00:00:00 IGIHE NETWORK KN KINYARWANDA EN ENGLISH FR FRANCAIS

Abashegeshwe n’ibitero bya P5 na RUD-Urunana baregeye indishyi za miliyoni 188 Frw, abafashwe mbere babyamaganira kure

Yanditswe na Iradukunda Serge
Kuya 15 Nzeri 2021 saa 02:21
Yasuwe :
0 0

Abiciwe ababo, abakubiswe n’abasahuriwe mu bitero byagabwe n’inyeshyamba za P5 na RUD-Urunana mu Karere ka Musanze mu Ukwakira 2019 baregeye Urukiko Rukuru rwa Gisirikare basaba indishyi z’akababaro.

Kuri uyu wa 15 Nzeri 2021, ni bwo Abacamanza mu Rukiko Rukuru rwa Gisirikare bakiriye ikirego cyatanzwe n’abaregera indishyi.

Ni ikirego cyatanzwe mu gihe hari kuburanishwa abarwanyi 36 ba P5 na RUD-Urunana, barimo abafashwe n’Ingabo z’u Rwanda ubwo bagabaga ibitero ku wa 4 Ukwakira 2019 n’abandi bagiye bafatwa nyuma.

Muri uru rubanza abaregera indishyi z’akababaro n’ibyangijwe uko ari 19 bahagarariwe n’abanyamategeko batatu. Igiteranyo cy’indishyi baregera ni miliyoni 188 Frw.

Aba banyamategeko batangiye bagaragariza Inteko Iburanisha, abaregera indishyi n’ingano zazo, ibimenyetso bashingiyeho batanga ikirego ndetse n’icyo amategeko ateganya ku bijyanye no kuregera indishyi.

Bavuze ko Ingingo 10 yo mu Gitabo cy’Amategeko ahana y’u Rwanda yemera ko umuntu yatanga ikirego cy’indishyi, bavuga ko na bo ariyo bagendeyeho mu gutanga ikirego.

Mu baregeye indishyi z’akababaro n’ibyangijwe harimo Madarasi Simon, wiciwe umwana. Yagaragaje ko agomba guhabwa indishyi z’akababaro za miliyoni 5 Frw. Nyina n’abavandimwe batandatu ba nyakwigendera na bo basabye guhabwa indishyi ya miliyoni 5 Frw kuri buri umwe.

Undi wasabye indishyi ni Mutezinka Verdiane wagaragaje ko we n’umugabo we ubwo igitero cyabaga bari bafite akabari gacuruza ibihumbi 200 Frw ku kwezi. Kuva cyaba ngo ntibongeye gukora aka kazi kabo bitewe n’ihungabana cyabasigiye.

Abahagarariye uyu muryango mu mategeko kandi bagaragaje ko ibi bitero byaguyemo umukobwa wabo. Ku bijyanye n’uyu mwana uyu muryango wasabye ko wahabwa indishyi z’akababaro za miliyoni 10 Frw.

Mutezinka kandi yasabye ko yazahabwa izindi ndishyi z’akababaro zingana na miliyoni 15 Frw kubera undi mwana we w’umuhungu wamugajwe n’ibi bitero. Yavuze ko asaba aya mafaranga kuko uyu munsi uyu mwana nta kintu na kimwe ashobora kwimarira.

Nyiramafurebo Spéciose na we uherutse kugaragara muri uru rubanza nk’umutangabuhamya na we yasabye ko yazahabwa indishyi z’akababaro za miliyoni 30 Frw ku bw’urupfu rw’umukobwa we waguye muri iki gitero.

Izi ndishyi za miliyoni 30 Frw zirimo miliyoni 10 Frw yasabye ko yahabwa ku giti cye nk’umubyeyi wa nyakwigendera n’izindi zingana na miliyoni 20 Frw zizahabwa abana bato nyakwigendera yasize kuri ubu bakaba bari kurerwa na nyirakuru.

Undi wasabye guhabwa indishyi z’akababaro n’ibyangijwe ni Niyonshuti Isaac wari umucuruzi ufite na nimero imuranga ubwo iki gitero cyabaga. Yatse indishyi z’akababaro n’ibyangijwe za miliyoni 10 Frw kuko iki gitero cyasahuye iduka ndetse bikaba byaranagarajwe na raporo yakozwe n’Umurenge wa Musanze.

Hategekimana Elie watewe ibyuma mu mutwe n’aba barwanyi we yasabye kuzahabwa indishyi za miliyoni 5 Frw kuko iki gikorwa cy’ubugizi bwa nabi cyamusigiye ubumuga.

Ikijyanye no kwaka indishyi Hategekimana agihuriyeho na Nshimiyimana Emmanuel wakomerekejwe n’ibi bitero mu mutwe no ku maboko.

Aba banyamategeko bavuze ko Nshimiyimana yari asanzwe akora ubuhinzi ariko kubera iki kibazo yahuye nacyo atakibasha kubukora, yasabye guhabwa indishyi za miliyoni 10 Frw.

Mu bandi baregeye indishyi harimo Nyirabarisasa, usaba iza miliyoni 10 Frw kubera ko yatewe ubumuga n’ifuni yakubiswe. Kazinka Jacques asaba miliyoni 12 Frw kubera ko yakubiswe imbunda mu mutwe bikamuviramo ubumuga butuma akakibasha gukora; Munyamasizi yaregeye indishyi za miliyoni 15 Frw na 10 Frw z’ubumuga yatewe mu gihe Munyankindi Ntampamvu yasabye indishyi za 5.020.000 Frw kuko yari umukarani ukorera 2000 Frw ariko kuri ubu akaba atakibasha gukora aka kazi kubera ubumuga.

Nkamirabega Jean Damascène uri mu bakomerekeye muri iki gitero yasabye indishyi z’akababaro za 5.500.000 Frw n’iz’ubumuga yatewe za miliyoni 5 Frw, mu gihe Hagumimana Michel yasabye ko yazahabwa indishyi za miliyoni 9 Frw kubera ko yakomerekejwe.

Aba banyamategeko bavuze ko mu kugena izi ndishyi bagiye begera abakiliya babo bakababwira amafaranga bumva bifuza bitewe n’ibyabo byangijwe, basaba urukiko kuzasuzumana ubwitonzi ubusabe bwabo.

Abafashwe mbere ntibabikozwa

Uretse abafashwe ku munsi w’igitero n’abagiye bafatwa nyuma yacyo, mu baregwa harimo n’abafashwe mbere y’igitero cyo muri Musanze n’Ingabo za Repubulika Iharanira Demokarasi ya Congo na Monusco, bashyikirizwa u Rwanda.

Aba bo basabye ko batacibwa indishyi z’akababaro kuko batagize uruhare muri iki gitero cyo muri Musanze.

Ndagijimana Zacharie yasabye Urukiko kutazamuca indishyi. Ati “Nabanza guhoza imiryango yabuze ababo, nkavuga ko izo ndishyi zahabwa agaciro gakomeye, nkongera nkibutsa ko icyaha ari gatozi, abemeye bagomba guhanwa. Njye nafashwe ku wa 4 Kamena 2019 nshyikirizwa u Rwanda ku wa 18 Kamena 2019. Ibyo byabaye mfunzwe na Leta y’u Rwanda ku bw’ibyo ndumva iby’indishyi bitandeba.”

Mu bandi bagaragaje ikibazo nk’icye harimo na Ngiruwonsanga Moses.

Inteko Iburanisha yahaye umwanya abanyamategeko b’abakurikiranywe kugira ngo bagire icyo bavuga kuri iki kirego.

Me Marie Grace wunganira Humura Emmanuel yavuze ko ibijyanye n’indishyi yumva ntaho bihuriye n’umukiliya we kuko yemera icyaha kimwe gusa cyo kwinjira mu mutwe w’ingabo utemewe. Bityo asaba ko atacibwa indishyi kuko atemera ibindi byaha bisabirwa indishyi.

Umucamanza yabwiye Me Grace ko ibyo avuga atari byo kuko urukiko rutaragaragaza niba koko umukiliya we ari umwere kuri ibi byaha bindi.

Me Grace yakomeje avuga ko umukiliya we mu gihe yaba ahamijwe ibi byaha bindi nta hantu na hamwe yakura indishyi zasabwe. Abunganira bahise basaba ijambo bagaragaza ko indishyi zishobora kuva mu byo umuntu afite ubu cyangwa azagira.

Nyuma yo kumva iki kibazo, Umucamanza yabajije abahagarariye abasaba indishyi niba barega buri wese uri muri uru rubanza cyangwa niba haregwa abagize uruhare mu gitero cyo muri Musanze.

Aba banyamategeko bavuze ko ikirego cy’indishyi kireba buri wese uri mu bakurikiranywe. Bavuze ko ibi babishingira ku miterere y’icyaha cy’iterabwoba aba barwanyi bose bakurikiranyweho, ngo kuko nubwo batagize uruhare rutaziguye muri iki gitero, ibyo bakoraga byose ariho byaganishaga.

Umucamanza yafashe umwanya abaza aba banyamategeko icyo bavuga ku kuba aba barwanyi bavuga ko igitero cyabaye bari mu maboko ya Leta y’u Rwanda batakibarizwa mu mitwe y’iterabwoba.

Mu gusubiza bavuze ko kuba umwe muri aba barwanyi yarageze hagati akavamo cyangwa agashyikirizwa ubuyobozi bw’u Rwanda mbere y’uko igitero kiba bitavuze ko yaba atarakigizemo uruhare.

Bavuze ko aba barwanyi nubwo baba barafashwe mbere bitababuza kuba baratanze inkunga muri iki gitero cyane cyane izijyanye n’inama.

Nyuma yo kumva impande zombi, Inteko Iburanisha yapfundikiye iburanisha ivuga ko rizakomeza ku wa 19, 20 na 21 Ukwakira 2021.

Abagizweho ingaruka n'ibitero by'inyeshyamba za P5 na RUD-Urunana baregeye indishyi
Ababonye ibyabaye mu gitero izi nyeshyamba zagabye muri Musanze ku wa 4 Ukwakira 2019 batanze ubuhamya
Abaregwa bahawe umwanya, ababunganira mu mategeko bagira icyo bavuga ku birego bitandukanye baregwa
Inteko Iburanisha mu Rukiko Rukuru rwa Gisirikare yagize umwanya wo kumva abatangabuhamya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .