Ni ibihano byatanzwe n’Ishyirahamwe ry’Umukino wa Volleyball ku Isi (FIVB) nyuma y’uko Ikipe y’Igihugu y’u Rwanda y’Abagore muri Volleyball yifashishije Abanya-Brésil badafite ibyangombwa bibemerera gukina nk’Abanyarwanda mu Gikombe cya Afurika cy’Abagore cya 2021 cyakiniwe i Kigali.

Aline Siqueira, Apolinario Caroline Taiana, Mariana Da Silva na Moreira Bianca Gomes bakomoka muri Brésil, bakiniye u Rwanda ku nshuro ya mbere nyuma yo kugera i Kigali muri Kanama 2021, ni bo bagaragajwe nk’abakinnyi batujuje ibisabwa mbere y’umukino rwari rugiye guhuramo na Sénégal ku wa 16 Nzeri 2021 mu matsinda.

Ibi byatumye hafatwa umwanzuro w’uko irushanwa risozwa hatarimo ikipe y’u Rwanda kuko yahise isezererwa ndetse ruhagarikwa by’agateganyo n’Ishyirahamwe Mpuzamahanga rya Volleyball (FIVB).

Itangazo rya FIVB ryo ku wa 16 Werurwe 2022 rivuga ko Komite ishinzwe ibijyanye n’Imyitwarire mu Ishyirahamwe rya Volleyball ku Isi, yasanze abakinnyi bane bararenze ku mabwiriza agenga irushanwa ryabereye muri Kigali.

Rikomeza riti “Abakinnyi bahagaritswe amezi 10 kuva ku wa 16 Nzeri 2021 nk’itariki y’agateganyo yo guhagarikwa.’’

Ryongeyeho ko na FRVB “yahagaritswe amezi atandatu mu bikorwa byose bya Volleyball kuva ku wa 16 Nzeri 2021 n’ihazabu ya 120.000 CHF [amafaranga akoreshwa mu Busuwisi], akabakaba miliyoni 120 Frw.’’

Komite y’Imyitwarire muri FIVB yibukije ko mu gihe abakinnyi na Federasiyo ya Volleyball mu Rwanda batakubahiriza ibihano bafatiwe, yakongera kubakoraho iperereza. Yanamenyesheje ko ibihano byafatiwe FRVB n’abakinnyi bifashishijwe n’u Rwanda [bigomba kurangira muri uku kwezi kwa Werurwe] bishobora kujuririrwa.

Iyi dosiye yatumye u Rwanda rusigwa icyasha yatumye Visi Perezida wa Kabiri ushinzwe Amarushanwa mu Ishyirahamwe Nyarwanda ry’Umukino wa Volleyball (FRVB), Bagirishya Jean de Dieu uzwi nka ‘Jado Castar’ agezwa mu rukiko, aranafungwa.

Ku wa 13 Ukwakira 2021, Urukiko Rwisumbuye rwa Gasabo rwakatiye Jado Castar igifungo cy’imyaka ibiri kubera uruhare yagize mu makosa yatumye u Rwanda ruzererwa mu irushanwa. Gusa iki gihano cyaje kugabanywa mu bujurire, kigirwa amezi umunani.