Minisitiri Gashumba yashyizwe muri Nyobozi y’Ihuriro mpuzamahanga ryo kurwanya Malaria

Yanditswe na Evariste Nsengimana
Kuya 5 Ugushyingo 2019 saa 01:16
Yasuwe :
0 0

Ihuriro Mpuzamahanga ryo kurwanya malaria [RBM Partnership to End Malaria] ryatangaje ko ryashyizeho abayobozi bashya barimo Minisitiri w’Ubuzima mu Rwanda, Dr Gashumba Diane n’umujyanama mu kigega mpuzamahanga gitera inkunga ibikorwa byo kurwanya Sida, igituntu na Malaria ’Global Fund’, Dr Marijke Wijnroks.

Iri huriro ryatangaje ko ryashyizeho aba bayobozi bashya kuri uyu wa 4 Ugushyingo 2019.

Umuyobozi w’inama y’ubutegetsi y’iri huriro, Prof Maha Taysir Barakat, yavuze ko bishimishije kwakira aba bayobozi muri iri huriro kandi ko bitezweho byinshi mu rugamba rwo guhashya malaria no guteza imbere urwego rw’ubuvuzi muri rusange.

Ati “Tunejejwe no kwakira abayobozi bashya b’abagore muri Nyobozi y’ihuriro mpuzamahanga mu kurwanya Malaria bafite ubunararibonye atari mu kurandura malaria gusa ahubwo no mu gushyigikira urwego rw’ubuvuzi no gushyiraho ingamba zishingiye ku buringanire.”

Yakomeje agira ati “Twishimiye gukorana na Nyakubakwa Minisitiri Gashumba na Dr Marijke Wijnroks mu myaka iri imbere mu kongera imbaraga zo kurandura Malaria.”

Umuyobozi mukuru wa RBM Partnership to End Malaria Dr Abdourahmane Diallo, yavuze ko Malaria ari indwara ishegesha ibihugu byinshi ku Isi, ariko kugira ubuyobozi bwiza ari imwe mu ntwaro zo kuyihashya.

Ati “Twiteze kwigira byinshi ku mpinduka n’amavugurura y’urwego rw’ubuzima mu Rwanda, rumaze kugera kuri byinshi mu kugabanya ingaruka z’indwara ya malaria no kwegerenya ibikenewe mu buvuzi bw’imbere mu gihugu no guhuza abafatanyabikorwa bacu muri Global Fund isigaye ari isoko ikomeye y’amafaranga ashyirwa mu bikorwa byo kurwanya malaria.”

Minisitiri Gashumba washyizwe muri nyobozi y’iri huriro yahawe kuyobora Minisiteri y’Ubuzima guhera muri 2016 avuye muri Minisiteri y’Uburinganire n’Iterambere ry’Umuryango.

Raporo iheruka gutangazwa n’Ishami ry’Umuryango w’Abibumbye ryita ku buzima (OMS) yagaragaje ko mu Rwanda abarwaye malaria yoroheje bavuye kuri miliyoni imwe mu 2012 bagera kuri miliyoni 4,5 mu 2016 mu gihe abarwaye iy’igikatu bavuye 9,000 bagera ku bihumbi 17.

Iyi raporo igaragaza ko u Rwanda rwashyize imbaraga mu bikorwa byo kurwanya malaria bigaragaza impinduka zifatika kuko hagati ya 2016 na 2017, abayirwaye muri rusange bagabanutseho ibihumbi 43o naho hagati ya 2017 na 2018 bagabanuka ibihumbi 700.

Bimwe mu bituma imibare y’abayirwaye igabanuka mu Rwanda harimo umuhate ushyirwaho n’abaturage n’abafatanyabikorwa muri gahunda zo kurwanya malaria, kongera amafaranga yifashishwa, guhugura abajyanama b’ubuzima mu kuyivura, gutanga inzitiramubu, gutera imiti yica imibu mu ngo n’ahandi hari indiri y’imibu itera malaria, kubungabunga ibidukikije n’ibindi.

Ikigo cy’ubuzima mu Rwanda (RBC) kigaragaza ko hejuru ya 50% by’abarwaye malaria bavurwa n’abajyanama b’ubuzima batiriwe bagera kwa muganga. Gahunda yo kuvurira malaria abana n’abakuru mu miryango bikozwe n’abajyanama b’ubuzima ni imwe mu zifasha kuyivuza hakiri kare.

Minisitiri Gashumba yashyizwe muri Nyobozi y'ihuriro ryo kurwanya Malaria

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza