Drones zitagira abapilote zimaze gutwara amashashi y’amaraso ibihumbi 63 mu myaka ine

Yanditswe na Mukahirwa Diane
Kuya 21 Ukwakira 2020 saa 09:19
Yasuwe :
0 0

Mu myaka ine indege zitagira abapilote zitangiye gutwara amaraso n’imiti mu Rwanda, zimaze gukora ingendo zisaga ibihumbi 37 aho zatwayemo amakarito 7500 y’imiti n’andi ibihumbi 63 y’amaraso hirya no hino mu gihugu.

Mu 2016 nibwo ikigo gikora indege zifashishwa mu gutwara amaraso n’imiti zitagira abapilote, Zipline, cyatangiye gukorera mu Rwanda aho mu myaka ine kimaze gutanga umusanzu ukomeye mu kurengera ubuzima bw’abaturarwanda.

Izi ndege ziswe ‘Zips’ zikorwa n’uruganda rwa Zipline rwo muri Leta ya California ho muri Leta Zunze Ubumwe za Amerika, zatangiye gukoreshwa mu Rwanda ku bufatanye n’ikigo UPS na Gavi ndetse n’Ihuriro ry’Inkingo ku Isi (Vaccine Alliance).

Kugeza ubu u Rwanda rufite ibigo bibiri byifashishwa mu kugeza serivisi z’ubuvuzi nk’amaraso n’imiti mu duce byagoranaga kugeramo, icya Kayonza cyifashishwa n’ibitaro byo mu Ntara y’Iburasirazuba n’icya Muhanga, gikoreshwa n’ibitaro byo mu Burengerazuba n’Amajyepfo y’igihugu.

Ku ikubitiro, izi drones zakwizaga amaraso hirya no hino mu gihugu ziturutse mu Karere ka Muhanga, aho zabanje kujya zikorana n’ibitaro bya Kabgayi. Nyuma y’imyaka ine, zikorana n’ibitaro 165 biri mu turere 24 tw’u Rwanda.

Zipline yatangiranye gahunda yo gutanga amaraso ariko nyuma hashyirwaho n’iyo gutanga imiti iba ikenewe ku mavuriro mu buryo bworoshye.

Iyi gahunda yo gutwara imiti hifashishijwe indege zitagira abapilote yagiyeho ku busabe bw’abari mu nzego z’ubuzima ariko iza kugira umusaruro uhambaye ubwo abantu bari muri gahunda ya Guma mu Rugo kubera Covid-19.

Ubu buryo bwafashije cyane abarwayi ba kanseri bivuriza ku bitaro bya Butaro kuko bagombaga gukomeza gufata imiti nubwo ingendo zari zahagaze nk’uko bisobanurwa na Dr Ntihabose Aime Patrick, umuganga ushinzwe ibikorwa by’ubuvuzi mu bitaro bya Butaro.

Ati “Abarwayi ba kanseri bakenera gufata imiti buri gihe, byari bigoye ko umurwayi uri i Nyagatare cyangwa i Rusizi abona imiti nta ngendo zemewe, ariko Zipline yaradufashije imiti ibageraho ku mavuriro abegereye.”

Usibye gahunda yo kubaha imiti kandi Zipline yafashije ibi bitaro kubona amaraso mu gihe gito, kuko mbere byakoraga urugendo rurerure bijya kuyashaka ku buryo byashoboraga gutuma umurwayi abura ubuzima.

Dr Ntihabose yasobanuye ko byagabanyirije urugendo aho mbere babonaga amaraso bitwaye amasaha atandatu, ubu byaroroshye kuko amaraso abageraho mu gihe cy’iminota 45 gusa.

Ati “Kubera uburyo akarere kacu kari mu misozi, mbere twabonaga amaraso tuyakuye kure wajya nko kuyareba i Kigali ugasanga umurwayi yapfuye, ubu Zipline iyaduha mu gihe gito, byagabanyije impfu zabaga habuze amaraso.”

Zipline yishimiye ibikorwa imaze kugeraho mu myaka ine imaze itangije ibikorwa mu Rwanda.

Umuyobozi Mukuru wayo, Joseph Ndagijimana, yatangaje ko batewe ishema no kuba batanga serivisi zirengera amagara y’abantu.

Ati “Ikintu kidushimisha cyane ni ukubona abantu baza aha badushimira ko amaraso twohereje yatabaye ubuzima bwabo, bidutera ishema ndetse bigatuma dushyira imbaraga mu kazi dukora ko tuba tuzi ko turi kurengera amagara y’abantu.”

Guverineri w’Intara y’Amajyepfo, Kayitesi Alice, yatangaje ko intara ayobora yishimira uburyo ibitaro bya kure bibona amaraso n’imiti ku buryo buboreheye.

Ati “Ni iby’agaciro kubona mu Rwanda hari ubu buryo bwo kohereza imiti n’amaraso mu gihe gito. Nko mu ntara yacu byaradufashije cyane ku bitaro bya kure nka Kaduha, Gikomero na Ndiza ubu babona amaraso ku buryo bwihuse bigatuma ubuzima bw’abanyarwanda bugenda neza.”

Usibye ibyagezweho mu myaka ine ishize, Zipline irajwe ishinga no gukomeza kwagura ibikorwa byayo kugira ngo ikomeze gutanga umusanzu mu kubaka igihugu.

Mu mishinga iteganya gushyira mu bikorwa harimo kujya ishyikiriza abantu imiti mu ngo, bizajyana no kongera drones ndetse no kuzivugurura ku buryo zishobora gukora amasaha 24 ku yandi.

Ku munsi, Zipline itanga mu bitaro amashashi 70 y’amaraso, buri imwe iba ipima igice cya litiro. Ikorana n’ibitaro 165 bigerwaho n’indege 45 ikoresha muri iki gihe.

Drones zitagira abapilote zimaze gutwara amashashi y’amaraso ibihumbi 63 mu myaka ine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .