00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi: Gukoresha paracetamol kenshi bishobora gutera indwara z’umutima na ’stroke’

Yanditswe na Dufitumukiza Salathiel
Kuya 9 February 2022 saa 04:46
Yasuwe :

Abashakashatsi bo muri Kaminuza ya Edinburg muri Ecosse bagaragaje ko gukoresha kenshi ibinini bya paracetamol bishobora kongera umuvuduko w’amaraso, ukaba intandaro y’ibyago byo kurwara umutima n’indwara ifata udutsi two mu bwonko izwi nka "stroke".

Ni nyuma y’inyigo bakoreye ku bantu 110; muri bo 2/3 bafataga imiti kuko bafite ikibazo cy’umuvuduko w’amaraso. Basabye buri wese gukoresha garama imwe ya paracetamol, inshuro enye ku munsi mu gihe cy’ibyumweru bibiri. Iyo ni yo ngano y’umuti abafite uburibwe bukomeye basanzwe bandikirwa.

Nyuma y’aho bamaze ibindi byumweru bibiri bakoresha ibinini bitavura neza (placebo) byifashishwa mu bushakashatatsi.

Umwe mu bakora ubushakashatsi ku miti muri Kaminuza ya Edinburg, Prof James Dear, yavuze ko iyo nyigo yerekanye ko paracetamol zongereye umuvuduko w’amaraso.

Yakomeje ati "[Umuvuduko w’amaraso] ni imwe mu mpamvu zikomeye cyane zongera ibyago byo kurwara umutima na ’stroke".

Ibinini bya paracetamol bikoreshwa ku Isi yose, nk’umuti wo kuvura uburibwe bw’akanya gato ariko hari n’ababikoresha ku buribwe bw’akarande.

Abashakashatsi bakoze iyo nyigo batanze inama ko abaganga bakwiye kuzajya bandikira abarwayi ingano ya paracetamol ntoya ishoboka ku bivuza uburibwe bw’akarande, kandi bagakurikiranira hafi abafite umuvuduko w’amaraso uri hejuru n’abagaragaza ibyago byo kurwara umutima.

Ku rundi ruhande, Dr Iain Maclntyre, wayoboye ubwo bushakashatsi yavuze ko izo mpungenge "zitari kuri paracetamol zikoreshwa by’igihe gito bavura uburibwe bw’umutwe n’umuriro kuko zo zikiza neza kandi nta kibazo ziteza".

Umwe mu bashakashatsi bo muri Kaminuza ya Londres, Dr Dipender Gill, yavuze ko ibyavuye muri iyo nyigo bifite icyo bivuze nubwo ari ntoya, ariko ko hari byinshi bitarasobanuka ku buryo hakenewe ubundi bushakashatsi bwimbitse.

Umuryango w’abagiraneza wita ku barwaye "stroke" mu Bwongereza, Stroke Association, wagaragaje ko hagikenewe kwerekana akamaro n’ingaruka zo gukoresha paracetamol by’igihe kirekire ku badafite ikibazo cy’umuvuduko w’amaraso.

Umuryango w’Abongereza ukora ubushakashatsi ku ndwara z’umutima, British Heart Foundation, ni wo wateye inkunga iyo nyigo. Wavuze ko abaganga n’abarwayi bagombye guhora batekereza niba nta bundi buvuzi bwakoreshwa butagira ingaruka nk’iza paracetamol mu gihe zikenewe.

Umuryango Versus Arthritis wita ku barwaye “arthritis” [indwara ifata aho amagufa ahuriye hakabyimba] iri mu zitera uburibwe bw’akarande; uherutse kuvuga ko hakenewe imiti itekanye kurushaho, kimwe n’ubundi bufasha burimo ubujyanye n’ubuzima bwo mu mutwe!

Uretse iyi nyigo y’Abongereza, hari ubundi bushakashatsi bwakozwe n’Abanyamerika bugaragaza ko hari isano iri hagati y’uburwayi bw’umutima no gukoresha paracetamol ariko ntibwagaragaza niba ari yo mpamvu koko.

Paracetamol zari zisanzwe zigaragazwa nk’aho ari zo zitekanye ugereranyije n’indi miti ikiza uburibwe nka ibuprofen, ku kuba yatuma abayikoresha bagira umuvuduko w’amaraso uri hejuru.

Ubushakashatsi bwerekanye ko gukoresha Parecetamol kenshi bishobora gutera indwara z'umutima na 'stroke'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .