Icyemezo cy’Urukiko cyasomwe kuri uyu wa 4 Ukwakira 2023. Ubushinjacyaha bwari bwabasabiye gufungwa iminsi 30 mu gihe iperereza ku byo baregwa rikomeje.

Ubushinjacyaha bwagaragarije Urukiko ko Prof Jean Bosco Harelimana ashinjwa ibyaha birimo gutanga isoko rya Leta mu buryo bunyuranyije n’amategeko; kutubahiriza ihame ryo kuzigamira Leta n’iryo gukorera mu mucyo mu itangwa ry’amasoko ya Leta bigateza Leta igihombo no gukoresha nabi umutungo ufitiye rubanda akamaro.

Ashinjwa kandi gufata icyemezo gishingiye ku itonesha, ubucuti, urwango, ikimenyane cyangwa icyenewabo no gukoresha igitinyiro.

Hakizimana Clever ashinjwa gutanga isoko rya Leta mu buryo bunyuranyije n’amategeko; gukoresha nabi umutungo ufitiye rubanda akamaro no gutanga inyungu zidafite ishingiro mu gihe cy’ishyirwa mu bikorwa ry’amasezerano.

Ni mu gihe Gahongayire Liliane ashinjwa gutanga inyungu zidafite ishingiro mu gihe cyo gushyira amasezerano mu bikorwa.

Ibyaha bakurikiranyweho byakozwe mu mwaka w’ingengo y’imari wa 2021/2022 nk’uko byagaragaye muri raporo y’Umugenzuzi Mukuru w’Imari ya Leta yagaragaje ko hari amasoko yatanzwe binyuranyije n’amategeko.

Ubushinjacyaha bwagaragaje ko aba batatu bagize uruhare mu guha isoko ikigo cyatanze amafaranga ari hejuru mu gihe hari abatanze ikiri hasi yacyo. Bubashinja ko bongereye ibindi bikoresho mu byari byapiganiwe mbere bitubahirije amabwiriza agenga imitangire y’amasoko. Bwagaragaje ko ibyo byatumye isoko rya miliyoni 4 Frw, rigera kuri miliyoni 11 Frw.

Mu kwisobanura kwabo bose bahakanye ibyaha bashinjwa bakavuga ko nta na kimwe bemera bityo Ubushinjacyaha busaba ko bafungwa iminsi 30 y’agateganyo bugakomeza Iperereza.

Urukiko rwasuzumye niba hari impamvu zikomeye zatuma bakekwaho ibyaha bakurikiranyweho ndetse no kuba hari impamvu zatuma abaregwa bakurikiranwa bafunzwe.

Ubushinjacyaha bwari bwagaragaje ko impamvu zatuma bakekwaho ibyaha ari raporo y’Umugenzuzi Mukuru w’Imari ya Leta yagaragaje amakosa bagizemo uruhare, amasezerano yakozwe y’itangwa ry’isoko ryo kugura ibikoresho, inyandiko y’ipiganwa yatanzwe na rwiyemezamirimo, amajwi yafashwe Prof Harelimana Jean Bosco n’umwe mu bakozi n’ibindi.

Urukiko rumaze gusesengura ubwiregure bw’abaregwa rwasanze ibimaze kugerwaho n’Ubushinjacyaha ku byaha bukurikiranyeho Prof Harelimana, ari ibimenyetso bikomeye bigize impurirane mbonezamugambi ku cyaha cyo gufata nabi umutungo ufitiye abaturage akamaro.

Ku birebana no gukoresha itonesha, Urukiko rusanga nta kimaze kugerwaho cyerekana ko Prof Harelimana haba hari isano yagize yaba iziguye cyangwa itaziguye yaba yaratumye abakozi babiri bivugwa ko bafashije mu mirimo yo gutunganya ahakorewe ikizamini cy’akazi bakaza no kugitsinda.

Rusanga kandi amajwi yagaragaye mu kiganiro yagiranye n’umwe mu bakozi atari ikimenyetso cyagezweho n’ubushinjacyaha cyo kwerekana ko yirukanaga abakozi uko ashaka kuko nta rubanza rwigeze rugaragazwa rw’umukozi waba warirukanywe bidakurikije amategeko.

Rushingiye kuri ibyo rusanga ibimaze kugerwaho bidahagije ngo bigirwe impamvu zikomeye zatuma akurikiranwaho icyaha cyo gufata icyemezo gishingiye ku itonesha.

Ku birebana no gukoresha igitinyiro, urukiko rusanga amajwi yagaragajwe atari impamvu zikomeye zatuma Harelimana akekwaho gukoresha igitinyiro kuko nubwo Ubushinjacyaha butagaragaza uwahaye uburenganzira uwafashe amajwi ari ikiganiro hagati y’abandi bakozi bikaba bitafatwa nk’ikimenyetso.

Urukiko rusanga Hakizimana Claver hari impamvu zikomeye zituma akurikiranwaho icyaha cyo kuba yaragize uruhare ku mpurirane mbonezamugambi ku cyaha cyo gukoresha nabi umutungo ufitiye rubanza akamaro.

Urukiko kandi rwasanze Gahongayire Liliane wari ushinzwe ububiko wasinye ku nyandiko ko yakiriye ibikoresho bidakwiye kuba impamvu zikomeye zituma akekwaho icyaha kuko kuri iyo nyandiko hatagaragazwa ubwoko bw’ibikoresho byari byishyuwe.

Hashingiwe ku ngingo ya 86 y’itegeko ryerekeye imiburanishirize y’imanza z’inshinjabyaha iteganya ko ukekwaho icyaha akurikiranwa adafunze, ashobora ariko gukurikanwa afunze iyo hari impamvu zikomeye zituma umuntu akekwaho icyaha gihanishwa igihano cy’igifungo kirenze imyaka ibiri.

Urukiko rwasanze nta mpamvu zikomeye zituma Gahongayire Lialiane akekwaho icyaha akurikiranyweho bityo ko agomba gukiranwa adafunzwe.

Kuri Hakizima urukiko rwasanze nubwo hari impamvu zikomeye zituma akekwaho icyaha adashobora kubangamira iperereza bityo rutegeka ko yakurikiranwa ari hanze akajya yiyereka umushinjacyaha ku rwego rw’Ibanze rwa Nyarugenge buri wa gatanu mu gihe cy’amezi abiri no kutarenga imbibe z’Umujyi wa Kigali.

Urukiko kandi rusanga nubwo hari impamvu zikomeye zituma Prof Harelimana akekwaho icyaha Ubushinjacyaha bwaramaze kwegeranya ibimenyetso, kuba yaragaragaje ko hari abanyeshuri bagiye kurangiza Kaminuza yafashaga no kuba yaratanze ingwate y’umutungo ufite agaciro ka miliyoni 85 Frw nta mpamvu ikomeye ihari yatuma akurikiranwa afunzwe.

Rwasanze ingwate yatanze igomba gushinganishwa, kujya yireka umushinjacyaha ku rwego rw’Ibanze rwa Nyarungenge buri wa Gatanu mu mezi abiri no kutarenga imbibe z’Umujyi wa Kigali mu gihe cy’amezi abiri.