Igitaramo ’i Nyanza Twataramye’ kizatwara asaga miliyoni 100

Yanditswe na

Ntakirutimana Deus

Kuya 3 Ukuboza 2015 saa 03:06
Yasuwe :
0 0

Minisiteri y’Umuco na Siporo isanga gushyira ahagaragara ibijyanye n’umuco w’u Rwanda ari kimwe mu bizafasha kuwukundisha abatawuzi ugateza n’igihugu imbere.Mu duce dutandukanye mu gihugu uhasanga amateka y’umuco nyarwanda, ariko atabyazwa umusaruro uko bikwiye kubera ko rimwe na rimwe haba hatazwi.

Mu rwego rwo kuhabyaza umusaruro, Minisiteri y’umuco na Siporo irimo gutegura gukora urutonde rw’utwo duce n’amateka yaho nyuma hazabyazwe umusaruro nk’uko byagarutsweho n’umuyobozi ushinzwe umuco muri iyo Minisiteri, Arlette Ruyonza.

Yagize ati “I Nyanza twatangiye kuhabyaza umusaruro ariko dufite n’ahandi henshi dushaka kugaragaza hari amahirwe menshi mu bijyanye n’ubukerarugendo bushingiye ku muco, uhereye mu ntara y’amajyepfo hose.”

I Nyanza Twataramye yagarutse

Buri mwaka Akarere ka Nyanza gafatanyije na Minisiteri y’Umuco na Siporo ndetse n’abaterankunga batandukanye bategura igikorwa cyiswe’’ I Nyanza twataramye.‘‘

Umuyobozi w’Akarere ka Nyanza, Murenzi Abdallah yavuze ko i Nyanza hari amateka atandukanye abumbatiye umuco wa kera w’u Rwanda, agaragara mu rukari n’ahandi.

Yagize ati’’Ibyiza by’umuco w’u Rwanda twarabizirikanye turifuza kubisangira n’abandi, nk’ahazwi nko ku gicumbi cy’umuco habitse amateka y’umuco wacu.“

Yavuze ko uretse kugaragaza umuco wa kera ubumbatiye ibyiza byinshi, ubunyangamugayo ubutwari n’ibindi bazabihuza no gushishikariza abashoramari kugana muri ako karere, bagashoramo imari kuko hari amahirwe menshi.

Ni muri urwo rwego mu kwizihiza uwo munsi uzaba ku wa Gatandatu tariki ya 5 Ukuboza 2015, hazabanza kumurikwa ibyo bikorwa bitandukanye birimo kwerekana ayo mahirwe ari mu karere azaba agaragarira mu gitabo kizashyirwa ahagaragara, ku munsi wiswe uw’ishoramari mu karere.

Hari kandi imikino itandukanye y’umupira w’amaguru uzahuza As Muhanga n’Amagaju, basketball na tennis, izahuza abaturage baturutse impande n’impande kwidagadura mbere y’umunsi nyir’izina.

Ibirori bizabanzirizwa n’isiganwa ry’amagare ku babigize umwuga n’abakizamuka, nyuma ukurikirwe n’igitaramo kizagaragarizwamo ibyiza by’umuco nyarwanda, kizaba kirimo n’ababyina imbyino gakondo n’indi mikino.

Ku bufatanye na RDB, Crystal ventures, Minisiteri zitandukanye n’akarere ka Nyanza, abashoramari bazerekwa ubutaka bashobora gushoramo imari bufite ubuso busaga hegitari 1200.

Hazamurikwa kandi ikiyaga gishobora kuvomerera hegitari 300 imusozi, amabuye y’agaciro,amata yabyazwa umusaruro n’ibindi.

’I Nyanza Twataramye’ ni umunsi watangiye kwizihizwa bwa mbere mu kuboza 2014, uhuza abantu bari hagati y’ibihumbi bibiri na bitatu, uyu mwaka bategerejweho kwikuba inshuro 10.

Icyo gikorwa ubushize cyatwaye asaga miliyoni 40, kuri iyi nshuro kikazatwara asaga miliyoni 100 z’amafaranga y‘u Rwanda.

Arlette Ruyonza, Umuyobozi w'agateganyo ushinzwe umuco
Nshimiyumukiza Martin, Murenzi Abdallah umyobozi w’Akarere ka Nyanza na Fred Oludch umuyobozi wa Apex Media ishinzwe gutegura iri serukiramuco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza