiri. Akomoka kuri Kamurama na Nyirahabimana.

Kwinjira mu nzira yo kwiha Imana byabaye nk’igitangaza, kuko akiri muto yarwaye cyane, umunsi umwe ababyeyi be baza gukeka ko yapfuye maze bamujugunya mu gishanga.

Aho niho ku bw’amahirwe abamisiyoneri bamutoraguye maze bamugira umwe mu banyeshuri babo.

Yakurikiye inyigisho za gatigisimu muri Misiyoni ya Zaza ariko abatirizwa i Mibirizi (Cyangugu) afite imyaka 18 y’amavuko.

Mu 1904, Yozefu yimuriwe muri Vicariya nshya ya Kivu yari ihuje u Rwanda, u Burundi n’igice kimwe cya Tanzania (Buha na Bugufi), ashyira icyicaro cyayo mu Rwanda afata n’icyemezo cyo kugarura abaseminari b’Abanyarwanda iwabo.

Abo baseminari barimo na Gafuku bageze i Kabgayi mu 1913 maze bahahurira n’abari bamaze umwaka umwe i Nyaruhengeli (Kansi). Mbere yo guhabwa Ubusudiyakoni.

Gafuku yakoreye umwaka w’igeragezwa (probation) muri misiyoni ya Kabgayi.

Yahawe Ubudiyakoni ku wa 08 Ukwakira 1916, ahabwa Ubupadiri hamwe na Donati Reberaho w’ i Save ku wa 07 Ukwakira 1917.

Amaze guhabwa Ubupadiri, Gafuku yatangiriye ubutumwa bwe mu Iseminari Nkuru ya Kabgayi. Yahashyizwe kugira ngo abere barumuna be umuhamya w’uko kwiyegurira Imana mu nzira y’Ubusaserdoti bishoboka ku Banyarwanda.

Nyuma y’ubwo butumwa mu iseminari yamazemo imyaka ibiri mbere yo guhabwa ubundi butumwa. Mu 1919, yoherejwe muri misiyoni ya Murunda (Diyosezi Nyundo), ahava mu 1922 asubizwa muri misiyoni ya Kabgayi.

Nyuma y’imyaka itatu, mu 1925, Padiri Gafuku yasubiye gukorera ubutumwa bwe mu Iseminari Nkuru y’i Kabgayi. Nyuma yo kunyura muri Misiyoni zitandukanye mu 1941, yahawe ubutumwa i Mugombwa ahakorera Yubile y’imyaka 25 y’Ubusaserdoti (1942) na yubile y’imyaka 40 (1957). Aha i Mugombwa, ni naho yatabarukiye mu 1959 afite imyaka 74.

Yamaze amezi abiri muri koma

Mu gitondo cyo kuwa 15 Mata 1959, Padiri Gafuku yakangutse atagishobora kuvuga kubera ko yari yaviriye mu bwonko, ni uko bamuha isakaramentu ry’ugusigwa kw’abarwayi maze bamujyana bwangu mu bitaro bya Astrida (Butare).

Yamaze amezi abiri yose ari muri koma n’ubwo abaganga batahwemaga kumwitaho. Yaje koherezwa Usumbura (Burundi) biba iby’ubusa ntihagira igihinduka, ahubwo akomeza kuremba.

Bamusubije muri Astrida, aho yitabiye Imana kuwa 14 Kamena 1959 ahagana 11:00 za mu gitondo. Bukeye tariki 15 Kamena 1959 Musenyeri Perraudin niwe wayoboye imihango yo kumushyingura i Mugombwa muri Diyosezi ya Butare.

Yatabarutse u Rwanda rugeze ku basaserdoti 140 b’Abanyarwanda barimo Umwepisikopi wa mbere Musenyeri Aloys Bigirumwami nawe wavukaga muri misiyoni ya Zaza.

Muri uwo mwaka, abanyarwanda bane nibo bahawe Ubupadiri barimo Nicodème Nayigiziki, Charles Niyonteze, Boniface Nyabyenda na Frédéric Rubwejanga.

Kiliziya Gatolika y’u Rwanda ivuga ko Padiri Baritazari Gafuku yabaye indahemuka ku butumwa bwe bwa gisaserdoti mu myaka 42 yose yamaze akorera Imana.

Yari azwi kandi nk’umwanditsi mwiza. Yakoze zimwe mu nyandiko z’ikibonezamvugo cy’Ikinyarwanda. Mu 1929 yanditse igitabo yise ‘Igitabo cy’abanyekori bo mu Rwanda’ cyari kizwi ku izina rya ‘Nyirambonera’ cyifashishwaga mu nyigisho zihabwa abana.

Balitazari Gafuku yabaye Padiri wa mbere w'Umunyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .