00:00:00 IGIHE NETWORK KN KINYARWANDA EN ENGLISH FR FRANCAIS

Havumbuwe ingirabuzimafatizo zo mu bwonko zifasha umuntu gukira ihungabana

Yanditswe na Zigiranyirazo Bajecteur
Kuya 8 April 2022 saa 11:22
Yasuwe :

Ubushakashatsi bwasohotse mu Kinyamakuru Nature nyuma y’uko bukozwe ku bufatanye bw’abashakashatsi bo mu Busuwisi n’Ikigo cy’Igihugu cya Leta Zunze Ubumwe za Amerika cyita ku ngaruka z’ikoreshwa ry’ibisindisha (NIAAA), bwagaragaje ko mu bwonko habamo ingirabuzimafatizo zishobora gufasha umuntu gukira ihungabana cyangwa kwibagirwa amashusho y’ibintu bibabaje yahuye nabyo ariko akisanga bikomeza kumugarukamo umunsi ku wundi.

Nubwo ibyavuye mu bushakashatsi mbere na mbere byabonetse nyuma y’igerageza ryakorewe ku mbeba, ariko abahanga bavuga ko ibyagezweho ari intambwe ifatika kandi bizafasha abantu banyuze mu bihe bikomeye, gutsinda ibibazo by’umuhangayiko bakundaga guhura nabyo.

Umuyobozi Mukuru wa NIAAA, Dr. George F. Koob, yavuze ko ubusanzwe ibibazo by’ihungabana bigabanuka cyangwa se byoroha uko iminsi igenda yicuma.

Ibyo bishoboka ku bantu bamwe mu gihe abandi bo usanga bigenda byiyongera uko ibihe biha ibindi ku buryo binabuza umuntu gukora imirimo ye ya buri munsi.

Ibyavuye mu bushakashatsi bushya byagaragaje ko hari ibyiciro bibiri by’ingirabuzimafatizo zizwi nka “ITCs” aho zikora nk’izihanganye; icyiciro kimwe kikagerageza kwibagiza umuntu ibyamuteye ihungabana mu gihe ikindi kirwana kimugarura muri ibyo bihe bigatuma ihungabana rye ridakira.

Andrew Holmes wari uyoboye itsinda ry’abashakashatsi muri iki gikorwa yagaragaje ko ingirabuzimafatizo za ITCs ziboneka mu bwonko bw’inyamabere zigira uruhare rukomeye mu kugenga amarangamutima ku buryo zibasha gukangura ibihe biteye ubwoba umuntu yaciyemo cyangwa se zikaba zanabimwibagiza.

Ibyavuye mu bushakashatsi bushya bigaragazwa nk’intambwe yakwifashishwa mu kubona igisubizo ku bibazo by’ihungabana abantu bakunze guhura na byo ku buryo hifashishijwe izi ngirabuzimafatizo za ITCs; icyiciro cyibagiza umuntu ibihe bibabaje yanyuzemo, hazaboneka umuti ufasha mu gutuma umuntu adahorana ihungabana ry’ibyamubayeho mu mateka ye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .