U Rwanda rurasuzuma niba urukingo rwa Malaria rwakwifashishwa mu kuyihashya

Yanditswe na Evariste Nsengimana
Kuya 22 Mata 2019 saa 09:48
Yasuwe :
0 0

Guverinoma y’u Rwanda yatangaje ko irimo gusuzuma niba urukingo rw’indwara ya malaria rufite akamaro kandi rukenewe cyane mu Rwanda, ku buryo rwakwifashishwa mu gukumira ubwiyongere bw’iyo ndwara.

Mu 2016 nibwo Ishami ry’Umuryango w’Abibumbye ryita ku Buzima (OMS), ryemeje urukingo rwa malaria ruzwi nka RTS, S, rwakozwe n’ikigo cy’Abongereza gikora imiti n’inkingo ‘GlaxoSmithKline’.

Uru rukingo nirwo rwa mbere rwa malaria rwakozwe rwemezwa nyuma yo kugeragerezwa inshuro eshatu ku bana 15 000 bo muri Tanzania, Burkina Faso, Gabon, Ghana, Kenya, Malawi na Mozambique.

Rufite ubushobozi bwo guhangara bikomeye udukoko twa Plasmodium falciparum dutera indwara ya malaria cyane ku Isi, by’umwihariko muri Afurika, byagaragaye ko rushobora gutuma abana 4/10 batayirwara.

Rugomba gutangwa inshuro enye buri kwezi mu gihe cy’amezi atatu maze urwa nyuma rugatangwa nyuma y’amezi 18.

Mu nama yabereye i Nairobi muri Kenya ku wa 24 Mata 2017, OMS yatangaje ko urwo rukingo ruzatangira gutangwa mu 2018 muri Ghana, Kenya na Malawi, rugahabwa abana basaga ibihumbi 750 mu gihe cy’imyaka ibiri.

Kuri uyu wa 22 Mata 2019, ubwo i Kigali hateraniraga inama ihuje abafite mu nshingano kurwanya Malaria muri Afurika y’Iburasirazuba na Repubulika Iharanira Demokarasi ya Congo, Minisitiri w’Ubuzima, Dr. Diane Gashumba yavuze ko u Rwanda ruri gusuzuma niba uru rukingo rwakwifashishwa.

Ati “Turacyabisuzuma [Niba rwatangira gukoreshwa] kugira ngo turebe aho bigeze, turebe akamaro kabyo. Nitubona ko ari ngombwa natwe iyo gahunda tuzayinjiramo.”

Malaria yikuba hafi inshuro enye hagati ya 2012 na 2017, kubera impamvu zitandukanye zirimo imihindagurikire y’ikirere, kwiyongera ku ibipimo by’ubushyuhe, kwiyongera kw’imvura n’imibu yagiye ihindura imiterere bigatuma imiti yakoreshwaga itabasha guhangana nayo uko bikwiye.

Abarwaye malaria yoroheje bavuye kuri miliyoni imwe mu 2012 bagera kuri miliyoni 4,5 mu 2016 mu gihe abarwaye iy’igikatu bavuye 9,000 bagera ku bihumbi 17.

Hagati ya 2016 na 2017, abayirwaye muri rusange bagabanutseho ibihumbi 430 naho hagati ya 2017 na 2018 bagabanukaho ibihumbi 700.

Minisante igaragaza ko abarwaye malaria y’igikatu bavuye ku bihumbi 17 mu 2016 bakagera ku bihumbi birindwi mu 2018 naho abo yishe bavuye kuri 700 mu 2016 bagera kuri 300 mu 2018.

Raporo ya 2018 y’Ishami ry’umuryango w’Abibumbye ryita ku buzima, OMS, igaragaza ko mu 2017 abantu basaga miliyoni 219 bo mu bihugu 59 barwaye malaria mu gihe umwaka wawubanjirije bari miliyoni 217.

Igaragaza kandi ko mu 2017 iyo ndwara yishe abarenga ibihumbi 435 mu gihe mu 2016 barengaga ibihihumbi 451.

Minisitiri Gashumba aganira n'umwe mu bitabiriye inama
Minisitiri Gashumba avuga ko u Rwanda rugisuzuma niba rwakoresha urukingo rwa Malaria
Iyi nama yitabiriwe n'abaturutse muri EAC na RDC
U Rwanda rurasuzuma niba urukingo rwa Malaria rwaba rufite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza