Guherekeza Abanyarwanda mu komora ibikomere byo ku mitima bikwiye kuba ku isonga mu myaka icumi iri imbere

Yanditswe na Never Again Rwanda
Kuya 8 Werurwe 2019 saa 02:41
Yasuwe :
0 0

Nyuma y’imyaka 25 Jenoside yakorewe abatutsi ibaye, zimwe mu ngaruka umuryango nyarwanda ugihanganye nazo, harimo ihungabana, agahinda gakabije ndetse n’ibindi bikomere bitaboneshwa amaso bikimunga umuryango nyarwanda.

Ubushakashatsi bwakozwe na minisiteri y’ubuzima, bwagaragaje ko abagera kuri 12% bafite ikibazo cy’agahinda gakabije mu gihe mu bacitse ku icumu rya jenoside bagezweho n’ubushakashatsi, abagararagaje ko bafite agahinda gakabije bagera kuri 35%.

Mu yandi magambo, ugendeye kuri iri janisha no ku mibare rusange yabaturarwanda, umuntu yavuga ko abarenga miliyoni baba babana n’agahinda gakabije (depression). Uretse ikibazo cy’agahinda gakabije, ubushakashatsi bwanagaragaje ko ikibazo cy’ihungabana mu bacitse ku icumu kikiri hejuru ku kigero cya 28%.

Ibi biravugwa mu gihe nyamara Guverinema y’u Rwanda n’abafatanyabikorwa bateguye kandi bashyira mu bikorwa gahunda nyinshi zigamije guhangana n’ingaruka za jenoside ndetse no kubaka iterambere rirambye.

Hari byinshi byagezweho ndetse bishimwa no mu ruhando mpuzamahanga harimo politiki yo kubaka ubumwe n’ubwiyunge bw’abanyarwanda, umuvuduko w’iterambere mu by’ubukungu n’ishoramari, gahunda yo kwegereza ubuyobozi abaturage, ihame ry’uburinganire n’ubwuzuzanye hagati y’umugore n’umugabo, ndetse urubyiruko rwagizwe ishingiro ry’iterambere u Rwanda rwifuza.

Guvernema kandi yashyizeho gahunda zihariye no gufasha abatishoboye, harimo n’ikigega FARG gitera inkunga abacitse ku icumu rya jenoside batishoboye, VUP n’ubudehe mu rwego rwo kuzamura imibereho y’ibindi byiciro by’abanyarwanda bakiri mu bukene.

Guverinoma y’u Rwanda ikomeje gahunda yo kwita ku byiciro byihariye by’abanyarwanda bafite ibibazo by’umwihariko mu mibereho yabo nabyo nk’abafite ubumuga, n’ibindi. Ku birebana n’ubuzima bwo mu mutwe, hashyizweho politiki n’inzego zihariye zo guhangana n’ibibazo by’ubuzima bwo mu mutwe.

Birumvikana ko ibikorwa n’ingamba bivuzwe haruguru ndetse n’ibindi tutarondoye, byabaye ishingiro mu gusubiza abantu mu buzima busanzwe no kubaka iterambere mu muryango nyarwanda.

Nyamara imibare yavuzwe haruguru iratwereka ko kubaka umuntu w’imbere washegejwe n’ibikomere by’umutima n’ihungabana bikomoka kuri Jenoside n’urundi ruhererekane rw’ihutazazwa ry’uburenganizira bwa muntu byaranze amateka y’urwanda kuva mu bihe by’ubwigenge, harimo ubuhunzi, politiki zivangura n’iziyobya abaturage, bisaba umwihariko kandi mugihe kirekire.

Ibyo birasaba ingamba n’ubushobozi byihariye byiyongera ku bisanzwe kugirango umuryango nyarwanda uhangane kande ukumire ibibazo birebana n’agahinda gakabije, ihungabana n’ibindi bikomere byo ku mitima.

Ubushakashatsi butandukanye harimo n’ubwakozwe n’umuryango Never Again Rwanda, bwagaragaje uburyo butandukanye kandi bwuzuzanya bwo guherekeza abafite ibikomere byo ku mutima n’ihungabana.

Uretse uburyo bukoreshwa kwa muganga buzwi ku izina rya counseling, hari n’uburyo bw’amatsinda mato afasha abayarimo kuganira ku byabakomerekeje no gusohora ibyiyumviro bibagoye, bityo bakubaka ubushobozi bwo kudaherenwa n’agahinda no kongera kugira uruhare mu mibanire n’abandi ndetse n’iterambere ryabo.

N’ubwo byagaragaye ko ubu buryo bushobora gufasha umuryango nyarwanda guhangana n’ibibazo by’ihungabana, ubushakashatsi bwagaragaje ko uburyo bw’amatsinda bufasha abantu bubasanze ku misozi batuyeho bukiri buke kandi n’ababukoresha ari bake, abakoresha ababifitemo ubumenyi nabo baracyari bake ndetse n’aho bukorerwa ntabwo hujuje ibisabwa.

Kugirango abanyarwanda benshi bakeneye ubufasha no guherekezwa mu rugendo rwo gukira ibikomere, agahinda gakabije n’ihungabana ndetse no gukumira uruhererekane rwabyo mu bakiri bato bishoboke, hanakenewe ubufatanye n’imikoranire ihamye hagati y’inzego zitandukanye harimo minisiteri y’ubuzima inafite ubuzima bwo mu mutwe mu nshingano zayo, komisiyo y’ubumwe n’ubwiyunge, komisiyo yo gukumira no kurwanda Jenoside, abashakashatsi n’abahanga kubirebana n’ubuzima bwo mu mutwe, abanyamadini ndetse n’imiryango itari iya leta ikora mu bijyanye no kubaka amahoro no komora ibikomere.

Ubu bufatanye buzafasha kunoza ingamba n’uburyo bukoreshwa, gushyiraho gahunda zihariye ndetse no kubaka ubushobozi bwo gusuzuma mu buryo buhoraho imiterere y’ibijyanye n’ubuzima bwo mu mutwe mu Rwanda.

U Rwanda kandi rukwiye kwita cyane ku cyiciro cy’abakiri bato n’urubyiruko harimo n’abakiri mu mashuri kugirango hakumirwe hakiri kare uruhererekane rw’ibikomere.

Kugirango umuryango nyarwanda ubashe kubaka ubushobozi bwo guhangana n’ikibazo cy’ibikomere, ihungabana n’ibindi bibazo by’ubuzima bwo mutwe, hakenewe ubushakashatsi n’ibiganiro bihoraho ku ihungabana, ibikomere n’uburyo bwo guhangana nabyo, kugirango hakumirwe ko mu gihe kizaza uruhererekane rwabyo.

Ibyo biganiro bizafasha kunoza imikorere imikoranire hagati y’abafasha mu by’ihungabana mu bitaro by’uturere n’abandi bafatanya bikorwa bavuzwe haruguru, kugirango bahane imbaraga, ubumenyi n’ amakuru maze barusheho kunoza uburyo bukoreshwa kandi abanyarwanda batinyuke guhangana n’ibibazo by’ubuzima bwo mu mutwe, gukoresha uburyo bwabugenewe, kugirango twubake umunyarwanda utekanye muri byose.

Kwifashisha amatsinda ni bumwe mu buryo bwo guhangana n'ihungabana
Abanyarwanda bahanganye n'ihungabana baracyari benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza