00:00:00 IGIHE NETWORK KN KINYARWANDA EN ENGLISH FR FRANCAIS

Ingabo zo mu Karere zashimiwe umusanzu wazo mu guhangana na Covid-19

Yanditswe na Ntabareshya Jean de Dieu
Kuya 17 February 2022 saa 04:25
Yasuwe :

Mu nama yahuje abahagarariye Ibikorwa by’Ubuvuzi mu Ngabo zo mu bihugu bitandukanye byo muri Afurika y’Iburasirazuba hashimwe umusanzu zatanze mu bikorwa bigamije guhangana n’icyorezo cya Covid-19.

Hashize igihe kitari gito Covid-19 igeze ku Isi. Iki cyorezo cyakangaranyije Isi yose n’ibihugu byo mu Karere ka Afurika nticyabyoroheye.

Ahagana mu mpera za 2019 ni bwo Covid-19 yabonetse bwa mbere mu Mujyi wa Wuhan mu Bushinwa. Icyo gihe hakozwe ibikorwa byinshi bigamije kuyikumira no guhangana nayo birimo gupima, gufata ingamba zikomeye no gukingira.

Inzego z’umutekano zabaye ku ruhembe mu bikorwa bitandukanye birimo no gukwirakwiza inkingo hirya no hino mu bihugu hagamijwe ko buri muturage agerwaho n’inkingo.

Kuri uyu wa Kane, tariki ya 17 Gashyantare 2022, i Kigali hateraniye inama yahuje abayobozi bakuru bahagarariye ibikorwa by’ubuvuzi mu gisirikare mu bihugu bigize Afurika y’Iburasirazuba igamije kurebera hamwe ibikorwa abasirikare bagizemo uruhare mu bihe bya Covid-19 n’ingamba zikomeje gufatwa mu guteza imbere ibikorwa by’ubuvuzi muri aka karere.

Umuyobozi Mukuru muri Minisiteri y’Ingabo ushinzwe Igenamigambi, Maj Gen Ferdinand Safari, wafunguye ku mugaragaro iyi nama y’iminsi ibiri yagaragaje ko ingabo zakoze akazi gakomeye mu rugamba rwo guhangana na Covid-19.

Yakomeje agira ati “Twese turabizi ko ibihombo byatewe na Coronavirus byongereye imyiteguro ku guhangana n’indwara zandura ndetse n’ibindi bikorwa by’ubuvuzi. Turabizi kandi ko ingabo zishobora guhangana n’ikwirakwira ry’indwara zandura ariko ibyo bisaba ubufatanye. Gukorera muri ubu buryo bugoye binyuze mu mbaraga zacu bishobora guhagarika ibyago byo kwiyongera kw’indwara zo mu mutwe n’ihungabana.”

Yavuze ko bisaba ubufatanye buhambaye mu kubakira ubushobozi Ishami ry’Ubuvuzi mu Gisirikare mu rwego rwo kujya rubasha guhangana no gufata ingamba zikwiye mu gukumira indwara.

Yakomeje ati “Gukorana no guhana amakuru mu bihugu binyamuryango ni kimwe mu bizava muri iyi nama kugira ngo tube twiteguye uyu munsi n’ejo hazaza guhangana n’imbogamizi izo ari zo zose. Iyi ni intambwe nziza igiye kutuyobora twibaza ngo ni ryari, hehe, cyangwa gute twakoresha imbaraga zacu mu kubaka ubuvuzi bukomeye?”

Umuyobozi w’Ibikorwa by’Ubuvuzi mu Ngabo za Kenya akaba na Chairman w’iyi nama, Brigadier (Dr) Milton Achieng Obilo, yabwiye IGIHE ko iyi nama yitezweho gushakira hamwe igisubizo kirambye ku guteza imbere ubuvuzi mu Karere ka Afurika y’Iburasirazuba.

Dr Milton Obilo yashimangiye ko urebye ibikorwa by’ingabo mu bihe byo guhangana n’icyorezo cya Covid-19 ari byinshi bityo ko umusanzu wazo wagiye ugaragarira buri wese.

Yemeje ko muri iyi nama hashobora gufatirwamo ibyemezo byateza imbere ubuvuzi bwa gisirikare muri Afurika y’Iburasirazuba mu minsi iri imbere.

Iyi nama yitabiriwe n’abaturutse mu bihugu by’u Burundi, u Rwanda, Tanzania, Uganda, Kenya na Sudani y’Epfo.

Urebye uruhare rw’ingabo mu bikorwa byo guhangana na Covid-19 usanga rufatika nko ku ruhande rw’u Rwanda ubwo ibikorwa byo gukwirakwiza inkingo hirya no hino yatangiraga hifashishijwe indege za gisirikare mu kuzigeza mu bice by’icyaro ibintu bishimangira uruhare rw’ingabo mu kuyihashya.

Iyi nama yitezweho gufatirwamo ingamba zigamije guteza imbere ubuvuzi muri EAC
Maj Gen Ferdinand Safari yagaragaje ko mu bihe by'icyorezo cya Covid-19 ingabo zatanze umusanzu ufatika
Abayobozi bakuru bashinzwe ibikorwa by'ubuvuzi mu ngabo bateraniye i Kigali mu nama izamara iminsi ibiri
Iyi nama yitabiriwe n'abaturutse mu bihugu bitandatu bya Afurika y'Iburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .