00:00:00 IGIHE NETWORK KN KINYARWANDA EN ENGLISH FR FRANCAIS

Ubutwari bwa Gen Anyidoho uherutse kwambikwa impeta y’ishimwe na Perezida Kagame

Yanditswe na Iradukunda Serge
Kuya 6 July 2022 saa 04:59
Yasuwe :

Gen. Henry Kwami Anyidoho ni umwe mu bahoze mu Ngabo za Ghana baherutse kwambikwa na Perezida w’u Rwanda Paul Kagame impeta y’ishimwe izwi nk’Indengabaganizina, kubera uruhare bagize mu kurukora abahigwaga muri Jenoside yakorewe Abatutsi mu 1994.

Izi mpeta zambwitswe Gen. Henry Kwami Anyidoho na mugenzi we, Gen. Joseph Null Andikra zihabwa umuntu cyangwa itsinda ry’abantu bakoze ibikorwa mu buryo bw’intagarugero birimo ubwitange buhebuje, batitaye ku buzima bwabo kugira ngo bakize ubuzima bw’umuntu umwe cyangwa benshi.

Mu gihe cya Jenoside yakorewe Abatutsi Gen. Henry Kwami Anyidoho wamaze gusezererwa mu ngabo, yari Umuyobozi w’Ingabo za Ghana zari muri MINUAR ndetse akaba n’Umwungiriza wa Gen Romeo Dallaire wari uyoboye ingabo zose zari muri ubu butumwa bwa Loni.

Uyu mugabo wagaragaje ubutwari budasanzwe, yabonye izuba kuwa 13 Nyakanga mu 1940 mu gace ka Tanyigbe muri Ghana.

Amashuri ye ya gisirikare yayize muri Leta Zunze Ubumwe za Amerika muri ‘US Marine Staff College’ iherereye muri Virginia ndetse no mu ishuri rya gisirikare rya ‘Ghana Military Academy’.

Yinjiye mu gisirikare cya Ghana mu 1965, kuva ubwo atangira guhabwa inshingano zitandukanye zirimo kuba Umuyobozi Mukuru wa ‘Ghana Military Academy’, ishuri na we yizemo.

Yakoze mu butumwa bwa Loni bwo kugarura amahoro mu bihugu nka Lebanon, Cambodia na Liberia mbere yo koherezwa mu Rwanda nk’umwe mu basirikare bari mu butumwa bwa UNAMIR.

Ubwo Akanama gashinzwe umutekano muri Loni kafataga umwanzuro wo kugabanya umubare w’Ingabo uyu muryango wari ufite mu Rwanda ukagera kuri 270, Gen Dallaire na Gen Anyidoho bari mu banze kubyubahiriza kuko babonaga akaga Abatutsi barimo.

Iki cyemezo cyabo bagikomeyeho kugeza Jenoside irangiye, mu gihe abandi basirikare bari bahuriye mu butumwa bakomoka mu Bubiligi, Bangladesh na Tuniziya bari baramaze gutaha.

Aba basirikare ba Ghana bari bayobowe na Gen Anyidoho bagize ubutwari bwo gukomera ku Batutsi mu giha bafatwaga nk’aho aribo bake kandi badafite ibikoresho bihagije.

Mu mezi atatu yashize Abatutsi bicwa, aba basirikare ba Ghana babashije kurokora abagera ku bihumbi 30.

Mu 2016, Gen Dallaire yabwiye Al Jazeera ko aba basirikare ba Ghana bagaragaje ubutwari aho ibihugu by’ibihangange byari byananiwe.

Ati “Igihugu cyabo cyerekanye umuhate mu gihr abandi benshi bari bananiwe gushikama ngo bahangane na biriya bibazo byari bikomeye. Abandi barirutse Abanya-Ghana barahaguma.”

Yakomeje avuga ko aba basirikare ba Ghana iyo bataba mu Rwanda mu gihe cya Jenoside, haba harapfuye abantu benshi.

Ati “Ishingiro ry’ibintu byose no kuba narabashije gusigara ngakora ibishoboka byose, ni abasirikare ba Ghana na Gen Anydioho wagumanye natwe.”

Mu gitabo Gen Anyidoho yise ‘Guns Over Kigali’, yigeze kuvuga ko ubwo yemereraga Dallaire ko bazagumana nawe yabikoze atabanje no kubaza Perezida we.

Ati “Ubwo namubwiraga ko tuzagumana, ntabwo nari nigeze naka uruhushya ruturutse mu rugo. Nta yandi mahitamo twari dufite, ntabwo twashoboraga gusiga aba bantu (Abatutsi bicwaga).”

Uyu mugabo yakomeje avuga ko mu 1995 ubwo yari asubiye iwabo muri Ghana, Jerry Rawlings wayoboraga iki gihugu yamubajije icyo yari kumusobanurira mu gihe abasirikare be bose bari gupfira mu Rwanda.

Ati “Naramubwiye nti nyakubahwa hari ibintu mu buzima tudashobora gusobanura, twari mu bibazo bidusaba kugira icyo dukora dushingiye ku mutimanama, ntabwo twari gupfa, nubwo byari bimeze gutyo ntabwo twapfushije abasirikare benshi, ni ibitangaza by’Imana.”

Gen Dallaire yamubonyemo ubutwari bagihura

Mu gitabo Dallaire yise “Shake Hands With the Devil”, yagarutse ku butwari buhambaye yabonye kuri Gen Anyidoho mu gihe bamaranye bakorana mu Rwanda.

Dallaire yavuze ko kuwa 21 Mutarama 1994 aribwo yagiye ku Kibuga cy’Indege cya Kigali kwakira Gen Anyidoho wari woherejwe nk’ugomba kumwunganira.

Ati “Nagiye ku kibuga cy’indege cya Kigali kwakira Umuyobozi wanjye wungirije, Gen Henry Anyidoho wo muri Ghana wari wemejwe nyuma y’igihe kinini. Anyidoho ni umugabo utangaje, ufite metero 1,80 n’ibiro birenga 120, igihagararo cye cyanganaga n’inyota yari afitiye akazi. Yavutse ari umusirikare.”

“Kimwe nanjye nasanze yarize muri U.S. Marine Corps Command and Staff College muri Virginia ndetse afite ubunararibonye buhambaye yakuye mu butumwa yakoze muri Congo ahagana mu 1960, Lebanon na Cambodia tutirengagije no mu gihugu cye.”

Yavuze ko Gen Anyidoho yari afite kamere ikwiriye umusirikare koko. Ati “Gen Anyidoho yari yifitiye icyizere, amashagaga, ubushobozi ndetse n’umuhate kuva ubutumwa bwatangira. Twahise dukundana tukibonana.”

Gen Dallaire yavuze ko mu ngabo zose bari bari kumwe muri ubu butumwa, Anyidoho ariwe wenyine wumvise igitekerezo cye cy’uko batagomba gusiga Abatutsi bicwa mu Rwanda.

Ati “Nagombaga gukora ibishoboka byose kugira ngo abasirikare bo muri Ghana, ingabo zonyine nari nsigaranye ubona ziri ku murongo badacika intege. Ndashimira cyane Henry Anyidoho washyize ubuzima bwe mu kaga akemera kwirengagiza Guverinoma ye mu gihe cyose Jenoside yamaze ndetse abasirikare be bakagumana natwe.”

“Ni umuyobozi mwiza ndetse yabaye inyangamugayo mu kazi twari turimo, ni Anyidoho wenyine wampagazeho ku mwanzuro twari twafashe wo kutava mu gihugu.”

Ubwo yabashyikirizaga imidali aba basirikare ba Ghana mu muhango wabaye kuwa 4 Nyakanga 2022, Perezida Kagame yashimye umuhate w’aba bajenerali bari mu kiruhuko cy’izabukuru kuba batarageze ikirenge mu cy’abandi bahunze cyangwa bagacyurwa n’ibihugu byabo, ahubwo bagahitamo kuguma mu Rwanda kandi bagakora igikwiye.

Yavuze ko hashize igihe kirekire u Rwanda rutekereza kubashimira nk’uko rwagiye rubikorera n’abandi mu bihe bitandukanye.

Ati “Ndabashimira ubwitange n’umurava mwagaragaje aho abandi bahunze cyangwa bagatwarwa na guverinoma zabo bagatererana Abanyarwanda. Aba bajenerali bo bahisemo kuhaguma bakomeza kuyobora abantu babo kandi bakora igikwiye."

"Binyuze muri mwe, turashima Guverinoma n’Abanye-Ghana ku bw’iki cyemezo. Batayo y’Abanya-Ghana yakijije ubuzima bw’abatari bake mu bihe bibi. Nta musirikare n’umwe mu babigizemo uruhare udafite ibikomere bitagaragara ku mutima we uyu munsi.”

Gen Anyidoho na bagenzi be basubiye muri Ghana mu 1995 nyuma yo kurangiza ubutumwa bwabo. Kugeza uyu munsi uyu mugabo avuga ko ibyo yaboneye mu Rwanda muri Jenoside byamuteye ihungabana ku buryo yahuzwe kurya inyama kandi zari mu biryo yakundaga.

Gen. Henry Kwami Anyidoho yagize uruhare mu kurokora Abatutsi mu 1994
Gen. Henry Kwami Anyidoho yambitswe na Perezida w’u Rwanda, Paul Kagame impeta y’ishimwe izwi nk’Indengabaganizina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .