Impanuro za Dr Kayitesi ku babyeyi bareresha abana amata aho kubakamira amashereka

Yanditswe na David Eugène Marshall
Kuya 15 Ugushyingo 2018 saa 01:37
Yasuwe :
0 0

Mu 2015, Umuryango w’Abibumbye washyizeho ingamba z’iterambere rirambye (SDG’s) zikubiye mu ngingo zitandukanye harimo n’iyo gusigasira ubuzima buzira umuze bw’umwana n’umubyeyi nk’ipfundo ryo kubaka ahazaza h’Isi.

Ishami ry’Umuryango w’Abibumbye ryita ku Buzima (OMS) risaba ko nibura mu mezi atandatu ya mbere umwana akivuka akwiye konswa neza nta kindi gisimbujwe amashereka. Bituma akurana ubudahangarwa ku buzima bwe.

Bitewe n’impamvu zirimo gushaka imibereho, hari ababyeyi bakura abana ku ibere gusa hari n’ababikora bishingikirije ubusirimu, ngo amabere yabo atagwa, bakihunza inshingano yo konsa batyo.

Irengayobora ryagakwiye kuba kubera impamvu zemejwe na muganga, igihe cy’ibizazane nk’umwana watakaje umubyeyi akivuka.

Abenshi bahitamo gusimbuza amashereka ubwoko butandukanye bw’amata, yaba akorerwa mu nganda cyangwa asanzwe y’inka ariko afite akamaro kari hasi y’ak’amashereka.

Mu kiganiro na IGIHE, Umuganga w’Abana mu Bitaro bya Muhima, Dr Kayitesi Diane Patricie, yakanguriye ababyeyi kubahiriza uburenganzira bw’umwana bwo konka.

Yagize ati “Mu by’ukuri hari n’abakoresha amata y’inka ku bana bataruzuza umwaka kandi si byiza kuko byagaragaye ko atera umwana kugira amaraso make, bita mu ndimi z’amahanga ‘iron deficiency anemia.’”

Ubusanzwe nta gikwiye gusimbura ibere muri rusange n’amashereka by’umwihariko, uretse gusa ku bana barengeje amezi atandatu, bashobora gufata izindi nyunganirabere.

Dr Kayitesi yeretse ababyeyi bakora ubushabitsi n’abakozi ba Leta n’ibigo byigenga bakorera kure y’ingo zabo batabona umwanya wo konsa uko bakwiye kwitwara.

Yagize ati “Ubusanzwe umwana akwiriye konka nibura inshuro umunani cyangwa 12 ku munsi. Kuba umubyeyi avuye mu rugo agiye gushaka imibereho, si impamvu yahita atangira guhereza umwana we amata yo mu nganda cyangwa ay’inka, ahubwo yakama amashereka akayasigira umwana, kuko abikika kandi ntatere ikibazo.”

Mu bihugu byateye imbere hari uburyo bwo kubika amashereka neza akamara igihe.

Dr Kayitesi yavuze ko no mu Rwanda “Ababyeyi bakwiye gukama amashereka bakayabika neza n’isuku kuko ashobora kumara amasaha agera kuri atandatu nta kibazo agize, umwana akaza kuyanywa mu gihe umubyeyi adahari.”

Amashereka, ubwirinzi ku ndwara zibasira abato

Amashereka yifitemo ubushobozi bwo kurinda abana indwara zo mu mara, impiswi, iz’ubuhumekero, izizwi nka ‘infections’ n’izindi.

Umwana wonse neza aba afite ubwirinzi kuri kanseri zibibasira, yazanakura ntakunde kurwaragurika indwara ziterwa n’ubwivumbure bw’umubiri nka za asima n’izindi.

Dr. Kayitesi asanga ipfundo ryo kutabikora ari ukudasobanukirwa n’uburyo amashereka afite akamaro ku mwana karimo no gutuma ubwonko bukora neza.

Yanasobanuye ko impamvu iri mu zituma ababyeyi babura amashereka ari ukubura umutuzo ku mubyeyi, kutaruhuka no kudafata amafunguro aboneye.

Ati “Igihe cyose umubyeyi agomba kubona ifunguro rihagije ngo abone amashereka yujuje intungamubiri no kunywa bihagije ntagire inyota.”

Ubusabe ku bigo bikoresha ababyeyi bonsa

Uyu muganga yasabye ibigo binini n’ibiciriritse kugenera abakozi babyo bonsa ahantu hagenewe konkereza no gukama amashereka.

Ati “Byaba byiza umwana ahawe ibere akarihumuza mbere yo kumuhindurira irindi. Igihe yijuse atarayamaramo, amashereka yaryo akayakama akabikwa kugira ngo umubiri ukomeze gukora amashereka mu mabere yombi.”

Igikorwa cyo gukama amashereka kigomba gukoranwa isuku ihebuje kuko ititaweho bishobora gutera indwara zituruka ku mwanda.

Dr Kayitesi Diane Patricie, inzobere mu buvuzi bw'abana mu Bitaro bya Muhima, arakangurira ababyeyi bonsa kwitabira umuco wo gukama amashereka, agahabwa abana mu gihe badahri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza