00:00:00 IGIHE NETWORK KN KINYARWANDA EN ENGLISH FR FRANCAIS

Hagaragajwe imbogamizi zigikumira abagore n’abakobwa kubona amakuru na serivise ku buzima bw’imyororokere

Yanditswe na Yvette Balinda
Kuya 22 August 2022 saa 07:27
Yasuwe :

Imiryango itari iya leta n’ abashakashatsi bagaragaje ko hakiri imbogamizi ku bagore n’abakobwa ku kubona amakuru ku buzima bw’imyororokere, basaba ko hongerwa imbaraga.

Babigaragaje mu nama yabaye tariki ya 16 Kanama 2022, ubwo hasuzumwaga raporo yakozwe n’Umuryango nyarwanda utari uwa leta uharanira iterambere ry’umwana urubyiruko n’umugore, Save Generations Organization ku bufatanye na Reseau des femmes Oeuvrant pour le Développement Rural .

Ni raporo igamije kureba ishyirwa mu bikorwa ry’amasezerano nyafurika aharanira uburenganzira bw’umugore n’umukobwa w’Umunyafurika ku buzima bw’imyororokere ageze.

Iyi raporo igamije kureba aho ayo masezerano ageze yubahirizwa, n’imbogamizi zidindiza ishyirwa mu bikorwa ryayo, ibyuho bikigaragara ndetse n’ ibikenewe kugira ngo ishyirwa mu bikorwa rigende neza.

Amasezerano nyafurika aharanira uburenganzira bw’Umugore n’umukobwa w’Umunyafurika yakorewe i Maputo muri Mozambique mu 2003, yashyizweho umukono n’ u Rwanda muri Mutarama 2004.

U Rwanda rwifashe ku ngingo ya 14 igika cya kabiri agace ka C, ivuga ku burenganzira bwo gukuramo inda.

Muri Werurwe 2012 u Rwanda rwakuyeho bwa bwifate ku ngingo ya 14 igika cya kabiri agace ka C, rwemera ko umuntu ashobora gukuramo inda mu gihe yatewe inda ataruzuza imyaka y’ubukure, kuba yarafashwe ku ngufu, yaratewe inda n’ uwo bafitanye isano rya bugufi, kuba inda yamugiraho ingaruka we cyangwa uwo atwite, kuba yarabanishijwe ku gahato n’uwamuteye inda nk’umugore n’umugabo.

Aya masezerano afite umwihariko wo kuvuga ku burenganzira bw’abagore n’abakobwa bo muri Afurika bitewe n’imiterere y’ubuzima bwa buri munsi babayemo.

Mu ngingo ya 26 y’ amasezerano nyafurika ivuga ko Igihugu cyasinye kigomba gutanga Raporo bagaragaza ibyakozwe, ibisigaye gukorwa ndetse n’ imbogamizi.

Iyi raporo ikaba yaribanze by’umwihariko ku ngingo ya 14 y’aya masezerano, yerekeranye n’ uburenganzira ku buzima bw’imyororokere k’umugore n’umukobwa.

Muri iyi ngingo harimo kugira uburenganzira mu kwihitiramo uburyo bwo kuboneza urubyaro, uburenganzira bwo kubona serivise zinoze zu buzima bw’imyororokere, kugira amakuru ku buzima bw’imyororokere, kugira uburenganzira ku bumenyi bw’indwara zandurira mu mibonano mpuzabitsina, kumenyeshwa imimerere y’ubuzima bwabo ndetse n’ubw’uwo bashakanye hakurikijwe amategeko mpuzamahanga.

Mu bindi harimo kwirinda ndetse no kurindwa indwara zandurira mu mibonano mpuzabitsina idakingiye harimo Sida no kubona ubuvuzi ku banduye izo ndwara.
Save Generations Organization na Reseau des Femmes bavuga ko iyi raporo yiswe Shadow Report, yateguwe mu rwego rwo kugira ngo hibukiranye ibitaragaragaye muri raporo isanzwe iriho no kuzuzanya n’isanzwe kugira ngo habeho impinduka mu mategeko n’imitangire ya serivise ku buzima bw’imyororokere n’uburenganzira bw’umugore n’umwana w’umukobwa.

Iyi raporo ikaba yarakozwe hifashishijwe amakuru yavuye mu babyeyi, abana b’abakobwa, abatanga serivise z’ubuvuzi cyane cyane zifitanye isano n’ubuzima bw’imyororokere, abarezi ndetse n’abayobozi b’amadini bo mu turere umunani tw’igihugu turimo Gasabo, Kamonyi, Muhanga, Musanze, Rwamagana, Nyagatare, Gatsibo na Burera.

Muri raporo hagaragajwe imbogamizi zigikumira abagore n’abakobwa kubona amakuru ku buzima bw’imyororokere zishingiye ku mico cyangwa n’imyemerere imwe n’imwe ndetse n’imyumvire ikiri hasi kuri bamwe rimwe na rimwe ugasanga nta ngingo mu mategeko n’izihari zitabivugaho rumwe.

Hari n’ikibazo cy’abana b’abakobwa bataruzuza imyaka y’ubukure badahabwa serivise zo kuboneza urubyaro batari kumwe n’ababyeyi cyangwa se ababarera, nyamara byagaragaye ko bituma batwara inda batateguye mu gihe batahawe izi serivise nkuko babyifuje.

Ibi bituma bakoresha uburyo gakondo butizewe bwo gukuramo inda bubaviramo ingaruka zikomeye ku buzima bwabo ndetse bikaba byabateza n’ibindi byago birimo n’urupfu.

Umuyobozi mukuru wa Save Generations Organisation, Nyinawumuntu Yvette yavuze ko hari byinshi cyane leta yakoze mu guharanira ko umwana w’umukobwa n’umugore babona amakuru na serivisi ku buzima bw’imyororokere

Ati “Hariho ahakiri ibyuho ariko hari byinshi byakozwe mu rugendo tuvuyemo biduha icyizere ko n’ibikirimo inzitizi hari impinduka nziza zitezwe kuko hari imikoranire y’inzego zitandukanye zibifite mu nshingano”.

Depite Manirarora Annoncée yashimiye Save Generations Organization na Reseau des femmes bakoze iyi raporo ndetse n’imiryango itari iya leta yabigizemo uruhare, kandi abizeza ubuvugizi mu Nteko Ishinga amategeko.

Ati “Ibyifuzo byatanzwe birebana n’Inteko Ishinga Amategeko tuzakomeza kubikorera ubuvugizi kugira ngo yaba ari ku ruhande rwa shadow report itangwe hari ibyanogejwe kuko twese umugozi dusenyera ni umwe, ni kugira ngo Igihugu cyacu kigire ijambo mu ruhando mpuzamahanga”.

Iyi nama yitabiriwe n’inzego zitandukanye zirimo iza leta, imiryango itari iya leta, amadini, ibigo by’urubyiruko n’amashuri.

Save Generations Organization na Reseau des Femmes bavuga ko iyi raporo yiswe Shadow Report, yateguwe mu rwego rwo kugira ngo hibukiranye ibitaragaragaye muri raporo isanzwe iriho no kuzuzanya n’isanzwe kugira ngo habeho impinduka mu mategeko n’imitangire ya serivise ku buzima
Amasezerano ya Maputo afite umwihariko wo kuvuga ku burenganzira bw’abagore n’abakobwa bo muri Afurika bitewe n’imiterere y’ubuzima bwa buri munsi babayemo.
Ibitekerezo byatanzwe byagarukaga ku kurushaho kunoza amategeko yorohereza abagore n'abakobwa kubona amakuru na serivisi z'imyororokere
Iyi nama nyunguranabitekerezo yitabiriwe n'inzego zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .