00:00:00 IGIHE NETWORK KN KINYARWANDA EN ENGLISH FR FRANCAIS

Urukiko rweretswe ubuzima abarokotse ibitero bya FLN banyuzemo ngo rwumve neza akababaro kabo

Yanditswe na Dufitumukiza Salathiel
Kuya 8 February 2022 saa 07:22
Yasuwe :

Abunganira abaregera indishyi ku bw’ingaruka bagizweho n’ibitero bya FLN, beretse Urukiko amashusho y’uko ababirokotse babayeho ngo rwumve neza akababaro kabo rugashingireho rubarenganura mu bujurire batanze.

Ayo mashusho aberekana basobanura n’ikiniga cyinshi amajoro yababereye maremare ubwo baterwaga n’abarwanyi ba FLN; yerekanwe mu iburanisha ry’urubanza ruregwamo Paul Rusesabagina washinze akanayobora MRCD/FLN na bagenzi be 20 bakurikiranyweho ibyaha by’iterabwoba. Ni kuri uyu wa 8 Gashyantare 2022.

Muri ayo mashusho abarokotse ibyo bitero bavugamo ko babanje kugira ngo ni abajura bateye ariko bakaza kumenya ko ari abarwanyi.

Basobanura ishavu batewe no kubura ababo bishwe, abandi bakagirwa ibisenzegeri n’amasasu barashwe ndetse n’inkoni bahondaguwe bagerageza kwirwanaho mbere yo gutabarwa n’ingabo z’u Rwanda.

Mu byifuzo byabo bavuze ko bifuza ko abaregwa bahanwa by’intangarugero kuko ibyo bakoze ari ubugome n’ubugwari.

Nyuma y’aho abunganira abaregwa bongeye kugaragaza amashusho ya Nsabimana Callixte alias Sankara yemera ko ari FLN yagabye ibitero by’i Nyabimata n’ibyo muri Nyungwe byatwikiwemo imodoka; n’aya Pasteur Niyomwungere Constantin avuga uko Rusesabagina yavuze ngo yababajwe n’uko Sankara yahishuye ko ari bo babigabye kandi byaragombaga kwitirirwa RDF.

Perezida w’Inteko Iburanisha, Rukundakuvuva François Regis, yasabye abo bunganizi guhuza amashusho n’ibyo bashaka kumvikanisha.

Me Mukashema yavuze ko bifuza guhuza ayo mashusho n’abaregera indishyi batazihawe by’umwihariko abavuze ko bibwe.

Yavuze ko kuba abaturage bivugiye ko basahuwe na Sankara akaba yarigeze kuvugira mu Rukiko ko Moran wateguraga ibitero byo muri Nyungwe atakoreshaga amafaranga uko babimusabye, byashingirwaho hemezwa ko abagabye ibitero batwaye ibintu by’abatuye aho bateye.

Ku buhamya bwa Pasiteur Niyomwungere, Me Mukashema Marie Louise yabwiye Urukiko ko bashakaga kwerekana akababaro k’abarokotse ibitero kuko uwo mugabo yavuze ngo yababajwe na byo cyane kandi ataragizweho ingaruka na byo.

Yabwiye Urukiko rw’Ubujurire ko rwazagerageza kumva akababaro bafite niba bahabwa indishyi baka n’abavuze ko bibwe ariko bimwe bakabiburira ibimenyetso bagatekerezwaho.

Iburanisha ryazanywemo abatangabuhamya

Kuva uru rubanza rwatangira kuburanishwa mu bujurire, bwa mbere haje abatangabuhamya babiri. Bari baje gusobanura uko ibitero byagenze nk’ababirokotse.

Uwitwa Murindangabo Callixte w’i Nyabimata muri Nyaruguru, yabanaga na Gitifu wa Nyabimata warashwe akanatwikirwa imodoka.

Yavuze ko baterwa hari saa tanu zishyira saa Sita z’ijoro yumva telefoni y’Umuyobozi ihamagawe arayitaba.

Akimara kwitaba yarasohotse ajya muri Salon maze abantu baramukomangira ababaza abo ari bo ntibamusubiza.

Yakuyeho ‘rideau’ abona bitwaje intwaro arikanga asubira inyuma. Bahise batangira kurasa.

Bahise batwika imodoka yari hanze maze n’icyumba yarimo gitangira gushyuha cyane agira ubwoba ngo arahiramo, ajya mu cyumba cya Gitifu nubwo barasaga bamushakira hose na ho baherekeza amasasu.

Ati "Nagiye mu cyumba cye nkihagera ntangira gukandagira mu maraso menya ko bamurashe. Nakoze ku buriri ndamubura musanga munsi y’igitanda. Nanjye narahamusanze mpamara nk’iminota 40."

Ya maraso yatembaga n’amazi yari yavuye mu majerekani barashe, ngo yumvishe bibaye byinshi kandi n’ibkoresho bimwe by’umuriro w’amashanyarazi byari byayaguyemo atangiye kubakurura.

Yahengereje hanze ntiyababona atekereza ko bagiye. Yamusabye kuza bagahunga ariko ntiyamwumva kuko bari bamurashe mu mutwe.
Kubera guhahamuka ngo yaramubwiye ngo basohoke aramusubiza ngo "Undase ariko ntuntere icyuma".

Murindangabo ati "Naramubwiye nti ni njyewe, arambaza ngo mbese ba bantu bagiye, mubwira ko ari umwana mbonye hanze."

Yaramusohoye bafite ubwoba ko nibababona barabarasa. Yaramumanuye baragenda bagera aho yasabye ko bamufasha, umugore n’umugabo baza kumufasha kugera kwa muganga.

Aho bavaga hari abarwanyi no kwa muganga bahari. Icyakora bageze hafi y’aho, abarwanyi bagiye.

Hashize akanya gato bageze ku bitaro ngo yabonye Chairman wa FPR i Nyabimata bamuzanye bamuhetse yarashwe.

Bahise bahamagara Polisi, mu gihe kitarambiranye imodoka za gisirikare zibageraho aho bari bari.

Gitifu bahise bamwuriza imbangukira gutabara bamujyana ku Bitaro bikuru bya Kaminuza bya Butare (CHUB).

Shoferi wahizwe bukware agakingirwa ikibaba n’abagenzi

Undi mutangabuhanya wazanywe ni Rurangwa Patrick. Uyu ni umwe mu bari batwaye imodoka zatwikiwe muri Nyungwe, avuye Kigali agiye i Rusizi.

Yasobanuye ko ageze muri Nyungwe yabonye umuntu ajugunye igiti mu muhanda ariko kuko bari basanzwe bahanyura ibiti biri mu muhanda bakabanza kubikuramo agira ngo ni ko bimeze.

Yabonye abantu benshi baturutse mu ishyamba agira ubwoba asubiza imodoka inyuma. Baje bamusanga barasa mu gusubira inyuma agonga ipoto y’amashanyarazi.

Yafashe feri arahagarara, maze ajya mu bagenzi. We n’abandi baryamishijwe bubitse inda amaboko ari hejuru.

Imbere ye hari umuntu ufite umupanga, ufite ubuhiri n’ufite icyuma. Babinjije mu ishyamba barabasaka ariko we bari bamurashe ku kaboko avirirana.

Yavuze ko uwo basanganaga ibyangombwa babimwakaga, bakamubaza ibyo akora n’amafaranga afite.

We bamugezeho abeshya ko yari agiye kurangura amakara mu Bugarama.

Bashakaga shoferi washatse kubacika ariko n’abagenzi bamugirira ibanga kuko bamushakaga bidasanzwe.

Babarobanuyemo 10 barabajyana babikoreje ibyo bakuye mu modoka.

Amaraso yakomeje kuva ari menshi baramubwira ngo bamudode, yemeye bazana ikoroshi n’umugwegwe.

Yabasabye ko bazamudoda ejo habona kuko hari hamaze kuba nka saa yine z’ijoro.
Bakomeje kubajyana babageza aho baruhukira nka saa kumi n’imwe, babaha igikoma n’amandazi akomeye cyane. Ngo kurimira byasabaga kurijabika mu mazi.

Barongeye bakora urugendo, bigeze nka saa tanu z’amanywa babicaza hamwe barahagota ngo umuyobozi wabo abwira abarwanyi ngo bacungane n’indege.

Bababajije ushaka kuba umusirikare wabo, Rurangwa avuga ko arwaye diabete na HIV bityo ko atabasha gukora igisirikare.

Bamukubise ikintu mu rukenyerero bamubwira ko ajya kubara urwo yabonye kandi ko "bari tayari".

Yasubiyeyo afite ubwoba ko bamurasa ariko ntibamurasa.

Yageze imbere abonye aho baraye bamanuka aratinya, asubira inyuma ngo apfane n’abandi.

Asubiye inyuma yahuye na bo babarekuye basigarana umwe.

Bari babahaye igikoma mu kajerekani. Bageze imbere bananiwe bararyama, ingano za RDF zihabasanze aba ari zo zibagarura.

Iburanisha ryasojwe saa cyenda n’iminota 22. Rizasubukurwa ku wa Kane tariki 10 Gashyantare 2022 hakomeza kumvwa ikibazo cy’indishyi zajuririwe.

Abunganira abaregwa bongeye kugaragaza amashusho ya Nsabimana Callixte alias Sankara yemera ko ari FLN yagabye ibitero by’i Nyabimata n’ibyo muri Nyungwe byatwikiwemo imodoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .