Abanyamahoteli bagaragaje kubahiriza ingamba zo kwirinda Covid-19, basaba ko amasaha y’akazi yongerwa

Yanditswe na Twarabanye Venuste
Kuya 26 Gicurasi 2020 saa 09:50
Yasuwe :
0 0

Ihuriro ry’Amahoteli na Restaurant mu Rwanda ryashimye uburyo hoteli na restaurants biri kubahiriza ingamba zo kwirinda ikwirakwira rya Covid-19, risaba ko amasaha yo gukora yakongerwa nibura agashyirwa saa sita z’ijoro.

Inama y’Abaminisitiri yateranye ku wa 30 Mata 2020 igamije kongera kwiga ku cyorezo cya Covid-19 n’ingamba nshya zo kugikumira, yemeje ko bumwe mu bucuruzi na serivisi bifungurwa harimo amahoteli na restaurants.

Zatangiye gutanga serivisi kuwa 4 Gicurasi 2020 zisabwa gukomeza ibikorwa mu buryo bwubahiriza ingamba zo kwirinda Coronavirus kandi zigafunga saa moya z’umugoroba.

Kuwa 11 Gicurasi Urwego rw’igihugu rw’Iterambere (RDB) rwongeyeho ibwiriza ryo kwandika abagana amahoteli, ama-restaurants n’ahandi hafatirwa amafunguro n’ibyo kunywa, ruvuga ko ari amakuru azabikwa mu ibanga aho bizaba ngombwa akazifashishwa mu gushaka amakuru ajyanye na Covid-19.

Kuva ku wa Gatanu ushize, Ihuriro ry’Amahoteli na Restaurants mu Rwanda, ryafashe icyemezo cyo gusura amahoteli na restaurants mu rwego rwo kureba uburyo bene zo n’abazigana bari gufatanya kubahiriza amabwiriza yo kwirinda ikwirakwira rya Coronavirus.

Umuyobozi w’iryo huriro, Barakabuye Nsengiyumva, yavuze ko muri rusange abanyamahoteli bishimira ko bahawe uburyo bwo gukomeza ibikorwa byabo kandi ko bumvise ko batagomba guha icyuho icyorezo cya Coronavirus.

Muri rusange ngo amahoteli yubahirije ibisabwa birimo kwandika no gupima umuriro abayagana, gukaraba intoki, guhana intera [uburyo intebe n’ameza biterwa] , kudafungura utubari, kwirinda guhererekanya amafaranga mu ntoki n’ibindi.

Zimwe muri restaurants IGIHE yasuye zashyizeho abakozi bashinzwe gutunganya ameza umukiliya yakoresheje mbere yuko haza kwicara undi, bakoresheje imiti yabugenewe.

Umukozi wa Pili Pili restaurant, Ndayizigiye Obald yavuze ko “aho umukiliya ahagurutse bahita bashyiraho ikimenyetso cyerekana ko hatari kwakira abakiliya kugira ngo babanze kuhatunganya.”

Umuyobozi wa restaurant yitwa Inka SteakHouse, Nikole Ansoni yavuze ko nubwo nk’abikorera bahanganye no kubaka ubucuruzi bwabo, bashyize imbere gukora barinda abakozi n’abakiliya.

Ati “Ibi ni ibihe bikomeye kuri buri wese mu rwego rw’abikorera by’umwihariko ku rwego rw’amahoteli. Abakozi bacu nanjye ubwanjye tubanza gupima umuriro n’abakiliya bacu baza kugira ngo tumenye ko bameze neza, ikindi tukamenya ko hari umuti wo gusukura intoki bakaraba binjira. Nubwo turi kureba ko ubukungu bwazahuka, turi gukora mu buryo bwo kwirinda haba ku bakozi n’abakiliya bacu.”

Umuyobozi w’Ihuriro ry’Amahoteli mu Rwanda, Barakabuye Nsengiyumva, yavuze bashimye uburyo amahoteli na restaurants bari kubahiriza ingamba zo kwirinda ikwirakwira rya Covid-19, avuga ko ari ikimenyetso cy’uko biteguye gukora kandi birinda icyo cyorezo. Cyakora ngo bagaragaza ko amasaha y’akazi akiri makeya.

Ati “Utubazo tumwe na tumwe bagiye bagaragaza ni uko amasaha y’akazi akiri makeya. Mbonereho umwanya wo kugira ngo nsabe n’ababishinzwe ko bareba uko bakongera amasaha. Abanyamuryango biteguye gukora ariko banarwanya ikwirakwira ry’iki cyorezo.”

Raporo y’Ishami ry’Ubukerarugendo mu Rugaga rw’Abikorera, PSF, iherutse kugaragaza ko muri Werurwe bwagize igihombo cya Miliyari 34.9 Frw, bitewe n’inama zasubitswe n’ibindi bikorwa by’ubukerarugendo byahagaritswe.

Ibi bihombo byaje bisanga urwego rw’ubukerarugendo mu Rwanda rufite inguzanyo za miliyari 87.7 Frw, aho urwego rw’amahoteli arirwo rwihariye inguzanyo nini kuko rufite izingana na miliyari 83.8 Frw.

Nsengiyumva avuga ko abanyamuryango bagaragaje ko amasaha y’akazi abaye saa sita abantu bajya bafunga saa tanu z’ijoro bikabafasha kuzahura ubukungu bwashegeshwe na Covid-19.

Ati “Muri rusange bigejeje saa sita z’ijoro bisobanuye ko abantu bajya bahagarika akazi saa tanu. Ibyo byafasha mu kuzamura bizinesi, n’ubukungu kandi dukumira na cya cyorezo kandi byagira icyo bitanga.”

Muri rusange ngo restaurants nyinshi zarafunguye ariko serivisi za hoteli ziracyafite ikibazo ahanini bitewe n’ingendo hagati y’Intara n’umujyi wa Kigali zigifunze, imipaka n’ingendo z’indege. Hoteli zimwe na zimwe zafunguye serivisi za Restaurants naho amahoteli manini yo ntarafungura na bike mu bikorwa byayo.

Abakozi n'abakoresha bapimwa umuriro mbere yo gutangira akazi n'abakiliya binjiye bagapimwa
Amahoteli na restaurants yashyize ahagaragra uburyo bwo gukaraba intoki ndetse akabyibutsa buri wese winjira
Ibyicaro byateguwe kuburyo abicaranye baba bahanye intera isabwa
Umuyobozi w'Ihuriro ry'Amahoteli mu Rwanda, Barakabuye Nsengiyumva yavuze bashimye uburyo amahoteli na restaurants bari kubahiriza ingamba zo kwirinda ikwirakwira rya Covid 19
Abanyamahoteli bagaragaje kubahiriza ingamba zo kwirinda Covid-19, basaba ko amasaha y’akazi yongerwa. Umuyobozi wa Pili Pili Restaurant Rudy Gharini (iburyo) yavuze ko abakiliya bibutswa amabwiriza yo kwirinda Coronavirus ku muryango binjiriraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .