00:00:00 IGIHE NETWORK KN KINYARWANDA EN ENGLISH FR FRANCAIS

Yashinjwe kubagira inka Interahamwe: Dr Rutunga yatangiye kuburanishwa mu mizi

Yanditswe na Prudence Kwizera
Kuya 5 July 2022 saa 01:10
Yasuwe :

Dr Rutunga Venant wahoze ayobora Ikigo cy’Igihugu gishinzwe Ubushakashatsi mu by’Ubuhinzi (ISAR) - Ishami rya Rubona i Huye, yaburanishijwe mu mizi ku byaha akekwaho bya Jenoside yakorewe Abatutsi mu 1994.

Kuri uyu wa Kabiri tariki ya 6 Nyakanga 2022 yaburanishijwe n’Urukiko Rukuru rw’Urugereko Ruburanisha Ibyaha Mpuzamahanga n’Ibyambukiranya Imipaka ruri i Nyanza mu Majyepfo y’u Rwanda.

Yagejejwe mu rukiko yambaye impuzankano iranga imfungwa arinzwe n’abacungagereza.

Yoherejwe mu Rwanda muri Nyakanga 2021 nyuma y’uko inzego z’umutekano z’u Buholandi zimutaye muri yombi mu 2019.

Ashinjwa ibyaha bitatu bifitanye isano na Jenoside yakorewe Abatutsi mu 1994, akekwaho gukorera muri ISAR birimo icyaha cya Jenoside, icy’ubufatanyacyaha muri Jenoside no kurimbura nk’icyaha cyibasiye inyokumuntu. Yunganiwe mu mategeko na Me Ntazika Nehemie afatanyije na Me Sebasiga Sephonie.

Icyaha cya Jenoside

Ubushinjacyaha burega Rutunga ko mu mpera z’ukwezi kwa Kane mu 1994 ubwo yari umuyobozi wa ISAR Rubona, yagize uruhare mu kwicisha Abatutsi bakoranaga n’abandi bahahungiye.

Bwamureze ko yakoreshaga inama muri icyo kigo kandi ko yitabiraga izaberaga kuri Perefegitura zigamije kwica Abatutsi.

Ubushinjacya bwasobanuye uburyo umuntu ashobora kuregwa icyarimwe ibyaha byo gukora Jenoside no kuba icyitso cya Jenoside. Bwavuze ko amategeko y’u Rwanda yemeza ko umuntu yabiregwa byombi ariko akaba yahanirwa kimwe muri byo.

Bwamushinje ko yatanze ibikoresho birimo imipanga, amasuka, amapiki n’ibindi byakoreshejwe mu kwica Abatutsi kandi hagati ya tariki 24 na 26 Mata 1994 yafashe imodoka ya ISAR ajya mu Mujyi wa Butare gutwara Abajandarume bishe Abatutsi bari bahungiye muri icyo kigo ndetse n’abahakoraga.

Bwavuze kandi ko yemereye ibihembo Interahamwe azibwira ko nizica Ndamage George azihemba kuzibagira ikimasa kandi ngo niko byagenze.

Rutunga yashinjwe ko ubwo Abatutsi bari bahungiye muri ISAR ya Rubona bageragezaga kwirwanaho bakoresheje amabuye mu gusubiza inyuma ibitero by’Interahamwe, Dr Rutunga agafata umwanzuro wo kujya kuzana Interahamwe mu modoka, zihageze zirasa Abatutsi zirabica.

Ibyo ashinjwa birimo gutanga ibikoresho, kugenera ibihembo abicanyi ndetse no kujya gutwara Abajandarume ngo bice Abatutsi. Ni byo Ubushinjacyaha bushingiraho bumushinja kugira uruhare muri Jenoside yakorewe Abatutsi mu 1994.

Ashinjwa mu kugira uruhare mu kwica Abatutsi bari hagati y’igihumbi n’ibihumbi bibiri barimo Karisa Epaphrodite na Ndamage George bakoraga muri ISAR.

Ubufatanyacyaha muri Jenoside

Ubushinjacyaha bwavuze ko umutangabuhamya wa mbere wakoraga muri ISAR utarahigwaga, yavuze ko mu gihe cya Jenoside Dr Rutunga yatanze amabwiriza ku mukozi wa wari ushinzwe ububiko bw’ibikoresho witwa Mukurarinda Aloys ko abitanga ku Nterahamwe kugira ngo zibikoreshe mu kwica Abatutsi bari bahahungiye n’abahakoraga.

Uwo mutangabuhamya ngo yavuze ko ubwo Interahamwe zagaba ibitero ku Batutsi bakagerageza kwirwanaho aribwo Dr Rutunga yafashe imodoka ajya kuzana abajandarume bo kubafasha. Abo ngo nibo bishe Karisa Epaphrodite n’umuryango we ugizwe n’abana n’umugore ndetse n’abandi.

Undi mutangabuhamya wa kabiri na we wakoraga muri ISAR Rubona ngo yashinje Dr Rutunga kujya kuzana Abajandarume bo kwica Abatutsi kuko yari amaze kubona ko bari kwirwanaho bagasubiza inyuma Interahamwe.

Umutangabuhamya wa gatatu na we wari umukozi muri ISAR Rubona ngo yemereye Ubushinjacyaha ko yiyumviye Dr Rutunga yemerera Interahamwe kuzibagira ikimasa nizica Ndamage George.

Umutangabuhamya wa kane na we wakoraga muri ISAR yabwiye Ubushinjacyaha ko Dr Rutunga amaze kubyumvikanaho na Rudakubana Martin wari Burugumesitiri wa Komini Ruhashya yagiye kuzana Abajandarume kandi ari bo bishe Abatutsi muri icyo kigo.

Undi mutangabuhamya na we ngo yashinje Dr Rutunga gukoresha inama zigamije kugaba ibitero ku Batutsi bari bahungiye ku musozi wa Rubona no mu nkengero zaho.

Ubushinjacyaha bwavuze ko bugendeye ku byo bwabwiwe n’abatangabuhamya bagera ku 10, bigaragza ko Dr Rutunga yayoboye inama z’umutekano muri ISAR Rubona kandi zari zigamije kwica Abatutsi kuko Abajandarume yazanye ari bo babishe.

Buti “Yari abizi ko abajandarume yari azanye bari abo kwica Abatutsi babaniwe kwicwa n’Interahamwe.”

Bwavuze ko hari umutangabuhamya wari umukozi muri ISAR ndetse aba no mu nzu y’icyo kigo, wavuze ko Dr Rutunga yari umuntu wanga Abatutsi akanabigaragaza.

Bwasobanuye ko hari umutangabuhamya wabubwiye Dr Rutunga yagendanaga n’Abasirikare kandi bicaga abantu bari kumwe.

Kurimbura nk’icyaha cyibasiye inyokumuntu

Ubushinjacyaha bwabwiye urukiko ko abaturage bari bahungiye mu Gakera no ku musozi wa Rubona bari abasivile kandi bagabweho ibitero n’Interahamwe n’Abajandarume boherejwe na Dr Rutunga, bisobanuye ko ari icyaha cyo kurimbura.

Bwasobanuye ko amategeko ateganya ko icyaha cyitwa ‘kurimbura no kwibasira inyokomuntu’ iyo hagabwe ibitero ku baturage bigamije kubica akandi atari abasirikare.

Bwavuze ko kuba abajandarume bazanwe na Dr Rutunga baragize uruhare mu kwica Abatutsi, bisobanuye uruhare rwe mu cyaha cyo kurimbura no kwibasira inyokomuntu muri Jenoside yakorewe Abatutsi.

Ubushinjacyaha bwavuze ko kuba Dr Rutunga yari azi ko Jenoside iri gukorwa mu gihugu hose kandi ko aho Interahamwe ziri kunanirwa hari kwitabazwa abasirikare n’abajandarume, yarangiza akajya kuzaba abajandarume mu modoka, bisobanuye ko yari azi neza ko abazanye ngo bice Abatutsi, bityo yagize uruhare mu gukora cyaha cyo kurimbura no kwibasira inyokomuntu.

Bwavuze ko mu ibazwa rye Dr Rutunga na we yiyemeye ko mu kigo yari ayoboye hahungiye Abatutsi, bityo ko yagiye kuzana Abajandarume azi icyo abazaniye.

Umutangabuhamya wakoraga muri ISAR ngo yabwiye ubushinjacyaha ko iyo Dr Rutunga atazana Abajandarume muri ISAR ahatari kwicirwa Abatutsi benshi nk’uko byagenze.

Uwo mutangabuhamya ngo yavuze ko Dr Rutunga akimara kuzana Abajandarume, batakoze akazi ko kurinda ikigo ahubwo bahise batangira kugaba ibitero ku Batutsi bari bahungiye ku musozi wa Rubona n’u wa Gakera.

Ubushinjacyaha bwavuze ko abajandarume baje muri ISAR bahabwaga amabwiriza ba Dr Rutunga kuko ari we wari ubafiteho ububasha kandi icyo bajyaga gukora cyose babanza kumuaba uburenganzira.

Nyuma yo kumva Ubushinjacyaha, urukiko rwafashe umwanzuro wo gusubika urubanza mu gihe cy’isaha imwe kugira ngo abantu baruhuke, ruvuga ko rwongera gusubukurwa saa Saba z’Amanywa.

Dr Rutunga wayoboraga ISAR yatangiye kuburanishwa mu mizi ku byaha bya Jenoside

Dr Rutunga yahakanye ibyaha aregwa byose

Dr Rutunga Venant yahawe umwanya wo kwisobanura abwira urukiko ko ibyaha byose aregwa ari ibihimbano nta na kimwe yakoze.

Yagize ati “Iyo ngerageje kureba ibikorwa byanjye kuva mu 1990 kugeza mu 1994 mbona nta tegeko nishe, nta cyaha nakoze.”

Yisobanura ku cyaha cya Jenoside, yavuze ko mu nama zaberaga kuri Perefegitura ya Butare kuva mu 1970 kugeza mu 1996 zijyanye n’umutekano atigeze yitabira inama n’imwe kuko atari ari mu batumirwa. Gusa yemeye ko inama zijyanye n’akazi za tekinike zo yazitabiraga.

Ati “Nta kindi kindi kitari izo nama tekinike nigeze njyamo.”

Yavuze ko muri izo nama za tekinike nta kindi kintu cyavugirwagamo uretse ibijyanye n’akazi gusa kandi zabaga ziyobowe na Perefe Habyarimana Jean Baptiste utari ushyigikiye Jenoside

Yasobanuye ko nyuma Perefe Habyarimana Jean Baptiste amaze gusimburwa Nsabimana Sylvain atigeze akoresha inama ya tekinike n’imwe ngo abe yayitabira.

Dr Rutunga yavuze ko yahuye bwa mbere na Nsabimana Sylvain agiye kumutabaza ku itariki 10 Mata 1994 kuko bari bafite ikibazo cy’abajura baza kwiba mu mu mirima y’ikigo.

Yavuze ko indege ya Perezida Habyarimana imaze guhanurwa, mu gitondo cyo ku wa 7 Mata 1994 ingabo z’igihugu zasabye ko abantu bose baguma mu ngo zabo cyangwa bakajya aho bumva babona umutekano.

Hahise hashyirwa comité de crise (komite z’ibibazo) muri sitasiyo za ISAR uko ari eshatu kandi buri imwe yari ifite komite yayo.

Icyo gihe ngo muri ISAR bo bagiye gusaba kuri komini ko babaha uburenganzira bwo kuzana abakozi mu kigo bagakomeza akazi. Icyo gihe ngo hari abantu batangiye kuza kwiba ibyo kurya muri ISAR bituma ku itariki 10 Mata 1994 akoresha inama rusange ya komite barebera hamwe uko hakemurwa ikibazo cy’abajura baza kubiba kuko abazamu bari bananiwe kubakumira.

Iyo nama ngo yafatiwemo umwanzuro wo kujya gusaba Abapolisi kuri Komini bo kubafasha kurinda iyo mirima, maze babaha babiri cyangwa batatu.

Ati “Icyo gihe baduha abapolisi babiri cyangwa batatu bo gufatanya n’abazamu gukumira abo bajura.”

Yavuze ko abantu bahungiye muri ISAR muri Mata 1994 kuko ariho hari agahenge bitewe n’uko hacungirwaga umutekano.

Yavuze ko muri ISAR hiciwe Abatutsi bakoranaga aribo Karisa Epaphrodite, Ndamage George, Munyengango na Sebahutu, ariko nta ruhare yagize mu kubicisha.
Yasobanuye ko Karisa yatwawe n’Abajandarume adahari, ageze mu kigo abwirwa ko bamujyanye kandi atigeze agaruka.

Ati “Ibyo narabimenye ko bamujyanye kuko babimbwiye kuko njyewe ntabwo njya mpisha ibyo namenye. Ntabwo nigeze nkurikirana kuko nari ndi mu bibazo byo gushaka aho kuba kuko iwanjye bari bahasenye.”

Urukiko rwamubajije niba Abajandarume bajyanye Karisa niba yari abazi, ahakana avuga ko ntabo yari azi kuko nta mujandarume n’umwe bari baziranye.

Yavuze ko atibuka neza igihe ubwicanyi bwatangiriye muri ISAR ariko agenekereje asanga ari mu matariki ari hagati ya 25 na 27 Mata 1994.

Dr Rutunga yavuze ko yakomeje kuba muri ISAR kugeza tariki ya 27 Kamena 1994 ubwo bahungaga berekeza mu Mujyi wa Butare.

Ku rupfu rwa Ndamage George yavuze ko yabwiwe ko yishwe.

Ati “Babimbwiye ku itariki 9 z’ukwezi kwa Gatanu mu 1994 mbibwiwe n’abantu ndi mu rugo, barambwira ngo Ndamage bamaze kumwica. Barambwiye ngo bamwiciye mu murima munsi y’umuhanda ngo ninaho bamushyinguye. Bambwiye ko yishwe n’abicanyi b’Interahamwe bazereraga aho hose.”

Icyo gihe Ndamage yicwa ngo Abajandarume bari baravuye muri ISAR kuko bagiye tariki 5 z’ukwa Gatanu 1994.
Yahakanye kubagira inka Interahamwe

Dr Rutunga yavuze ko ibyo ashinjwa byo guhemba inka Interahamwe azishimira ko zishe Karisa Epaphrodite, bitabaye kuko n’abamushinja nta n’umwe uvuga ko yamubonye ahubwo nabo bavuga ko babibwiwe ariko ntibagaragaze uwabibabwiye.

Yasobanuye ko ikimasa cyari iwe cyabazwe Ndamage amaze kwicwa cyari kibwe n’Interahamwe, kuko zinjiye mu kigo zihasanga uwitwa Mugemana zirakimwaka. We icyo gihe ngo ntabwo yari ari mu kigo ahubwo yari iwe mu rugo.

Yabajijwe ku rupfu rwa Munyengango avuga ko we atamuzi kandi n’urupfu rwe ntacyo aruziho.

Avuga kuri Sebahutu yavuze ko yari umushakashatsi muri ISAR kandi yagiye muri misiyo itariki 4 Mata 1994 i Ntendezi ajyanye n’abandi bagabo babiri, nyuma ku itariki 6 Mata 1994 indege ya Habyarimana iguye Jenoside ibasangayo kuko bagumyeyo bakurikije amabwiriza yari yashyizweho yo kubuza abantu kuva mu ngo zabo.

Yavuze ko nyuma yaho yamenye amakuru ko Sebahutu yagerageje kuva i Ntendezi ahura n’Interahamwe ziramwica.

Amaze kwisobanura kuri iki cyaha cya Jenoside, urukiko rwafashe umwanzuro wo gusubika urubanza rutegeka ko ruzakomeza 18 Nyakanga 2022 Dr Rutunga yisobanura ku cyaha cya kabiri ari cyo ‘Ubufatanyacyaha muri Jenoside’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .