Ibyo umubyeyi wonsa akwiye kuzirikana igihe yanduye Coronavirus

Yanditswe na Twarabanye Venuste
Kuya 6 Kanama 2020 saa 10:30
Yasuwe :
0 0

Kuva tariki ya 1 kugeza ku wa 7 Kanama 2020 Isi yose irazirikana icyumweru mpuzamahanga cyahariwe Konsa, cyizihijwe Isi yose yugarijwe n’icyorezo cya Coronavirus.

Mu bimaze kumenyekana harimo ko umubare w’abicwa na Coronavirus ari muto ugereranyije n’abayandura ariko yandura mu byihuse kandi ihitana abanyantege nke n’abasanganywe izindi ndwara.

Mu bakunze kubarwa nk’abanyantege harimo abagore bonsa kuko baba babyaye vuba.

Ese umubyeyi wanduye cyangwa ukekwaho Coronavirus akwiye kwitwara ate mu gihe yonsa umwana we.

Mu kiganiro cyihariye IGIHE yagiranye na Muganga w’abana mu Bitaro byitiriwe Umwami Faisal, Dr. Nkuranga John Baptist, yavuze ko impamvu hashyizweho icyumweru mpuzamahanga cyahariwe konsa ari uko iki gikorwa cyari kigiye kwibagirana kubera iterambere n’inganda zikora ibyo abantu basimbuza amashereka.

Ati “Icyo dushaka kwibukiranya ni ikintu cy’uko amashereka arimo intungamubiri Imana yaremeye umwana. Ni ukuvuga ngo iyo umubyeyi atwite Imana iba yaramuteguriye ubwo buryo bwo kugira ngo azatunge umwana we bityo nta kintu na kimwe gishobora gusimbura amashereka mu gutunga ubuzima bw’umwana.”

Nubwo hari inganda zikora amata zikavuga ko aba yenda gusa n’amashereka, Dr Nkuranga avuga ko ibyo atari byo ahubwo ari uburyo bwo kwamamaza.

Yavuze ko amashereka arimo intungamubiri zose umwana akenera, harimo igice cy’amazi gifasha umwana gushira inyota, ibimurinda indwara n’ibindi byose akeneye kugira ngo akure neza ari nayo mpamvu ababyeyi basabwa kumwonsa nibura amezi atandatu ntacyo bamuvangiye.

Dr Nkuranga avuga ko konsa aribwo buryo bwo kurinda umwana no kumurinda ahazaza.

Ati “Nta kintu gihari ku Isi kiva mu ruganda gikorwa n’umuntu gishobora gusimbura akamaro k’amashereka ku mwana ari nayo mpamvu tubyibutsa ababyeyi kugira ngo babimenye banakoresha ikindi kintu abe azi ko akamaro k’amashereka nta kigasimbura. Amashereka ni indyo yuzuye y’umwana muri ayo mezi atandatu nta kindi aba akeneye kuvangirwa ku mubyeyi wese wabishobora.”

Ku bakunda kubaza abaganga niba ntacyo babavangira nibura amazi, yavuze ko amashereka arimo ibice ku buryo ajya kuza umwana yashize inyota bityo ko adakeneye amazi.

Muri ibi bihe Isi yugarijwe na Coronavirus, yavuze ko umubyeyi wagaragayeho COVID-19 cyangwa uri mu kato adakwiye guhagarika konsa kandi neza ahubwo ngo aho ari hose akwiye gufashwa kubahiriza icyo gikorwa.

Muri rusange ngo akwiye kurushaho kubahiriza amabwiriza yo kwirinda ko yakwanduza umwana ariko agakomeza kumwonsa uko bikwiye kandi n’aho yaba ari mu kato akabifashwamo.

Ati “Iyo umubyeyi agize amahirwe make akandura COVID-19, ntabwo tugira Imana ko umubyeyi ahagarika konsa. Ibihe bya COVID-19 bikomeye ntabwo ari intandaro yo guhagarika imibanire y’abana n’ababyeyi cyangwa guhagarika konsa.”

“Niba bamubwiye ngo wanduye COVID-19 icyihutirwa ni ukuvuga ngo nakora iki kugira ngo nkomeze konsa umwana wanjye neza ntamushyize mu byago byo kwandura. Umubyeyi wonsa ntiyagombye guhagarika konsa umwana mu gihe ari mu kato ahubwo yagombye gufashwa konsa neza, ahabwe uburyo ahabwe iby’ibanze byo kwirinda kugira ngo agabanye ibyago byo kwanduza umwana we igihe yanduye iyo virus.”

Uretse akamaro k’amashereka ku mwana, konsa bifitiye akamaro kanini umubyeyi, harimo kugabanya ibyago byo kurwara kanseri zitandukanye zirimo iy’ibere n’iy’inkondo y’umura.

Umubyeyi wonkeje muri we ngo yumva atuje kandi imibanire ye n’umwana ikiyongera. Usanga ngo bafitanye ubumwe kurusha umubyeyi utonsa uko bikwiye kandi urukundo rukiyongera hagati y’umwana n’umubyeyi.

Isi yose iri mu Cyumweru cyahariwe Konsa cyatangiye ku wa 1 Kanama kizarangirana n’itariki 7 Kanama 2020. Insanganyamatsiko yashyizweho n’Umuryango w’Abibumbye wita ku Buzima ishishikariza ababyeyi “konsa hagamije kubakwa ubuzima bwiza bw’ahazaza ku Isi.’’

Ishami ry’Umuryango w’Abibumbye, OMS rivuga ko konsa neza bishobora kugabanya impfu z’abana zigera ku bihumbi 800 ku mwaka bivuze ngo ababyeyi bose bonkeje uko bikwiye byagabanya izo mpfu.

Konka neza kandi bigabanya indwara zo mu zabukuru zirimo diyabete, ubuhwema n’izindi ziterwa n’umubyibuho ukabije amashereka arazirinda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .