Byinshi ku ndwara yo kugira amabere manini ikunze kwibasira abangavu

Yanditswe na Uwase Joie Clarisse
Kuya 19 Gashyantare 2020 saa 11:49
Yasuwe :
0 0

Mu myaka mike ishize, hari umwana w’umukobwa wagiye mu bitaro bya Kaminuza bya Kigali (CHUK) afite ikibazo cyo kugira amabere manini yapimaga hafi ibiro bitandatu kandi afite imyaka 17.

Kugira aya mabere kuri iyi myaka y’abangavu biri mu byamuteraga ipfunwe ku buryo yahagaritse kwiga ndetse akumva atajya no mu bandi bagenzi be atinya ko bamuseka.

Nyuma yo kuzenguruka amavuriro menshi ashaka uwamuvura ibyo yitaga ubusembwa bwari muriho ariko ntavurwe uko yabyifuzaga, nibwo yafashe umwanzuro wo kwerekeza ku bitaro bya CHUK.

Yahasanze Dr Ntirenganya Faustin, umwe mu baganga mbarwa b’inzobere u Rwanda rufite mu kuvura ubusembwa bwo ku mubiri u Rwanda. Hakoreshejwe ubuhanga n’ubumenyi, uwo mwana yarabazwe amabere ye asubira ku murongo asubira kungana nkuko igihagararo cye kimeze mu gihe cy’iminsi itanu yari akize.

Abahanga mu buvuzi basobanura ko kugira amabere manini bikabije bizwi nka Virginal Breast Hypertrophy mu ndimi z’amahanga ari indwara y’uruhererekane rwo mu muryango ikunze kugaragara ku bana b’abakobwa bari mu kigero cy’imyaka 10-24, iterwa ahanini n’imisemburo ikora cyane mu mubiri.

Mu kiganiro IGIHE na Dr Ntirenganya Faustin, yavuze ko iyi ndwara igaragara mu bangavu ku kigero kiri munsi ya 1%.

Dr Ntirenganya yavuze ko izi ndwara zirimo amoko abiri. Ngo hari igihe biba ari ibijyimba biri mu mabere ariko bitandukanye na kanseri umuntu atabizi bigatuma aremera.

Ati “Hari igihe umwana usanga afite ibere ripima ibiro bitatu kuzamura kugera ku biro icumi. Benshi batinya kujya kwa muganga ariko biba ari uburwayi.”

Asobanura ko abantu bagomba kubitandukanya n’uko umuntu ashobora kugira imisemburo igakora cyane bitewe n’umubiri we, bigatuma agira amabere manini ugeranije n’ayo ufite imyaka nk’iye yakabaye afite.

Ati “Ndabagira abo barwayi baba bameze gutyo . Kiba ari ikibazo ntabwo biba bisanzwe mu buzima bwa muntu biterwa n’impamvu nyinshi harimo n’ibibyimba. Hari igihe biterwa n’uko mu muryango wanyu mwese mugira icyo kibazo cy’uko abantu ariko bameze.”

Ibyo bigira ingaruka ku murwayi, aho usanga bagenzi be bahora bamuseka ko atameze nk’abandi rimwe na rimwe bikamuviramo kuva mu ishuri, kwigunga n’ibindi.

Dr Ntirenganya yavuze ko abenshi bategereza ko amabere yabo aba manini bikabije kugira ngo bafate umwanzuro wo kujya kwa muganga. Muganga avuga ko biba byiza iyo baje hakiri kare.

Ati “Nibyo dushishikariza ababyeyi kujya babazana kuko kwa muganga kuko turarigabanya tukaringanyisha n’ingano y’umuntu ikirenze kuri ibyo tubaha imiti igabanya imisemburo.”

Dr Ntirenganya avuga ko abenshi babazwe muri ubwo buryo bakunze kugira ikibazo cyo konsa iyo bamaze kubyara, gusa ngo biri ku kigero cya 40 % abahura n’icyo kibazo.

Ntirenganya yavuze ko ubusembwa bwo kugira amabere manini ari indwara ivurwa igakira, bigasaba ko umurwayi yubahiriza inama za muganga.

Ati “Iyo basanze umuntu afite icyo kibazo bararigabanya bakaringanisha n’uko umuntu angana.Icyo bisabwa kugira ngo ubwo burwayi bushire ni ukumva inama za muganga kuko nubwo benshi babifata nk’ubusembwa bukabije birakira.”

Ubushakashatsi bugaragaza ko mu 1669 ari bwo umuntu wa mbere yagaragaweho iyi ndwara ikunze gufata abangavu mbere y’uko babona imihango ya mbere.

Dr Ntirenganya avuga ko kugira amabere manini ari ubusembwa bushobora gukosorwa
Kugira amabere manini bishobora guterwa n'imisemburo yo mu mubiri cyangwa uruhererekane rwo mu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza