00:00:00 IGIHE NETWORK KN KINYARWANDA EN ENGLISH FR FRANCAIS

Mahoro uhagarariye Abanyarwandakazi muri Finlande yatangije ikigo cyita ku buzima bwo mu mutwe

Yanditswe na Iradukunda Serge
Kuya 19 Ugushyingo 2021 saa 12:54
Yasuwe :
0 0

Ubushakashatsi bwakozwe n’Ikinyamakuru Devex bwagaragaje ko u Rwanda ruri mu bihugu byo munsi y’Ubutayu bwa Sahara bifite abaturage bibasiwe cyane n’ibibazo bijyanye n’ubuzima bwo mu mutwe.

Ubu bushakashatsi bugaragaza ko bifite aho bihuriye n’amateka akomeye banyuzemo arimo n’aya Jenoside yakorewe Abatutsi.

Ibivugwa n’ubu bushakashatsi kandi bihuza n’iby’ubwakozwe n’Ishami rishinzwe kwita ku buzima bwo mu mutwe muri kaminuza y’u Rwanda.

Ubu bwibanze ku ngaruka za COVID-19 mu Rwanda bugaragaza ko Abanyarwanda bagera kuri 20,5% bafite ibibazo by’ubuzima bwo mu mutwe.

Mu barokotse Jenoside yakorewe Abatutsi ho iki kibazo kiri kuri 52,2%. Ibi bibazo bakunze gusanganwa ni ibijyanye n’agahinda gakabije, guhangayika, kunywa inzoga mu buryo budasanzwe n’ibindi.

Mahoro Annelyse, ni Umuyobozi Mukuru w’Ikigo gitanga ubujyanama mu bijyanye n’ubuzima bwo mu mutwe, akaba umubyeyi w’abana batatu umaze imyaka itanu aba muri Finland, aho anakuriye abagore n’abategarugori b’Abanyarwanda baba muri iki gihugu.

Mu Ukwakira 2021 nibwo, Mahoro yatangije ku mugaragaro Trust Counseling Center Ltd, ikigo gifasha abantu bafite ibibazo bitandukanye bijyanye n’ubuzima bwo mu mutwe birimo ihungabana, agahinda gakabije no kwiheba.

Yavuze ko igitekerezo cyo gushinga ikigo nk’iki mu Rwanda cyaje ubwo yashakaga igikorwaremezo we n’umugabo we bakwiye gukorera ku ivuko kandi kigafasha benshi.

Ati "Igitekerezo cyaje kuko naganiriye n’umugabo wanjye tubona ko hari icyo twakora mu gihugu cyacu, turi Abanyarwanda, tukaba twarakuriye mu Rwanda nubwo twagiye hanze ariko twifuje kuza gufasha leta tugakorana, bituma dushinga ikigo cya ‘Trust Counseling Center’ gifasha abantu bafite ibibazo harimo iby’ubuzima bwo mu mutwe n’ibindi bibazo bigiye bitandukanye."

Yakomeje avuga ko iki gitekerezo yaje kwiyemeza kugishyira mu bikorwa muri uyu mwaka ubwo yabonaga umubare w’Abanyarwanda biyahura ukomeje kwiyongera.

Ati "Nakurikiranaga n’amakuru yo mu gihugu cyanjye, nsanga bafite ikibazo cy’uko abenshi bari kujya biyahura bitewe n’impamvu zigiye zitandukanye, bitewe n’izo mpamvu zo mu mutwe badasobanukiwe, twifuza kuza gukorana na bo hano mu gihugu cyacu cy’u Rwanda tukajya tubafasha tukabaha serivisi tukabakorera ubukangurambaga, tukajya tubitaho kugira ngo buri wese abashe kwiyumvamo ko nta kindi kibazo akwiye kugira."

Yavuze ko kuri ubu iki kigo cyatangiye gufasha Abanyarwanda batandukanye bafite ibibazo bijyanye n’ubuzima bwo mu mutwe bahabwa ubujyanama.

Ati "Muri iki gihe tumaze dukora, tumaze kwakira abantu bagiye batandukanye; abenshi baza bafite ikibazo cy’agahinda gakabije, ni bo bantu dukunze kwakira cyane muri iki gihe."

Yakomeje asaba Abanyarwanda kwita ku bijyanye n’ubuzima bwo mu mutwe, umuntu yakumva atameze neza akihutira kugana ibigo nk’ibi.

Ati "Ubutumwa twagenera Abanyarwanda, ni uko muri iki gihe nubwo buri wese ashobora kuba agendana n’ikibao ariko akaba atabizi, turamusaba ko uwaba wumva afite ikibazo muri we cyangwa se atiyizeye neza ko yatugana tukaba twamufasha ndetse ko byanadufasha cyane gufasha leta kugira ngo abantu bafite iryo hungabana ribashe kugabanuka."

Ni indwara nk’izindi

Mwizere Maker, ukora nk’umujyanama mu bijyanye n’ubuzima bwo mu mutwe muri iki kigo yavuze ko hari umubare munini w’Abanyarwanda bafite ikibazo cy’ubuzima bwo mu mutwe bitewe ahanini n’amateka banyuzemo.

Ati "Abantu bagiye bahura n’ibibazo bitandukanye bagashakisha uburyo bahangana na byo. Nk’urugero twafata ni Jenoside yakorewe Abatutsi 1994. Mu by’ukuri iriya jenoside yahungabanyije umuntu wese wari uriho icyo gihe. Hari uwavuye mu bye akagenda, hari uwari mu gihugu wabonye abantu be bapfa, ubu akaba ari inshike, hari abagiye bahunga bagafatwa nabi ndetse hari n’abandi bana bagiye bavuka nyuma y’aho."

Nubwo bimeze gutya ariko, Mwizere yavuze ko hari Abanyarwanda batarasobanukirwa ibijyanye n’ubuzima bwo mu mutwe ku buryo banahura n’ubu burwayi ntibanabimenye.

Ati "Ntabwo mu by’ukuri baramenya neza neza ahantu bagomba gushakira ubufasha. Hari abahitamo kujya kureba abapfumu bavuga ngo ni amarozi, hari abantu bajya kwa muganga bakamara imyaka itanu, 10 bivuza bavuga ngo bararwaye ariko mu by’ukuri barabuze indwara barwaye, ubwo icyo ni ikibazo duhanganye na cyo."

Yakomeje avuga ko uburwayi bwo mu mutwe buri mu byiciro bitandukanye. Hari ibibazo bivurwa bigakira ariko hari n’ibindi bisaba ko umuntu abihorana nk’igicuri.

Kimwe n’izindi ndwara Mwizere yavuze ko n’iyo umuntu ativuje izo mu mutwe akomeza kuremba.

Uretse gufasha abafite ikibazo mu bijyanye n’ubuzima bwo mu mutwe, iki kigo kinatanga serivisi zo kugira inama abashakanye ariko batabanye neza kubera ibibazo bitandukanye.

Mahoro Annelyse uhagarariye Abanyarwandakazi baba muri Finlande yatangije ikigo cyita ku buzima bwo mu mutwe
Mwizere Maker, ukora nk’umujyanama muri Trust Counselling Center yavuze ko Abanyarwanda benshi badasobanukiwe indwara zo mu mutwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .