Byinshi ku ndwara y’igicuri ishobora guterwa no kurya inyama z’ingurube zidatetse neza (Video)

Yanditswe na Evariste Nsengimana
Kuya 27 Ukuboza 2019 saa 07:43
Yasuwe :
0 0

Abahanga mu by’ubuzima bavuga ko igicuri ari indwara y’ubwonko igizwe n’uruhurirane rw’ibimenyetso umuntu agira birimo guta ubwenge, akikubita hasi, akagagara, akazana urufuro mu kanwa, inshuro nyinshi akiruma igice cy’ururimi ndetse akaba ashobora kwirekuriraho umwanda nk’inkari n’umusarani.

Umuganga w’inzobere mu kuvura indwara z’umutwe, ubwonko, urutirigongo n’imyakura mu Bitaro bya Kaminuza bya Kigali (CHUK), Dr Nshimiyimana François Xavier, yabwiye IGIHE ko bishobora kuba ku muntu uwo ariwe wese bitewe n’impamvu zitandukanye zirimo nka malaria y’igikatu, mugiga, ibibyimba ku bwonko, kurya inyama z’ingurube zidahiye neza n’izindi ndwara.

Izo ndwara zinyuranye zishobora kwangiza ibice bimwe na bimwe by’ubwonko igihe zitavuwe neza, bigatuma ibyo bimenyetso bihora bigaruka ku muntu [aribwo bavuga ko arwara igicuri].

Dr Nshimiyimana yasobanuye ko igicuri kimaze igihe kirekire cyane kuko no mu mateka ya Bibiliya kivugwamo ko ‘Yezu/Yesu yirukanye amashitani mu murwayi wari urwaye igicuri, kuva icyo gihe kugera uyu munsi usanga gifatwa nk’amadayimoni ariko biratandukanye’.

Dr Nshimiyimana ahamya ko hari indwara nyinshi zishobora gufata umuntu muri ubwo buryo.

Ati “Iyo umuntu atubwiye ko ata ubwenge cyangwa akagagara ntiduhita twemeza ko arwaye igicuri ahubwo tubanza kureba izo ndwara zindi zinyuranye, cyane cyane ko iyo tuzivuye, ubwo burwayi benshi bitaga igicuri buhita bukira.”

-  Zimwe mu mpamvu zishobora gutera igicuri

Asobanura ku mpamvu nyamukuru zishobora gutera igicuri, Dr Nshimiyimana yavuze ko bitandukana bitewe n’imyaka y’umuntu.

Ati “Nk’umwana ukivuka, cyane cyane ku babyeyi batinda kujya kwa muganga, agatinda kuvuka, akavuka ananiwe, ibyo biri mu bintu bikora ku bwonko. Uwo mwana ntituba twizeye ko azakura nk’uko abandi bakura…Kuvuka ananiwe bishobora gutera igicuri.”

Ku bari munsi y’imyaka itanu, maralia y’igikatu iri mu bintu bishobora gutera ibikomere ku bwonko uyifite akaba yazagaragaza ibimenyetso biranga igicuri.

Dr Nshimiyimana ati “Dushishikariza ababyeyi kwihutira gukingiza abana cyane cyane abari munsi y’imyaka itanu no kwihutira kubavuza kugira ngo bitazagira ingaruka ku bwonko bwabo.”

Bitewe n’imyitwarire, ingimbi n’abangavu bashobora kugira ibimenyetso by’indwara y’igicuri. Iyo myitwarire irimo gukoresha ibiyobyabwenge n’ibindi biganisha gukomereka cyangwa kwangiza ubwonko.

Abageze mu zabukuru na bo bashobora kugira ibyo bimenyetso bitewe n’indwara zirimo kanseri, kurya inyama z’ingurube zidatetse neza, kunywa inzoga, gukora impanuka n’ibindi bigira ingaruka ku bwonko.

-  Bimwe mu by’umurwayi w’igicuri yakwirinda

Dr Nshimiyimana yavuze ko kimwe nk’izindi ndwara zose z’ubwonko, urwaye n’ufite ibimenyetso by’igicuri asabwa kwirinda ibiyobyabwenge, inzoga, gutwara ikinyabiziga kuko gishobora kumufata agateza abandi impanuka.

Ati “Hari ubwoko bunyuranye bw’igicuri burimo n’ububanza guteguza umuntu. Hari ubwo tuganira n’umurwayi akatubwira icyo yumva igihe bigiye kuba. Muzasanga akenshi ababimenyereye bagenda bakaryama cyangwa bakicara ahantu kuko bimara hagati y’iminota 2-3, byarangira agakomeza akazi ke.”

-  Bimwe mu bimenyetso biranga ugiye gufatwa n’igicuri

Dr Nshimiyimana ati “Hari nk’abantu muhorana tuzi ko barwaye igicuri wowe utamenya kuko bafata imiti yabo neza.”

Umuntu urwaye igicuri avurwa nibura hagati y’amezi atandatu n’imyaka itanu. Byumvikane ko uko umuntu ayifata igihe kirekire aba yarahawe ubwoko butandukanye ntibugire icyo bumufasha.

Uyu muganga avuga ko ibimenyetso bikunze kugaragara by’igicuri bingana na 30% byacyo, bisobanuye ko 70% bindi bitagaragara.

Ati “Ibyerekeranye n’igicuri abantu bazi, bazi wa muntu ugira gutya agataka, akibubita hasi, aba yatakaje ubwenge, akagagara, amaso akareba hejuru umukara ntuwubone, akamera nk’uri guhekenya ibintu n’ururimi.”

“Hari indi ndwara ifata umuntu agata ubwenge, itwara igihe gito cyane nk’amasegonda abiri cyangwa atatu ikunda kuboneka mu bana, rimwe na rimwe iyo twabaga twiga wasangaga abana bavuga ngo umwana arasuzugura, niba arebye mwarimu, akamera nk’umwihoreye.”

Ubwo bwoko bw’igicuri iyo bufashe ku gice cy’ubwonko cyumva impumura, umuntu yumva impumuro idasanzwe, byafata ku gice gifasha nk’urugingo runaka gukora, akakigiraho ububabare cyangwa imyitwarire bidasanzwe bw’igihe gito.

-  Igicuri si indwara yandura

Igihe umuntu agaragaje ibyo bimenyetso, cyane cyane ibyo bikomeye nko kugagara, guta ubwenge, kwikubita hasi n’ibindi, icyihutirwa si ukumuhunga ahubwo ni ukumufasha kuko igicuri kitandura.

Mu bufasha uwagaragaje ibimenyetso by’igicuri akenera harimo kumurinda kugwisha umutwe cyangwa ibindi bice ku buryo byatuma akomereka cyane, kumukiza ikintu cyamubuza guhumeka nk’umukandara cyangwa imyenda imufashe cyane, kwirinda kugira ibyo umushyira mu kanwa kuko ashobora kukimira kikazibira umwuka, kumuryamisha uruhande rumwe n’ibindi.

Dr Nshimiyimana yanenze imyitwarire ya bamwe mu bakozi b’Imana bafungirana abafite ibimenyetso by’igicuri ngo bari kubasengera, bamwe bakabahondagura Bibiliya ngo bari kubirukanamo amadayimoni, bikaba byabagiraho izindi ngaruka.

Ku muganga na we bisaba kumuryamisha mu buryo butamubangamira mu guhumeka kuko ‘adafashijwe ashobora gushira umwuka akaba yanapfa’ maze akamuha imiti yabugenewe kugeza akize, kuko ari indwara ivurwa igakira.

Abakunze kugaragaza ibi bimenyetso bagirwa inama yo kwirinda gutwara imodoka, kutajya mu mazi menshi, kurira ibiti, inzu, imisozi miremire n’ibindi bishobora gushyira mu kaga ubuzima bwabo.

Imibare RBC iheruka gushyira ahabona igaragaza ko mu Rwanda abarwaye igicuri basaga 49/1000. Ni ukuvuga hafi 500 000. Gusa 50% by’Abanyarwanda ngo baba baragaragaje ibimenyetso bifitanye isano n’iby’igicuri.

Umuganga w’inzobere mu kuvura indwara z’umutwe, ubwonko, urutirigongo n’imyakura mu Bitaro bya Kaminuza bya Kigali (CHUK), Dr Nshimiyimana François Xavier, asobanura uko indwara y'igicuri ifata abantu n'uko abayirwaye bitabwaho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza