Akarima k’igikoni kabaye igisubizo mu kurwanya igwingira n’imirire mibi y’abana

Yanditswe na Evariste Nsengimana
Kuya 29 Gicurasi 2019 saa 10:46
Yasuwe :
0 0

Inzobere mu by’ubuzima zigaragaza ko kugwingira ari imwe mu ngaruka z’imirire mibi zituma umwana adakura mu gihagararo no mu mitekerereze, bigaragara iyo bamupimye bagasanga uburebure bwe budahuye n’imyaka ye.

Gukura mu bwenge no mu gihagararo bikorwa kuva umwana agisamwa kugera nibura ku myaka itatu. Icyo gihe ni icyo kwitondera kuko cyihariye nibura 80% by’iterambere ry’ubwonko.

Ku Isi abana barenga miliyoni 250 bari munsi y’imyaka itanu bazaharira muri icyo cyiciro. Igenzura ryakozwe ku rwego rw’ubuzima bw’abaturage mu Rwanda DHS (2014-2015), rigaragaza ko abafite amezi 36-59 babasha gutera imbere mu gusoma, kubara, mu gihagararo no mu myitwarire ari 63%.

Bivuze ko umwana umwe muri batatu mu Rwanda yari akeneye kwitabwaho byihariye.

Icyo gihe 38% by’abari munsi y’imyaka itanu bari bagwingiye. Ibyo bituma Isi ihomba abakozi bafite ubumenyi bwayifasha guhangana n’ibibazo biyugarije.

Inzobere zigaragaza ko akenshi kugwingira biterwa no kubura ababitaho uko bikwiye mu gihe barwaye, kurya nabi, kubura amazi asukuye, isuku nke, kutiga neza n’ibindi.

Zigaragaza kandi ko umuntu agerwaho n’ingaruka z’imirire mibi igihe mu mafunguro ya buri munsi hakennyemo ibitera imbaraga [nk’ibinyamafufu n’ibinyampeke], ibirinda indwara [nk’imboga n’imbuto] n’ibyubaka umubiri [nk’ inyama n’ibikomoka ku matungo].

Akarima k’igikoni ni imwe muri gahunda guverinoma yashyizweho igamije gufasha buri munyarwanda kubona imboga zivangwa n’ibindi biribwa kugira ngo atagorwa no gutegura indyo yuzuye.

Umukozi ushinzwe ubuhinzi mu Murenge wa Rushaki mu Karere ka Gicumbi, Rebero Télésphore, yabwiye IGIHE ko kubaka akarima k’igikoni ari ibintu buri muturage yakwikorera mu rugo iwe yifashishije ibiti byo gushinga, imifuka yo gutangira itaka, ifumbire y’imborera, ibyatsi byo gusasira n’amazi yo kuzuhira.

Ati “Ushobora guhingaho ubwoko bw’imboga butandukanye nka dodo, karoti, ushobora no guhingaho amashu [...] kugatunganya nta bushobozi buhambaye bisaba, ukoresha ibikoresho bisanzwe biboneka.”

Abatuye muri uyu Murenge babwiye IGIHE ko ‘Akarima k’igikoni kabafashije kubona imboga bifashisha mu gutegura indyo yuzuye mu rwego rwo kwirinda imirire mibi n’igwingira mu bana’.

Mukamugenza Verda, afite akarima k’igikoni gateyeho imboga za dodo, ubutunguru n’andi moko.

Ati “Nagateyeho imboga kugira ngo bimfashe kurya indyo yuzuye nkagira ubuzima bwiza [...] Imboga tuzirya buri munsi, ntabwo twarya ibitarimo imboga.”

Mukamugenza avuga ko mbere yo gusobanukirwa akamaro k’akarima k’igikoni, iyo yashakaga kurya imboga byamusabaga kuzigura, umufungo 100 Frw ariko aza gusanga ahendwa.

Ati “Aka karima ni keza kuko igihe cyose ukenereye imboga urazibona, wajya gutegura indyo yawe uziko bitakurushya kuzibona.”

Murenzi Eliphas wo mu Kagari ka Karama, yavuze ko nyuma yo gusobanukirwa akamaro k’akarima k’igikoni, abizirikana kasaza akagasazura kugira ngo urugo rwe rutazigera rubura imboga.

N'abagabo bagira uruhare mu gutegura akarima k'igikoni

Uruhare rw’abajyanama b’ubuzima

Mu gushyira mu bikorwa iyi gahunda, urwego rw’abajyanama b’ubuzima rumenyerewe muri gahunda zitandukanye z’ubuzima, isuku n’isukura n’izindi, ni rumwe mu zigiramo uruhare rukomeye.

Umujyanama w’Ubuzima, Mukagatunge Marie Josiane yavuze ko akarima k’igikoni ‘gatanga imboga zikadufasha kurwanya imirire mibi mu muryango kuko n’umuntu mukuru ashobora kugira imirire mibi’.

Ati “Twahuguwe uko bagakora maze batubwira ko tubyigisha abandi, tubigisha tunyuze mu masibo, tukigira ku rugo rumwe, ubundi abaturage bakifatanya bagakorerana.”

Yavuze ko amaze gushishikariza imiryango irenga 500 gukora akarima k’igikoni no kwifashisha imboga zikeraho mu gukumira no kurwanya ingaruka zitera n’imirire mibi zirimo bwaki, kugwingira n’izindi ndwara.

Ati “Gutegura indyo yuzuye nta bushobozi buhambaye bisaba kuko guhinga imboga ntabwo ari imbaraga nyinshi. Ushobora no kuzihinga ku karima k’igikoni ukazivanga n’ibindi biribwa.”

Umujyanama w’Ubuzima witwa Nyirumugeni Joseline, yavuze ko imboga ari kimwe mu byifashishwa mu gutegura indyo yuzuye ariko bakazirikana n’isuku.

Yavuze ko ‘abana iyo batabonye indyo yuzuye baragwingira n’abagore batwite iyo batayibonye babyara abana badafite ibiro, ntibagire ubwenge ariko akarima k’igikoni iyo ugafite ubasha gutegurira umwana indyo yuzuye’.

Umunyamabanga Nshingwabikorwa w’Umurenge wa Rushaki, Irankijije Bienfait Nduwayo, yavuze ko “Uturima tw’igikoni twagiye dufasha abana bafite imirire mibi kuyivamo, umwaka ushize twari dufite 37 ariko kuri uyu munsi dusigaje abana bane nabo barimo kuyivamo.”

Nduwayo yavuze ko muri uyu Murenge banafite gahunda zitandukanye zo guhinga imboga zirimo amashu zo kunganira uturima tw’igikoni kugira ngo zitazabura.

Umukozi ushinzwe Imbonezamikurire y’abana bato mu Karere ka Gicumbi, Iradukunda Emmanuel, yabwiye IGIHE ko ‘akarima k’igikoni ari kimwe mu bifasha mu kurwanya imirire mibi n’igwingira kuko imboga zikeraho zifite intungamubiri nyinshi’.

Akarima k’igikoni mu Karere ka Gicumbi kagize impinduka mu kurwanya imirire mibi kuko hagati ya Nyakanga na Nzeri 2018, abana bari mu mirire mibi bari 413, hagati ya Ukwakira-Ukuboza bari 374, hagati ya Mutarama na Werurwe bari 289 naho muri Gicurasi 2019 bari 233.

Umujyanama w’Ubuzima witwa Nyirumugeni Joseline, yavuze ko imboga ari kimwe mu byifashishwa mu gutegura indyo yuzuye
Umunyamabanga Nshingwabikorwa w’Umurenge wa Rushaki, Irankijije Bienfait Nduwayo yabwiye IGIHE ko akarima k'igikoni kabashije gukura abana mu mirire mibi
Umukozi ushinzwe Imbonezamikurire y’abana bato mu Karere ka Gicumbi, Iradukunda Emmanuel, yavuze ko Akarima k'igikoni ari imwe muri Gahunda zatumye ikibazo cy'imirire mibi kigabanuka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza