Umujyi wa Kigali watangije ubukangurambaga bwo kurwanya indwara zitandura

Yanditswe na Tombola Felicie
Kuya 16 Gicurasi 2019 saa 09:08
Yasuwe :
0 0

Umuyobozi w’Umujyi wa Kigali, Rwakazina Marie Chantal, yatangaje ko igihugu ndetse n’Umujyi wa Kigali gikeneye abaturage bafite ubuzima bwiza kuko aribo batanga umusaruro wifuzwa.

Yabigarutseho ku wa 14 Gicurasi 2019 ku Kigo Nderabuzima cya Remera mu Karere ka Gasabo, ubwo yatangizaga ubukangurambaga bw’iminsi irindwi bwo kurwanya indwara zitandura.

Kuva mu 2016, ubu bukangurambaga bwagiye bubaho ku bufatanye bwa Minisiteri y’Ubuzima, Ikigo cy’Ighugu cy’Ubuzima, RBC, ndetse n’Ikigo cy’Iterambere mu Bubiligi cyitwa Enabel.

Rwakazina yavuze ko u Rwanda rwifuza umuturage ufite ubuzima bwiza kuko ariwe utanga umusaruro uganisha ku iterambere.

Ati “Kwisuzumisha hakiri kare ni byiza kuko umuntu aba afite amahirwe yo kuzikira, izi serivisi twazegereje ku bigo nderabuzima kuko nibwo biborohera, kugira ngo umuturage tumusange hafi, abantu baze ari benshi.”

Indwara zirimo gusuzumwa ku buntu ni diabète, umuvuduko w’amaraso ndetse no gupima ibiro ngo umuntu amenye ko afite ibijyanye n’uburebure bwe.

Umuyobozi Mukuru w’Ikigo cy’Igihugu cy’Ubuzima (RBC), Dr.Condo Umutesi Jeanine, yavuze ko ikigenderewe cyane ari ugushishikariza abantu kwisuzumisha, bagafata ingamba zo kwirinda kuko ikiguzi cyo kuvura izi ndwara gihenze.

Ati “Amafaranga agenda mu kuvura indwara zitandura ni menshi, icyo dukangurira abanyarwanda ni ukwirinda, bituma umenya uko uhagaze ugafata ingamba. Hari nk’abantu baba bafite ibibazo by’umuvuduko ukabije w’amaraso bakwisuzumisha bagafata ingamba bakongera bakamera neza.”

Mu Rwanda, Ubushakashatsi bwakozwe n’Ikigo cy’Igihugu cy’Ubuzima ku ndwara zitandura mu 2013 bwagaragaje ko 2.8% bafite umubyibuho ukabije,14.3% bafite ibiro byinshi bitajyanye n’uko bareshya naho 7.8% bafite ibiro biri munsi y’ibyo bakabaye bafite.

Bwagaragaje kandi ko ibibazo by’umubyibuko ukabije byiganje ku bantu bari hagati y’imyaka 35-54, muri bo abagore bakaba bagize 4.7%.

Ikindi ni uko ibibazo by’umubyibuho ukabije biri cyane mu mijyi ku kigero cya 10.2%. Ubwo bushakashatsi bwagaragaje ko 15% basanganywe umuvuduko ukabije w’amaraso, kandi ku bantu bari hagati y’imyaka 55 na 64 byiyongera ku kigero cya 40%.

Mu 2016 abitabiriye ubu bu bukangurambaga bwo kurwanya indwara zitandura bari 3606, mu 2017 bagera ku 2147 naho mu 2018 baba 5614.

Umuyobozi w'Umujyi wa Kigali, Rwakazina Marie Chantal, nawe yisuzumishije indwara zitandura
Umuyobozi w'Ikigo cy'Igihugu cy'Ubuzima, Dr Condo Jeanine, nawe yisuzumisha indwara zitandura
Uwo bamaze gupima bamugira n'inama ku myitwarire akwiye kugira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza