00:00:00 IGIHE NETWORK KN KINYARWANDA EN ENGLISH FR FRANCAIS

Minisante yijeje Abanyarwanda ko yiteguye guhangana n’indwara y’ubushita bw’inguge

Yanditswe na Kanamugire Emmanuel
Kuya 1 June 2022 saa 05:57
Yasuwe :

Minisiteri y’Ubuzima yatangaje ko yiteguye guhangana n’indwara y’ubushita bw’inguge (Monkeypox) mu gihe yaba igaragaye ku butaka bw’u Rwanda.

Ishami ry’Umuryango w’Abibumbye ryita ku Buzima, OMS rivuga ko ibipimo byo muri za laboratwari bigaragaza ko abantu bagenda bandura ari benshi hirya no hino ku Isi hakaba hari n’abandi bikekwa ko banduye.

Muri Nigeria byatangajwe kuri uyu wa Kabiri, Ikigo gishinzwe kurwanya Indwara z’Ibyorezo muri Nigeria cyatangaje ko umuntu wa mbere yishwe n’iyi ndwara ndetse kuva uyu mwaka wa 2022 watangira, abantu 21 bamaze kwandura.

Umuvugizi wa Minisiteri y’Ubuzima mu Rwanda, Julien Mahoro Niyingabira, yatangaje ko kugeza ubu nta muntu n’umwe biragaragara ko yanduye iyi ndwara ariko abaturage bakwiye gukomeza kwirinda.

Yagize ati “Ntabwo hano mu Rwanda turayigira ariko ntabwo bibujijwe ko abantu bakomeza gufata ingamba zo kwirinda kwegerana n’inyamaswa, kuzikoraho cyangwa gukora ku matembabuzi yazo kimwe no kwirinda izigaragara nk’aho zirwaye kuko bizwi ko iyi ndwara ikomoka ku nyamaswa.”

Yakomeje agira ati “Ubutumwa twarabutanze bugaragaza ko inyamaswa zishobora kwanduza abantu mu gihe zibarumye cyangwa zibariye inzara. Icy’ingenzi ni uko abantu bakomeza kwirinda kandi n’aho byagaragara ko hari ibimenyetso bidasanzwe umuntu afite bakwihutira kumenyesha inzego z’ubuzima kugira ngo zibashe gukurikirana.”

Yongeyeho ko inzego z’ubuvuzi ziteguye kubera Monkeypox gusa ahubwo zifite uburyo bwo gukora ubugenzuzi no kurinda ko habaho gukwirakwira kw’ibyorezo.

Ati “Ntabwo inzego z’ubuzima ziri maso kubera monkeypox gusa, ziri maso kubera indwara iyo ari yo yose ishobora kuba icyorezo kandi ishobora kwinjira mu gihugu, hashyirwaho uburyo bwo kuyipima mu gihe bibaye ngombwa ndetse no gukomeza ubugenzuzi.”

Mu Rwanda rwo hambere, indwara y’ubushita yaragaragaye ndetse bivugwa ko Umwami Mibambwe Sentabyo wategetse mu 1741-1746 ari yo yazize nyuma yo kwanduzwa n’Abanyagisaka, agace yari yarayogoje. Amateka avuga ko hagati y’umwaka wa 1893 na 1894 no mu 1916-1917 ubushita bwongeye kwaduka mu Rwanda buhitana abatari bake.

Ntibizwi ubwoko bw’ubushita bwamuhitanye ubwo ari bwo kuko indwara zose zitera ubuheri bazitaga ubushita nyamara mu buryo bwa siyansi bishoboka ko icyashingiweho kinyuranye n’inkomoko y’indwara ubwayo.

Habaho ubushita bw’imbogo, ubw’injangwe, ubw’inka, imbwa, ihene, ibishuhe, ingamiya, imbeba, inkwavu n’ubundi.

Ubuzwi cyane ku bantu ni ‘smallpox’ buterwa na virusi yitwa Variola.

Urubuga Wikipedia rugaragaza ko mu kinyejana cya 18 mu Burayi abantu bagera ku bihumbi 400 bishwe na smallpox mu mwaka umwe ndetse 1/3 bibaviramo ubuhumyi.

Iyi ndwara bibarwa ko yishe abagera kuri miliyoni 300 mu kinyejana cya 20 na miliyoni 500 mu myaka ijana imaze igaragaye ku Isi.

Monkeypox yandurira mu kuba umuntu wanduye akoranyeho n’undi muzima akamwanduza, amatembabuzi yo mu mubiri, amatembabuzi aturuka mu myanya y’ubuhumekero cyangwa gukora ku bintu byagiyeho virusi nk’imyenda cyangwa ibiryamirwa by’uwanduye.

OMS iherutse gutangaza ko urukingo rwifashishijwe muri gahunda yo kurandura ‘smallpox’ byagaragaye ko rushobora gufasha mu guhangana na ‘monkeypox.’

Ibimenyetso bya monkeypox bimara ibyumweru biri hagati ya bibiri na bine nyuma bikaba bishobora kuzimira. Hari ubwo ishobora kugira ubukana ndetse ikica ku kigero kiri hagati ya 3 na 6 ku ijana.

Guhinda umuriro, kwishima no kugira uduturugunyu ku mubiri biri mu bimenyetso byayo.

Inzego z'ubuvuzi mu Rwanda zivuga ko ziteguye guhangana na monkeypox mu gihe yagaragara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .