00:00:00 IGIHE NETWORK KN KINYARWANDA EN ENGLISH FR FRANCAIS

Rwanda FDA igiye guhabwa miliyoni 2 z’amayero zizafasha kunoza imikorere yayo

Yanditswe na Mugisha Christian
Kuya 23 June 2022 saa 02:18
Yasuwe :

Ikigo cy’Igihugu Gishinzwe kugenzura Ubuziranenge bw’Ibiribwa n’Imiti (Rwanda FDA) kigiye gushyikirizwa miliyoni ebyiri z’amayero binyuze mu masezerano cyagiranye n’Umuryango w’Ibihugu by’u Burayi, European Union, azafasha mu kurushaho kunoza imikorere yacyo.

Nk’uko biri muri gahunda ya Leta y’u Rwanda yo gutangira gukora inkingo, aya mafaranga azafasha kongera ubushobozi bwo kugenzura ubuziranenge bw’inkingo, aho zizakorerwa n’uko zizakorwa hashingiwe ku bipimo mpuzamahanga.

Ibi byatangajwe mu muhango wo gusinya amasezerano y’ubufatanye hagati y’uyu muryango na Rwanda FDA kuri uyu wa Gatatu tariki 22 Kamena 2022 ku cyicaro gikuru cy’iki kigo.

Azamara imyaka ine, yashyizweho umukono na Ambasaderi w’Umuryango w’Ubumwe bw’Ibihugu by’i Burayi mu Rwanda, Nicola Bellomo; Ambasaderi w’u Bufaransa mu Rwanda, Antoine Anfré; Minisitiri w’Ubuzima mu Rwanda, Dr Daniel Ngamije n’Umuyobozi Mukuru wa FDA, Dr Emile Bienvenu.

Aya masezerano kandi agiye gutuma ibigo by’ubugenzuzi mu bihugu nk’u Bufaransa, u Budage, u Bubiligi na Lithuania bigirana imikoranire ya hafi na Rwanda FDA mu kurushaho kunoza imigenzurire y’imiti n’inkingo bizajya bikorerwa mu gihugu imbere.

Nk’uko bitangazwa n’Umuyobozi Mukuru wa FDA, Dr Emile Bienvenu, ubu bufatanye buzazamura ubumenyi n’ubushobozi bw’abakozi b’ikigo ayoboye mu kugenzura uko inkingo zikorwa no kongera ubushobozi muri laboratwari ishinzwe ubugenzuzi bw’izo nkingo.

Yagize ati “Hari ikindi gikomeye ubu bufatanye buzatugezaho ari cyo kumenya uko izo nkingo zizajya ku isoko mpuzamahanga, kumenya ingaruka imiti muri rusange n’inkingo bizagira ku bbaifashe n’ibindi.”

FDA yashyikirijwe kandi ibikoresho bya laboratwari bigezweho bizayifasha kugenzura umutekano n’ubuziranenge by’imiti n’inkingo bizaba bikorerwa mu Rwanda.

Ambasaderi Nicola Bellomo yavuze ko intego ari ugufasha u Rwanda kuba kimwe mu bihugu bifite ubushobozi bwo gukora inkingo ku Isi.

Ati “Nk’Umuryango w’Ubumwe bw’Ibihugu by’i Burayi tunejejwe n’intambwe u Rwanda rukomeje gutera ndetse n’imbaraga rushyira mu guteza imbere ubuvuzi haba muri Afurika cyangwa ku Isi hose. Iyi mikoranire izatuma byinshi bigerwaho.”

Bimwe mu bihugu bigize uyu muryango bizakorana bya hafi na Rwanda FDA byiyemeje ubufatanye harimo kohereza impuguke mu bijyanye n’inkingo, gutegura amahugurwa n’ingendoshuri ku Banyarwanda ku buryo mu myaka itanu iri imbere bazaba bifitemo ubumenyi n’ubushobozi buhagije bwo gukora imiti n’inkingo.

Ambasaderi w’u Bufaransa mu Rwanda, Antoine Anfré, yavuze ko u Rwanda rufite ubushobozi buhagije bwo kugira uruganda rw’inkingo akaba ari yo mpamvu igihugu cye cyiteguye gutanga inkunga yacyo kugira ngo rubigereho.

Minisitiri w’Ubuzima, Dr Daniel Ngamije, yavuze ko aya masezerano agiye kuzamura imikorere ya Rwanda FDA ndetse azashyigikira intego Leta y’u Rwanda yihaye.

Yagize ati “Ibi bigiye kudufasha muri gahunda twari dufite yo gushyiraho ibisabwa byose kugira ngo tubashe kubona uko twakurura abashoramari mu bijyanye n’inganda zikora imiti kugira ngo ibe yakoherezwa mu mahanga tubifashijwemo n’impuguke zizaturuka muri biriya bihugu.”

Mu gitondo cyo kuri uyu wa Kane nibwo hashyizwe ibuye ry’ifatizo ahazubakwa uruganda rukora imiti n’inkingo mu cyanya cyahariwe inganda mu Mujyi wa Kigali mu Karere ka Gasabo.

Ambasaderi w’Umuryango w’Ubumwe bw’ibihugu by’i Burayi mu Rwanda, Nicola Bellomo [iburyo] na Ambasaderi w’u Bufaransa mu Rwanda, Antoine Anfré [ibumoso] bashyiira umukono ku masezerano
Umuyobozi Mukuru wa FDA, Dr Emile Bienvenu, ashyira umukono ku masezerano
Ikigo cy’Igihugu Gishinzwe kugenzura ubuziranenge bw’ibiribwa n’imiti, Rwanda FDA, cyagiranye amasezerano y'imikoranire n'Umuryango w’Ibihugu by’u Burayi, European Union, mu rwego rwo kunoza imikorere yacyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .