Ni mu iburanisha ryabereye mu rukiko rwisumbuye rwa Karongi, nyuma y'aho uregwa asabye gusubirishamo urubanza. 

Ubushinjacyaha bwavuze ko tariki 10 Mata 2024, uregwa yateje akavuyo mu kabari uwo bari kumwe amubujije aramubwira ngo "Ntunkangishe ibihe turimo ntawe utazabibamo". Ubushinjacyaha buvuga ko iyo mvugo igize icyaha cyo gupfobya Jenoside. 

Mu bimenyetso ubushinjacyaha bwagaragarije urukiko harimo ubuhamya bw'abo bari kumwe mu kabari bemeza ko uregwa ayo magambo yayavuze na raporo y'inzego z'ibanze.  

Ubushinjacyaha bwasabye urukiko guha ishingiro iki kirego no kumuhamya icyaha rukamukatira igifungo cy'imyaka irindwi.

Uregwa yireguye avuga ko tariki 10 Mata 2024, yagiye ku kazi asanga umuriro wabuze ajya mu kabari ko kwa yaka icyo kunywa asangira na bagenzi be babiri. Avuga ko muri ako kabari yahamaze amasaha atatu.Yavuze ko yari yasinze ariko ko ayo magambo ntayo yavuze ndetse ko nta n'akavuyo yateje.

Ati "Iyo nteza akavuyo nyir’akabari aba yaransohoye".

Uregwa yasabye urukiko kumurenganura rukamugira umwere. Umwanzuro w'urukiko uzasomwa tariki 30 Ugushyingo 2026.