00:00:00 IGIHE NETWORK KN KINYARWANDA EN ENGLISH FR FRANCAIS

Bimwe mu biranga ‘Kwigira kw’Abanyarwanda’ n’umwihariko wabyo

Yanditswe na Prudence Kwizera
Kuya 18 June 2022 saa 11:37
Yasuwe :

U Rwanda ni igihugu gifite amateka yihariye kuko gituwe n’abaturage bahuje umuco, bavuga ururimi rumwe kandi kuva kera kugeza na n’ubu bakomeje kwishakamo ibisubizo by’ibibazo bafite badategereje ko hari undi uzaza kubibakemurira.

Amateka y’u Rwanda agaragaza ko kuva kera abanyarwanda bagiye bishyiriraho gahunda zibafasha kwigira no kwikemurira ibibazo mu buryo burambye.

Muri iyi nkuru turagaruka ku bintu 10 biranga Kwigira kw’Abanyarwanda kuva mu myaka ya kera duhereye ku bakurambere ndetse na n’ubu.

Kwigira kw’Abanyarwanda ni igitekerezo cyaje gishingiye ku muco n’amateka byabo. Nyuma ya Jenoside yakorewe Abatutsi mu 1994, igihugu cyari gifite ibibazo by’ingutu byiganjemo ibishingiye ku ngaruka zayo.

Ni muri urwo rwego Leta y’Ubumwe bw’Abanyarwanda yahisemo kwishakamo ibisubizo byatuma igihugu gisohoka mu rusobe rw’ibyo bibazo.

Kuva gahunda yo kwigira kw’Abanyarwanda yatangizwa mu Rwanda yafashije mu kubona ibisubizo by’ibibazo bishingiye ku miyoborere, ubukungu, imibereho myiza, ubutabera ndetse n’imibanire y’Abanyarwanda.

Uko Kwigira kw’Abanyarwanda kandi kugarukwaho mu ngingo ya 11 y’Itegeko Nshinga rya Repubulika y’u Rwanda aho rigira riti “mu rwego rwo kubaka igihugu, umuco wacyo no kwihesha agaciro, Abanyarwanda bashingiye ku ndangagaciro zabo bashyiraho uburyo bwo kwishakamo ibisubizo by’ibibazo byabo”.

Kuri ubu ibiranga Kwigira kw’Abanyarwanda biri mu ngeri enye. Iya mbere ni ‘Imiyoborere’ irimo Umwiherero, Umushyikirano, Itorero, Imihigo ukwezi kw’imiyoborere, ihuriro ry’imitwe ya Politike, kubungabunga amahoro n’ibindi.

Iya kabiri ni ‘Imibereho Myiza’ irimo Girinka, Ubudehe, VUP, Ubwisungane mu kwivuza, Uburezi bw’ibanze bw’imyaka 12 n’ibindi.

Iya gatatu ni ‘Ubukungu’ nk’Umuganda, Agaciro, guhuza ubutaka naho iya kane ni ‘Ubutabera’ nk’inkiko Gacaca, Abunzi na Maj n’ibindi.

Itorero

Amateka y’u Rwanda agaragaza ko mbere y’umwaduko w’Abazungu mu Rwanda, itorero ryari ishuri urubyiruko rw’u Rwanda rwigiragamo imvugo nziza, gukunda igihugu, kubana neza, imikino, imbyino, indirimbo no kurinda ubusugire bw’igihugu.

Itorero kandi ryafashaga urubyiruko gukura rwumva neza ibigize umuco n’amateka y’igihugu. Intore zatozwaga kumenya indangagaciro na kirazira by’igihugu. Mu Itorero kandi niho hategurirwaga abayobozi b’ejo hazaza b’igihugu.

Amateka y’u Rwanda agaragaza ko Itorero rya mbere ry’Igihugu ryabayeho mu ngoma y’Umwami Ruganzu I Bwimba ahayinga mu 1312. Guhera mu 1924 kugeza mu 1994, igihe cy’ubukoloni na Leta zakurikiyeho Itorero ryaraciwe hagamijwe gusenya ubumwe bw’Abanyarwanda, ubufatanye, ubwitange n’izindi ndangagaciro bigishirizwagamo.

Gusenywa kw’Itorero ni imwe mu nzira zidashidikanywaho zayoboye kuri Jenoside yakorewe Abatutsi mu Rwanda mu 1994. Itorero ryongeye kubyutswa mu 2009 ndetse hanashyirwaho Komisiyo y’Igihugu y’Itorero.

Bamwe mu bigeze kwitabira Itorero ry’Igihugu babwiye IGIHE ko hari byinshi bungutse bibubaka.

Umwarimu witwa Uwizeyimana Olive wo mu Karere ka Nyarugenge yavuze ko yakuyemo inyigisho zo gukunda igihugu no kugikorera.

Yavuze ko ikiganiro bahawe n’Umujyanama wa Perezida wa Repubulika mu by’umutekano, Gen Kabarebe James, mu Karere ka Nyanza muri Mutarama 2020 yakuyemo inyigisho zo kunga ubumwe no guhuza imbaraga mu kwiyubakira igihugu no kugiteza imbere.

Yagize ati “Icyo nungukiyemo ni uko tugomba kunga ubumwe twirinda icyatuzanamo amacakibiri. Yadusobanuriye byinshi byatwubatse ku buryo numvise neza ibyiza byo kunga ubumwe.”

Mu Itorero ry'Igihugu bigishwa ibintu bitandukanye birimo imyitozo y'ibanze ya gisirikare nko kumasha, kugenda ku manywa na nijoro, gutegura intambara hifashishijwe igishushanyo mbonera n'ibindi

Imihigo

Imihigo ni ubwinshi bw’ijambo ry’Ikinyarwanda ‘Umuhigo’ risobanura kugera ku ntego. Imihigo kandi yumvikanisha igitekerezo cyo guhiganwa, bisobanura kurushanwa n’abandi.

Amateka agaragaza ko ‘Imihigo’ ikomoka ku muco wo hambere w’Abanyarwanda, aho umuntu yihaga intego y’ikintu azageraho mu gihe runaka. Uhiga yiyemeza kugera ku ntego kabone nubwo haba hari inzitizi yahura nazo.

Mu rwego rwo kwiyubakira igihugu no kurushaho kunoza imiyoborere myiza, mu 2006 Leta y’u Rwanda yongeye kubyutsa imihigo nka bumwe mu buryo bwo kwishakamo ibisubizo.

Kuva Imihigo yakongera kubyutswa yagiye ifatwa nk’imwe mu nzira zo kwimakaza imiyoborere myiza ndetse no kwihutisha iterambere.

Buri mwaka uturere twose tw’igihugu dusinyana imihigo na Perezida wa Repubulika y’ibyo tuzakora kugira ngo twiteze imbere. Iyo abayobozi b’uturere bavuye gusinya iyo mihigo hakurikiraho ko nabo bayisinyana n’imirenge kugira ngo ishyirwe mu bikorwa mu bufatanye.

Uku gukorera ku mihigo kwinjiye no mu mikorere y’abaturage ubwabo bibafasha gutera imbere kuko biha intego y’ibyo bazageraho.

Nkurunziza Alphonse uhinga icyayi mu Karere ka Nyaruguru yahize kuzagura modoka imufasha mu kazi ke dore ko bari kubakirwa n’umuhanda wa kaburimbo.

Ati “Nanjye nzagura imodoka bakimara kuwurangiza [umuhanda] izajya imfasha mu kazi kanjye kajyanye n’ubuhinzi nkora bw’icyayi.”

Umwiherero

Umwiherero ni kimwe mu bisubizo u Rwanda ruvoma mu mateka yarwo ya kera kuko amateka agaragaza ko Abatware ku nzego zitandukanye bahuriraga hamwe bakaganira ku bibazo byugarije rubanda n’igihugu, hagashakwa intsinzi n’inzira zanyurwamo ngo bikemuke.

Guhera mu 2004 inama z’Umwiherero zongeye kugarurwa mu Rwanda zigirwa ngarukamwaka.

Mu gihembwe cya mbere cya buri mwaka abayobozi bakuru b’igihugu, abo mu nzego z’ibanze n’abikorera barahura bakisuzuma bakaboneraho n’umwanya wo gusuzuma aho igihugu kigeze mu iterambere bagafata n’ingamba zibafasa kuryihutisha.

Buri mwaka abayobozi bakuru bahurira mu mwiherero

Umushyikirano

Inama y’Igihugu y’Umushyikirano ni urubuga rushyirwaho n’Itegeko Nshinga rya Repubulika y’u Rwanda, igahuza Perezida wa Repubulika n’abahagarariye abaturage.

Yitabirwa n’abagize guverinoma, abagize Inteko Ishinga Amategeko, abahagarariye Abanyarwanda baba mu mahanga, abayobozi mu nzego z’ibanze, abahagarariye imiryango itagengwa na Leta, itangazamakuru, abahagarariye u Rwanda mu mahanga n’undi wese watumirwa na Perezida wa Repubulika.

Iyo nama isuzuma uko ubuzima bw’igihugu n’ubumwe bw’Abanyarwanda bihagaze.

Buri mwaka guhera mu 2003 iyo nama iteranira mu Murwa Mukuru w’u Rwanda, Kigali, ibiyivugirwamo bigatambutswa imbonankubone mu itangazamakuru rya Leta.

Imyanzuro y’iyo nama ihita igezwa ku nzego bireba kugira ngo ziyishyire mu bikorwa hagamijwe kunoza serivise zihabwa abaturage.

Guhera mu 2017 Inama y’Igihugu y’Umushyikirano yitabirwa n’abantu bari hirya no hino ku Isi hakoreshejwe ikoranabuhanga rihitisha amajwi n’amashusho imbonankubone ndetse n’uburyo bw’imbuga nkoranyambaga.

Muri iyi nama Abanyarwanda baboneraho n’umwanya wo kugaragaza ibibazo bibabangamiye bigahita bihabwa ibisubizo.

Urugero ni ikibazo cyabajijwe n’umwe mu baturage mu 2019 agaragaza ko we na bagenzi be barenga 60 bubatse Ibiro by’Akarere ka Nyamagabe ntibishyurwa amafaranga arenga Miliyoni 30 Frw.

Bagaragaje ko bamaze imyaka igera kuri ine bishyuza ayo mafaranga kuko bakubatse mu 2016. Icyo kibazo cyahise gihabwa umurongo, amafaranga arashakwa barishyurwa.

Inama y'Igihugu y’Umushyikirano ihuriza hamwe abayobozi bo mu nzego z’igihugu zitandukanye, abanyamadini n’abaturage bahagarariye abandi

Ubudehe

Amateka y’u Rwanda yerekana ko Ubudehe ari kimwe mu bikorwa bifite imizi mu muco wa kera w’Abanyarwanda. Iki gikorwa kikaba kiri mu byarangaga ubufatanye mu gukemura ibibazo byo mu muryango.

Nubwo hatazwi neza igihe Ubudehe bwatangiriye mu Rwanda hari ibimenyetso bigaragaza ko bumaze ibinyejana bitari bike. Ubudehe bwibandaga ku bikorwa by’ubuhinzi n’ubwubatsi kuko ari yo mirimo y’ibanze yarangaga Abanyarwanda bo hambere.

Ubudehe bwaciwe intege n’ubukoloni ndetse n’ikoreshwa ry’amafaranga kuko bamwe mu baturage bahisemo guhemba amafaranga ababakorera imirimo itandukanye aho kwitabaza Ubudehe.

Nubwo bwabaye nk’ubucika ariko mu bice bimwe na bimwe by’igihugu bwari bugikora kugeza mu mpera za 1980 aho bwibandaga ku bikorwa by’ubuhinzi.

Ubudehe bwongeye kubyutswa mu 2001 na Leta y’Ubumwe bw’Abanyarwanda mu rwego rwo kubanisha neza abenegihugu, kubatoza kwigira no kwikemurira ibibazo.

Muri iki gihe ibikorwa by’ubudehe ku rwego rw’akagari byibanda ku mirimo y’ubuhinzi, guhanga imihanda y’imigenderano, kubaka ibiraro bito by’imihanda, ibigega by’amazi meza no guca amaterasi y’indinganire.

Girinka

Gahunda ya ‘Girinka Munyarwanda’ ifite inkomoko mu muco gakondo w’Abanyarwanda wo kugabirana kuko kuva hambere umugabo yagabiraga mugenzi we nk’ikimenyetso cy’icyubahiro, ubucuti n’umubano bafitanye.

Guhera mu 2006 Girinka yabyukijwe na Leta y’u Rwanda nk’igisubizo ku bibazo igihugu cyari gifite birimo igwingira ry’abana, ubukene, umusaruro udagagije ukomoka ku buhinzi n’ubworozi n’ibindi.

Ubuhamya butangwa na bamwe mu bahawe inka muri gahunda ya Girinka bugaragaza ko yatumye umukamo w’amata wiyongera, yafashije kongera umusaruro w’ubuhinzi kuko bahingisha ifumbire, habonetse inyungu ikomoka mu kugurisha amata, imirimo yariyongereye mu gihugu kandi n’ubuzima bw’aborojwe bwarahindutse.

Murangwa Eurelie wo mu Karere ka Huye yahawe inka ihaka mu mwaka wa 2020, nyuma y’amezi make ihita ibyara abona amata yo kunywa no guha abana be babiri imibereho ye itangira guhinduka.

Yagize ati “Inka nayihawe nyikeneye cyane imbera nziza ihita ibyara, abana babona amata kandi nkajya ngurishaho nkabona amafaranga. Yampaye ifumbire umusaruro uriyongera. Mpinga ibishyimbo n’ibigori. Mba mu cyiciro cya kabiri cy’ubudehe ariko nifuza kukivamo.”

Gahunda ya Girinka Munyarwanda yagize uruhare runini mu gukura abaturage mu bukene

Umuganda

Umuganda bisobanuye gushyira hamwe hagamijwe kugera ku ntego yemejwe kuko kuva hambere mu muco n’amateka y’u Rwanda iyo habaga hari igikorwa gikeneye abantu benshi nko kubaka, gusana inzu, guhinga n’ibindi, hitabazwaga ingufu z’umuryango n’abaturanyi n’inshuti kugira ngo gikorwe neza kandi kirangire vuba.

Amateka y’u Rwanda agaragaza ko nyuma y’ubwigenge bw’u Rwanda mu 1962 umuganda wifashishijwe na Repubulika ya mbere n’iya kabiri mu gucengeza amatwara y’ubutegetsi bwariho bituma utakaza isura y’umwimerere yawo.

Kuva mu 2007 Leta y’Ubumwe bw’Abanyarwanda yavuguruye imitegurire n’imigendekere y’umuganda hagamijwe guteza imbere ibikorwa by’amajyambere mu rwego rwo kunganira ingengo y’imari y’igihugu no gutuma abantu bongera gusabana.

Umuganda ukorwa buri wa Gatandatu wa nyuma w’ukwezi ugakorwa n’Umunyarwanda wese ufite imyaka iri hagati ya 18 na 65 y’amavuko.

Urugero rwa hafi twafata ni urwo mu 2017 aho mu Karere ka Nyanza imiryango isaga 400 yabaga mu nzu zimeze nka nyakatsi, yafashijwe kuzivugurura hifashishijwe umuganda.

Abaturage bagiye bahuza imbaraga bakazamura inzu noneho ubuyobozi bugatanga amabati yo gusakara.

Umwe mu bubakiwe n’umuganda witwa Matabaro Abeli wo mu Murenge wa Busasamana yagize ati “Ubu ndishimye cyane kuko nubakiwe inzu yo kubamo, ndatuje rwose kandi mpora mbasabira umugisha.”

Perezida Paul Kagame na Madamu Jeannette Kagame, ubwo bifatanyaga n’abaturage muganda ngarukakwezi mu murenge wa Kimihurura mu Mujyi wa Kigali ku wa 30 Ugushyingo 2019

Agaciro

Ku wa 23 Kanama 2012 nibwo Perezida wa Repubulika y’u Rwanda, Kagame Paul, yayoboye umuhango wo gutangiza ku mugaragaro ikigega ‘Agaciro Development Fund’ nk’uburyo Abanyarwanda bifashisha batanga umusanzu wo kubaka igihugu ku bushake.

Igitekerezo cyo gutanga umusanzu wo kubaka igihugu cyavuye mu nama y’Igihugu y’Umushyikirano yabaye mu 2011, aho Abanyarwanda n’abatuye mu mahanga bagombaga gutanga umusanzu wo kubaka igihugu ku bushake binyuze mu kigega cya ” Nation Solidality Fund”.

Gutangiza icyo kigega byafashije kuziba icyuho cyari kuzaba mu iterambere ry’ubukungu bw’u Rwanda kuko ibihugu bimwe bigenera u Rwanda inkunga byari byamaze kuzihagarika. Aho kwita icyo kigega “Nation Solidality Fund”, izina ryaje guhinduka cyitwa ”Agaciro Development Fund”.

Mu gutangiza icyo kigega hasobanuwe ko amafaranga azagishyirwamo atari ayo gusimbura inkunga zahagaze, ahubwo ari ukunganira imari iri mu gihugu ndetse n’ishobora kuva hanze.

Imibare yatanzwe n’ubuyobozi w’Ikigega Agaciro Development Fund yerekanye mu Ukuboza 2017 cyari kimaze gushyirwamo miliyari 46 Frw naho mu Ukuboza 2018 cyari kirimo miliyari 184 Frw.

Mu myaka umunani ya mbere [2012- 2020] Abanyarwanda batanze 1% by’umushahara wabo muri iki kigega ndetse n’ibigo bitandukanye bikagiha imisanzu; cyahagaritse kwakira inkunga muri Mata 2020 kimaze gukusanya agera muri miliyari 200 Frw, azakoreshwa mu kuzamura umusaruro mbumbe w’igihugu.

Uko gutera imbere kwacyo guturuka ahanini kuri gahunda yacyo y’ishoramari ituma buri mwaka hari impinduka zikomeye zibaho.

Ku itariki 14 Nyakanga 2021 cyahawe Inama y’Ubutegetsi nshya igizwe n’intiti zirindwi zifite inararibonye mu bijyanye n’ubukungu ndetse n’icungamutungo.

Gacaca

Ijambo ‘Gacaca’ ryibutsa uko hambere Abanyarwanda bahuriraga hamwe bagakemura ibibazo byavutse hagati y’abagize umuryango cyangwa imiryango. Inyangamugayo zafashaga gukemura ibyo bibazo akenshi zabaga zigizwe n’abageze mu za bukuru ndetse n’abakuru b’umuryango.

Buri wese mu bafitanye ibibazo yahabwaga ijambo noneho inyangamugayo zigafata umwanzuro. Gacaca yasozwaga no gusangira nk’ikimenyetso cy’ubwiyunge ku bari bafitanye ikibazo.

Mu 2002 Inkiko Gacaca zongeye kubyutswa na Leta y’Ubumwe bw’Abanyarwanda nk’igisubizo cyo guca imanza nyinshi zari mu gihugu za Jenoside yakorewe Abatutsi mu 1994.

Imibare igaragaza ko Inkiko Gacaca zabashije guca imanza za jenoside zigera kuri 1.958.634 mu gihe gito.

Ku wa 18 Kamena 2012 Perezida wa Repubulika, Kagame Paul, yavuze ko u Rwanda rwahisemo Inkiko Gacaca nk’uburyo gakondo bwo gukemura ibibazo by’ubutabera igihugu cyari gifite.

Yagize ati “Ukurikije uburemere bw’ibibazo ukareba umubare w’ababigizemo uruhare n’ubushobozi igihugu cyari gifite, inkiko zisanzwe nk’uko tuzizi ntizari kutugeza ku butabera twifuza. Twari dufite amahitamo atatu: Aya mbere yari inzira iteye inkeke yo kwihorera; aya kabiri kwari ugutanga imbabazi rusange. Izi nzira zombi zashoboraga kutuganisha ku kaduruvayo n’isenyuka ry’igihugu. Twe twahisemo uburyo bwa gatatu bugoranye aribwo bwo guhangana n’ikibazo hagamijwe gusana ubumwe bw’Abanyarwanda no kubumbatira ubusugire bw’igihugu. Twahisemo Gacaca, uburyo bwacu gakondo bwo gukemura amakimbirane, tuyihuza n’ibihe by’ingorane zari mu gihugu.”

Abunzi

Mu rwego rwo kwishakamo ibisubizo, mu Rwanda hashyizweho urwego rw’Abunzi rushinzwe kunga abantu bafitanye ibibazo aho kwihutira kugana inkiko.

Komite y’Abunzi ni urwego rushinzwe kunga ababuranyi igihe cyose mbere y’uko bashyikiriza urukiko ruburanisha ibirego mu rwego rwa mbere. Umurimo w’abagize Komite y’Abunzi ukorwa mu bwitange kuko nta mushahara bagenenerwa.

Ku rwego rw’Akagari kimwe no ku rw’Umurenge, Komite y’Abunzi iba igizwe n’abantu 12 b’inyangamugayo, bose bagomba kuba batuye mu Kagari no mu Murenge, bitewe n’urwego barimo, kandi bazwiho ubushobozi bwo kunga.

Batorwa n’Inama Njyanama y’Akagari cyangwa iy’Umurenge, bitewe n’urwego barimo. Mu bantu batari abakozi bo mu nzego z’ibanze cyangwa se z’Ubutabera, batorerwa igihe cy’imyaka itanu gishobora kongerwa. Abagize Komite y’Abunzi, bagomba kuba barimo nibura 30 b’abagore.

Amateka agaragaza ko Abunzi bahozeho kuva kera mu mibereho y’abakurambere b’u Rwanda kuko iyo abantu bagiranaga ikibazo, biyambazaga abaturanyi babo b’inyangamugayo bakabafasha kugikemura.

Inyangamugayo zabaga zigizwe n’abasaza bakuru b’inararibonye n’abandi bantu b’abagabo bazwiho ubupfura no kuvugisha ukuri.

Mu Rwanda Komite z’Abunzi zashyizweho mu 2005 zitangira umurimo wo kongera kunga Abanyarwanda no kubafasha kubana neza mu bwumvikane.

Ubushakashatsi bwakozwe mu 2020 n’Urwego rw’Igihugu rw’Imiyoborere, RGB, bwagaragaje ko Abunzi bakemuye ibibazo mu mahoro, birinda abantu kugana inkiko ku kigero kingana na 85%.

Ubwo bushakashatsi bwerekanaye ko imikorere y’Abunzi ishimwa n’abaturage ku kigero kirenga 70%, ubunyangamugayo bwabo bugashimwa ku kigero cya 77%, icyizere bafitiwe cyo kikaba kiri ku kigero kingana na 78%.

Musabyimana Marianne umwe mu bunzi bo mu Karere ka Huye umaze imyaka irenga 15 akora uwo mwuga yabwiye IGIHE ko akunda kunga abantu.

Yagize ati “Njyewe maze imyaka 15 ndi Umwunzi kuko natangiranye nabo kuva bajyaho. Nkunda kunga abantu mu buzima bwanjye kuko hari n’abansanga mu rugo nkabagira inama ntari no mu kazi.”

Imibare yerekana ko kuri ubu mu Rwanda hari Abunzi barenga 17,900.

Ubushakashatsi bwa RGB bugaragaza ko abunzi bakemuye ibibazo mu mahoro, birinda abantu kugana inkiko ku kigero kingana na 85%

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .