00:00:00 IGIHE NETWORK KN KINYARWANDA EN ENGLISH FR FRANCAIS

The Coca-Cola Foundation yatanze asaga miliyoni 141 Frw azakoreshwa mu guhangana na Covid-19 mu Rwanda

Yanditswe na Ntabareshya Jean de Dieu
Kuya 4 June 2022 saa 08:46
Yasuwe :

Mu gihe u Rwanda rukomeje ibikorwa byo guhangana na Covid-19, The Coca-Cola Foundation yahaye Croix Rouge y’u Rwanda inkunga ya miliyoni ijana na mirongo ine n’imwe (141,209,420) y’amafaranga y’u Rwanda azifashishwa mu bikorwa by’ubukangurambaga bwo kurwanya icyorezo cya Covid-19.

Imyaka ibiri n’amezi hafi atatu irashize u Rwanda ruhanganye n’Icyorezo cya Covid-19 kimaze igihe gihangayikishije Isi.

Hakozwe byinshi bigamije guhangana n’ikwirakwira ryacyo birimo ubukangurambaga bwari bugamije guhwitura abaturage kwambara agapfukamunwa n’izindi ngamba zo kwirinda ikwirakwira ry’iki cyorezo zirimo no guhana intera ndetse no gukaraba intoki.

U Rwanda kandi rwahise rutangira urugamba rwo gukingira abaturage barwo rwiha intego ko rugomba gukingira byuzuye abaturage nibura 60% by’abaturage barwo mu 2022.

Kugeza ubu urebye ibikorwa byo gukingira bigenda bitanga umusaruro ukurikije n’umuvuduko u Rwanda ruriho, dore ko abamaze gukingirwa doze ya mbere bangana na 69% nubwo hifuzwa kugera 70%, abahawe doze ebyiri bageze kuri 65% mu gihe doze yo gushimangira imaze kugera kuri 35% by’abakingiwe.

Ibi kandi bigira n’ingaruka nziza ku rugendo rwo guhashya Covid-19 cyane ko n’imibare y’abandura igenda igabanyuka ndetse ari nako ingamba zigenda zoroshywa, zimwe na zimwe zigakurwaho.

Ni muri urwo rwego umuryango The Coca-Cola Foundation yahisemo gutera inkunga ibihugu bitandukanye byo muri Afurika mu bikorwa bigamije kurandura Covid-19.

Mu Rwanda, uyu ni umushinga wa kabiri uyu muryango The Coca-Cola Foundation igiye kugiramo uruhare, binyuze mu bufatanye n’inzego za Leta zitandukanye ndetse bigashyirwa mu bikorwa na Croix Rouge y’u Rwanda.

Inkunga ya mbere muri 2020 ya miliyoni ijana na mirongo itanu (150,000,000) yakoreshejwe mu gutanga ibikoresho ku bari ku ruhembe mu kurwanya Covid-19 barimo abakoranabushake n’abandi bakurikiraniraga hafi ubuzima bw’abaturage.

Kuri iyi nshuro iyi nkunga yashyikirijwe Croix Rouge biteganyijwe ko izifashishwa mu bikorwa by’ubukangurambaga ndetse no gufasha abatabasha kugera ahantu ho gukingirirwa mu bice bitandukanye by’igihugu.

Aline Pascale Batamuliza, Umuyobozi w’ishami rishinzwe Inozamubano n’Itumanaho muri Bralirwa, dore ko ari yo yari ihagarariye The Coca-Cola Foundation muri icyo gikorwa, yagaragaje ko gutanga iyi nkunga byashingiye ku kuba iyatanzwe mbere yarakoreshejwe neza kandi ko bigaragara ko icyorezo kitararangira.

Ati “Amafaranga yatanzwe na The Coca-Cola Foundation nk’inkunga ya mbere yakoreshejwe neza bitera ishema umuterankunga bituma twongera kugira ikindi cyiciro. Icyorezo ntabwo kirarangira n’ingamba zo gukingira ziracyahari, rero turumva natwe tutasigara inyuma nk’abantu twatangiranye tugomba gukomezanya uru rugendo.”

Yavuze ko kuba Croix Rouge y’u Rwanda isanzwe ifite inararibonye mu bikorwa byo guhangana na Covid-19 binyuze mu bukangurambaga bayisaba gukomeza kubinoza neza ku buryo abaturage bakomeza kwishimira izo serivisi.

Umukozi ushinzwe imicungire y’ibiza muri Croix Rouge y’u Rwanda, Tumwebaze Fred, yavuze ko ibyo bazibandaho ari ibikorwa by’ubukangurambaga no gufasha abatoroherwa no kugera aho bikingiriza kandi basanzwe bafite ubunararibonye.

Ati “Ni ibikorwa tugenda dukora kuko dufite, uburyo tubikora kandi tubimenyereye. Kugeza ubu imbaraga Croix Rouge ifite mu bukangurambaga ni abakorerabushake dufite guhera ku rwego rw’igihugu kugera ku mudugudu. Twarwanyije Covid-19 mu buryo butandukanye bwo gufasha abantu tubakangurira kwirinda, kubaha ibikoresho n’ibindi.

Bishobora kuba bigaragara ko u Rwanda rwihuse mu mibare y’abantu bakingiwe tukibwira ko bisigaye byoroshye kugera kuri 70%, ariko ikigaragara ni uko urugendo rurangiye ari rwo rworoshye urusigaye akaba ari rwo rukomeye kuko ubu abantu basigaye ubu n’ugushakisha no gukomeza kubakangurira tubasanga mu ngo zabo kugirango bumve umumumaro wo kwikingiza, bizadusaba imbaraga nyinshi no kutadohoka kugirango imibare isigaye igerweho kandi vuba.

Yakomeje agira ati “Dufatanyije na Minisiteri y’Ubuzima tuzamenya ahantu hari icyuho kuko dufite uburyo bwo guhamagara ku buntu. Abantu badafite uburyo bwo kugera kuri site y’ikingira bashobora guhamagara bakatubwira. Tuzaba dufite imodoka ziteguye tukabareba noneho bakagezwa aho bakingirirwa.”

Iyo urebye umuvuduko u Rwanda rwagendeyeho mu bikorwa byo gukingira no guhangana n’ikwirakwira rya Covid-19 ubona ko hakoreshejwe imbaraga nyinshi n’ubwo Umuyobozi w’ishami rishinzwe serivise zo gukingira mu kigo cy’Igihugu Gishinzwe Ubuzima RBC, Sibomana Hassan yagaragaje ko aho bigeze harimo imbogamizi yo kuba bamwe mu baturage batarumva neza impamvu yo gukingirwa byuzuye.

Ati “Hari abantu batarakangukira ibikorwa by’ikingira, nubwo navuze ko tugeze kuri 65% turifuza kugera kuri 70%. Turacyafite umubare w’abantu batarikingiza byuzuye n’abatarishimangiza. Uyu ni umwanya mwiza wo kongera kwibutsa abaturage ko Covid-19 nubwo yagenjeje make itarangiye, kugira ngo izarangire neza ni uko buri wese akwiye kumva ko ari inshingano kuba yikingije neza.”

Uyu mushinga watewe inkunga na The Coca-Cola Foundation wiswe “Stop the Spread” uzakorera mu turere dusanga icumi two mu Rwanda, ibikorwa byawo byose bizagera ku baturage bagera ku bihumbi magana abiri na makumyabiri na bitanu (225,000).

Bralirwa ni uruganda rwatangiye gukorera mu Rwanda mu 1957 rwenga ibinyobwa bisembuye n’ibidasembuye. Mu mwaka wa 1974 ikaba yarahawe uburenganzira bwo kwenga no gucuruza ibinyobwa bidasembuye bya Coca-Cola kugeza n’uyu munsi.

The Coca-Cola Foundation ni umuryango washinzwe n’ikigo mpuzamahanga gikora kikanacuruza ibinyobwa bidasembuye The Coca-Cola Company, uwo muryango ukaba ufite inshingano zo gutera inkunga no gushyigikira ibikorwa bizamura imibereho myiza y’abaturage. The Coca-Cola Foundation yashinzwe mu 1984, kuva icyo gihe kugera uyu munsi kimaze gutanga inkunga igera kuri miliyali y’amadorali y’Amerika mu bikorwa bifasha iterambere ry’umuturage.

The Coca-cola Foundation yatanze amafaranga azifashishwa mu kongera ubukangurambaga
Habaye ibiganiro bigamije kwerekana uruhare The Coca-cola yifuza kugira mu kurwanya Covid-19 binyuze muri iyi nkunga
Ndimbati Pierre Claver umukozi muri Croix Rouge y'u Rwanda nawe yari yitabiriye iki gikorwa
Umukozi ushinzwe imicungire y’ibiza muri Croix Rouge y’u Rwanda, Tumwebaze Fred, yavuze ko ibyo bazibandaho ari ibikorwa by’ubukangurambaga
Umukozi mu kigo cy’Igihugu gishinzwe ubuzima RBC ushinzwe gahunda zo gukingira, Sibomana Hassan yavuze ko nubwo Covid-19 iri kugabanyuka ariko itararangira
Umuyobozi ushinzwe ishami rishinzwe Inozamubano n’Itumanaho muri Bralirwa, Aline Pascale Batamuliza yavuze ko bifuza gukomeza gukorana na Leta mu rugamba rwo kurwanya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .