Uyu mukino wabaye kuri uyu wa Gatandatu tariki ya 10 Ukuboza 3022. Watangiye u Bufaransa buzi neza ko butarabona intsinzi n'imwe ku Bwongereza mu Gikombe cy'Isi. Uretse gutsinda, u Bufaransa bwaherukaga kubona igitego ku Bwongereza mu 1986.

Umutoza Didier Deschamps w’u Bufaransa yahisemo gukinisha abakinnyi bane bugarira, batanu mu kibuga hagati n'umukinnyi umwe usatira izamu.

U Bwongereza bwo bwakinishije abakinnyi bane mu bwugarizi, batatu mu kibuga hagati na batatu basatira. Imbaraga nyinshi Gareth Southgate yazishyize mu busatirizi.

U Bufaransa bwakoresheje cyane uruhande rw'ibumoso rwakinagaho Ousmane Dembélé wunganirwaga na Antoine Griezman mu kohereza imipira imbere, bashaka Olivier Giroud.

Mu minota 12 ya mbere wabonaga ko u Bufaransa buri gukina neza kurusha u Bwongereza.

U Bwongereza bwafataga umupira bukagarura inyuma mu kibuga cyabwo, abakinnyi bashaka gutegura umukino bifuza, ukabona urimo imibare myinshi.

Uku gukinira mu kibuga cyabo byatumye Kylian Mbappé acika ba myugariro b'u Bwongereza, ahereza umupira Ousmane Dembélé wafatanyije na Antoine Griezmann, na we awusunikira Aurélien Tchouaméni wahise atereka umupira mu izamu ririnzwe na Jordan Pickford.

Iki gitego cyagiyemo ku munota wa 17 cyakanguye u Bwongereza, umukino uhita wihuta cyane, na Kyle Walker wari wazengerejwe na Kylian Mbappé atangira gutinyuka gukina.

Ku munota wa 25 Harry Kane yashyizwe hasi na Dayot Upamecano hafi y'urubuga rw'amahina. Umusifuzi Wilton Sampaio ukomoka muri Brézil yaketse ko harimo penaliti, ariko abifashinwemo na VAR asanga nta cyabaye.

U Bwongereza bwasatiriye cyane ku mahirwe yabonwaga na Harry Kane, ariko umunyezamu w'u Bufaransa bakinana muri Tottenham Hotspur, Hugo Lloris, akomeza kumubera ibamba akuramo imipira yabazwe.

U Bufaransa bwaje kubakira umukino mu mpande, u Bwongereza butangira kwifashisha Jude Bellingham wari hagati afatanyije na Declan Rice. Ariko ntibarengaga umutaru kuko Adrien Rabiot, Aurélien Tchouaméni na Jules Kounde bari bahagaze neza.

Mu gice cya kabiri cy’umukino, u Bwongereza bwazanye imbaraga nyinshi cyane bubona n'amahirwe ku mupira watewe n'umutwe na Jude Bellingham, ariko Hugo Lloris awukuramo.

Ku munota wa 50, Jude Bellingham yakoze akazi gakomeye ahereza umupira Bukayo Saka wari mu rubuga rw'amahina, Dayot Upamecano amukorera ikosa umisifuzi Wilton Sampaio yemeza penaliti.

Iyi penaliti yatewe neza na Harry Kane ahita abonera u Bwongereza igitego cyo kwishyura. U Bufaransa bwahise butangira gusatira cyane banyuza imipira kuri Kylian Mbappé wazonze cyane Kyle Walker.

Kuva ku munota wa 65, u Bwongereza bwigaranzuye u Bufaransa burasatira cyane, bubona n'amahirwe imbere y'izamu. Harry Maguire yabonye uburyo ku munota wa 70 n'uburyo bwa Luke Shaw watanze umupira ariko hakabura uwukoraho.

Ntabwo u Bufaransa bwaryamye ahubwo bwakomeje gusatira nubwo imipira babonaga ari mike cyane.

Antoine Griezman yaje gushyira umupira mu rubuga rw’amahina awunyujije hejuru, maze Olivier Giroud asumba Harry Maguire amuterana umutwe awutereka mu izamu. Iki cyari igitego cya kabiri cyari kibonetse, ku munota wa 78.

Umutoza Gareth Southgate yahise akura mu kibuga Jordan Henderson ashyiramo Mason Mount, Bukayo Saka asimburwa na Raheem Sterling. Didier Deschamps na we yakuyemo Ousmane Dembélé ashyiramo Kingsley Coman.

Umupira wa mbere Mason Mount yakozeho yahise akorerwaho ikosa mu rubuga rw'amahina na Theo Hernandez. Umusifuzi yahise ajya kureba kuri VAR asanga habayemo penaliti, itewe na Harry Kane ayishyira hejuru y'izamu.

Harry Kane yahise aba umukinnyi w'Umwongereza umaze kurata penaliti nyinshi mu Gikombe cy'Isi (enye), zirimo ebyiri yarase mu 2014, imwe yarase mu 2018 n'iyi arase 2022.

Uyu mukinnyi kandi yagize ibitego 57 mu ikipe y'igihugu y’u Bwongereza, anganya na Wayne Rooney.

Aya niyo mahirwe akomeye ya nyuma yabonetse mu minota 90 y'umukino. Abasifuzi bongeyeho iminota umunani ntihagira ikipe ikora ikindi gikorwa gikomeye.

U Bufaransa bwahise bubona itike yo kujya muri ½ buzakinamo na Maroc yasezereye Portugal, tariki 14 Ukuboza. Ni mu gihe Argentine izaba yakinnye na Croatia tariki 13 Ukuboza 2022. Imikino yombi izakinwa saa tatu z'ijoro.