Ubushakashatsi bwagaragaje ko ibinini byo kuboneza urubyaro bishobora kwangiza ubwonko

Yanditswe na Joy Monique Dukuze Umutesi
Kuya 12 Ukuboza 2019 saa 03:26
Yasuwe :
0 0

Ubushakashatsi bwagaragaje ko ibinini byo kuboneza urubyaro bishobora kugira ingaruka ku bwonko bw’abagore babikoresha kuko byangiza agace kabwo kitwa “Hypothalamus” gafasha mu gutuma ibice bimwe na bimwe by’umubiri bikora uko bikwiye.

Bwakozwe n’Ikigo cy’Ubushakashatsi cyitwa “Magnetic Resonance Research Center” gishamikiye ku ishuri ryigisha ubuvuzi ryitiriwe “Albert Einstein” muri Leta Zunze Ubumwe za Amerika.

Bwakorewe ku bagore 50, muri bo 21 bakoresha ibi binini. Bose bakorewe isuzuma rya ‘MRI’ harebwa imikorere y’ubwonko bwabo by’umwihariko hasuzumwa agace kitwa “Hypothalamus”.

Iki gice cy’ubwonko ni ingenzi kuko gifasha mu kugenzura ingano y’imisemburo mu mubiri ndetse kigira uruhare ku buryo umuntu agira cyangwa abura ibitotsi n’uburyo umutima utera. Kinagira kandi uruhare mu kuba umuntu yakwiyongera cyangwa akagabanyuka ibiro n’ubushake bwo kurya.

Abakoze ubu bushakashatsi bagaragaje ko abagore bafataga ibinini byo kuboneza urubyaro mu gihe bwakorwaga, bafite ‘hypothalamus’ nto ugereranyije n’abatarabikoreshaga.

Umwarimu wigisha ibijyanye no gusuzuma indwara z’imbere mu mubiri hakoreshejwe imirasire mu kigo cy’ubushakashatsi ku buzima cyitiriwe Albert Einstein cy’i New York, Michael L. Lipton, uri mu babuyoboye; yagize ati “twabonye impinduka zigaragara mu ngano y’imiterere y’ubwonko hagati y’abagore bafataga ibi binini n’abatarabifataga.”

Lipton yavuze ko ibyavuye muri ubu bushakashatsi bikwiye gutuma hakorwa igenzura rindi ryimbitse ku ngaruka z’ibi binini ku mubiri wa muntu by’umwihariko ku mikorere y’ubwonko.

Gusa kimwe mu byo ubu bushakashatsi bwerekanye ni uko nta ngaruka n’imwe ibi binini bigira ku mitekerereze ya muntu.

Si ubwa mbere ubushakashatsi bugaragaje ingaruka mbi z’ibi binini ku bwonko bw’ababikoresha kuko muri Gashyantare 2019, hari ubwasohotse mu kinyamakuru ‘Frontiers in Neuroscience’ bwerekanye ko ibinini byo kuboneza urubyaro bituma ubwonko bwangirika ku buryo ubinywa aba adashobora kureba amarangamutima y’umuntu ku isura ye.

Ubushakashatsi bwagaragaje ingaruka ziterwa n'ibinini bifasha mu kuboneza urubyaro ku bwonko bw'abagore babikoresha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .