00:00:00 IGIHE NETWORK KN KINYARWANDA EN ENGLISH FR FRANCAIS

Sanlam yihuje na Allianz bikora ikigo cy’ubwishingizi kizatanga serivisi ku rwego rwa Afurika

Yanditswe na Cyprien Niyomwungeri
Kuya 6 May 2022 saa 11:33
Yasuwe :

Ikigo cy’Ubwishingizi, Sanlam n’ikigo Allianz kizobereye muri serivisi z’ubwishingizi no gucunga imitungo y’ibindi bigo, byahuje imbaraga mu rwego rwo gutanga serivisi nziza z’ubwishingizi ku batuye Afurika.

Itangazo rigenewe abanyamakuru rivuga ko iyi mikoranire izafasha abakiliya b’ibi bigo bikorera henshi muri Afurika kubona serivisi z’ubwishingizi zibanogeye. Mu gihugu icyo ari cyo cyose Sanlam cyangwa Allianz bikoreramo, hazashyirwa icyicaro cya buri kigo.

Iri tangazo rivuga ko Namibia igiye gushyirwa mu bihugu birebwa n’iyi mikoranire ariko Afurika y’Epfo yo ntabwo irimo.

Imikoranire ya Sanlam na Allianz izarema ikigo kinini cy’ubwishingizi muri Afurika kandi byitezwe ko kizaba kiri muri bitatu bya mbere mu kwiharira isoko aho bikorera. Serivisi z’ibi bigo zizatangirwa mu bihugu 29 bya Afurika kandi ingengo y’imari iteganyijwe mu mikoranire ya biriya bigo ni Miliyari 33 z’amafaranga akoreshwa muri Afurika y’Epfo yitwa Rand, ni ukuvuga miliyari hafi ebyiri z’amayero.

Sanlam na Allianz bizashyira imbaraga mu gufatanya n’abandi bakora iby’ubwishingizi no gushyiraho izindi gahunda z’ubwishingizi zigamije guha abakiliya babyo serivisi z’indashyikirwa bakeneye.

Uku kwihuza kandi kuzazamura agaciro k’abanyamigabane kuko ubukungu bw’ibigo buziyongera ku rundi rwego, ibihugu bikoreramo byaguke, isoko rihuriweho ribe rinini n’ubwoko bw’ubwishingizi butangwa bube bwinshi bigendanye n’amahitamo ya buri mukiriya.

Ubuyobozi bwa Sanlam buvuga ko guhuza ubunararibonye ifite ku isoko rya Afurika n’ubwo Allianz ifite ku rwego mpuzamahanga mu gutanga ibisubizo by’ubwishingizi, bizatuma hiyongera ubwishingizi bw’ubuzima n’ubwishingizi rusange no guhanga udushya muri serivisi zitangwa.

Umuyobozi mukuru w’ikigo Sanlam, Paul Hanratty yagize ati “ Bigendanye n’intego za Sanlam harimo no kuba ikigo cya mbere muri Afurika gitanga serivisi nziza kandi zihuse mu by’ubwishingizi, ubu bufatanye buzatuma twihuta mu kubigeraho, dutange serivisi nziza zikenewe na buri wese mu bakiliya bacu. Twishimiye kuzakorana na Allianz.”

Ku rundi ruhande, umuyobozi wa Allianz, Christopher Townsend, avuga ko ubufatanye bwabo na Sanlam ari ingirakamaro kugira ngo bakomeze gutanga serivisi zinoze.

Ati "Sanlam isangiye n’ikigo cyacu indangagaciro, intego yacu ni uko abakiliya bacu bagira umutekano w’ahazaza kandi tukagera ku mugambi wo kwaguka ku isoko mu buryo burambye".

Ikigo cy’ubwishingizi Sanlam gisanzwe gifite icyicaro muri Afurika y’Epfo ariko gikorera muri Namibia, Botswana, Eswatini, Zimbabwe, Mozambique, Mauritius, Malawi, Zambia, Tanzania, u Rwanda, Uganda, Kenya na Nigeria.

Gifite n’amashami muri Maroc, Angola, Algeria, Tunisia, Ghana, Niger, Mali, Senegal, Guinea, Burkina Faso, Cote D’Ivoire, Togo, Benin, Cameroon, Gabon, Repubulika ya Congo, Madagascar, Burundi na Lesotho.

Allianz yo ni ikigo mpuzamahanga gifite imari shingiro ingana na miliyari 809 z’amayero kigakorera mu bihugu 70 ku migabane yose y’isi. Ni ikigo gifite n’akazi ko gucunga umutungo w’ibindi bigo ungana na miliyari ibihumbi bibiri kandi gikoresha abakozi 155.000 kikaba cyarinjije muri rusange miliyari 148,5 z’amayero n’inyungu y’ibikorwa ingana na miliyoni 13,4 z’amayero.

Sanlam ni kimwe mu bigo by'ubwishingizi gikorera mu bihugu byinshi birimo n'u Rwanda
Umuyobozi mukuru w’ikigo Sanlam, Paul Hanratty, avuga ko ukwihuza kw'ibi bigo kuzarushaho gutanga serivisi nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .