Ubufasha buhabwa umugore utwite igihe inkondo y’umura yifunguye imburagihe

Yanditswe na David Eugène Marshall
Kuya 18 Ukwakira 2018 saa 10:16
Yasuwe :
0 0

Inkondo y’umura ni itangiriro cyangwa ubwinjiro bw’umura w’umugore, bugomba guhora bufunze igihe atwite kugeza igihe azaba agiye kubyara.

Iyo bitagenze bityo, ingorane ziba ari zose zo gukuramo inda cyangwa kubyara umwana utagejeje igihe.

Dr Uwiragiye Norbert wo mu bitari bya La Croix du Sud mu Mujyi wa Kigali, yasobanuriye IGIHE ko ukwifungura kw’inkondo y’umura imburagihe ari ikibazo gikomeye ku mugore utwite, cyigaragaza akenshi ku nda itarengeje amezi atatu.

Inkondo y’umura ifite uruhare runini mu kurinda ko hari uburwayi bwavogera umura bigatera ikibazo umwana uri munda, n’umura ubwawo.

Umura ufunze neza kandi utuma umwana uri munda agumamo nta kibazo, ndetse n’agasaho kabitse amazi umwana aba azengurukamo mu nda, kagasugira kagasagamba.

N’ubwo impamvu nyamukuru zituma umura wifungura imburagihe zitavugwaho rumwe mu buvuzi, urubuga Doctissimo rwandika inkuru z’ubuzima, rugaragaza zimwe mu z’ingenzi.

Zirimo kuremara k’umura umuntu ashobora kuba yaravukanye cyangwa ingaruka zo gukuramo inda ku bushake kwa hato na hato bitakozwe neza.

Dr Uwiragiye avuga ko abaganga bashobora kumenya imiterere y’inkondo y’umura bakoresheje ibyuma nka échographe. Iyo umugore yipimishije mu mezi atatu ya mbere bagasanga afite iki kibazo, arafashwa kandi ntibimugireho ingaruka.

Ati “Uwo dusanze afite icyo kibazo tumukorera ubuvuzi buzwi nka ‘Cerclage du col’, ugenekereje ni kudoda umuzenguruko w’inkondo y’umura tugapfundika urudodo, ku buryo imera nk’ifunze, urwo rudodo rukurwamo agiye kubyara.”

Iki gikorwa ariko ngo gishoboka kunda ziri munsi y’amezi atatu.

Bitewe n’amahitamo y’abaganga, ku nda irengeje amezi ane umubyeyi ashobora gutegekwa kuryama acuramyeho gake, igihe cyose azamara atwite, cyangwa akagirwa inama yo kubikora atyo ariko atari buri gihe.

Mu gihe inda yaba irengeje amezi atandatu, abaganga bashobora kubyaza umugore umwana udakuze, igihe gisigaye umwana akarerwa mu buryo bwabugenewe hifashishijwe ibyuma byo kwa muganga bizwi nka ‘Couveuse’.

Iyo umugore agize ikibazo cyo kwifungura kw'inkondo y'umura akiri mu gihembwe cya mbere, hari ubwo ishyirwaho urudodo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza