00:00:00 IGIHE NETWORK KN KINYARWANDA EN ENGLISH FR FRANCAIS

Umuti urambye w’ibibazo byugarije abatujwe mu midugudu y’icyitegererezo

Yanditswe na Prudence Kwizera
Kuya 6 July 2022 saa 03:07
Yasuwe :

Leta y’u Rwanda imaze igihe muri gahunda yo gutuza abaturage mu midugudu y’icyitegererezo n’indi isanzwe, ibakuye mu busembere n’ahantu hatameze neze harimo mu manegeka, ariko iyo midugudu yagiye igaragaramo ibibazo bitandukanye bibangamiye imibereho yabo.

Muri ibyo bibazo harimo inyubako zangirika vuba, umwanda, abaturage badafata inzu neza, kutagira ibicanwa kuko zimwe muri biogaz zidakora, kutagira amazi ndetse n’imiyoboro yayo yafunzwe, kutagira amasambu yo guhinga, kubura ibiribwa n’ibindi.

Ibyo bibazo biri mu biherutse guhagurutsa itsinda ry’Abasenateri bagize Komisiyo idasanzwe, aho basuye imidugudu itandukanye hirya no hino mu gihugu bareba ibyo bibazo ndetse basuzuma n’icyaba igisubizo kirambye kuri byo.

Mu gihe cy’ukwezi kumwe bamaze, mu midugudu 36 y’icyitegererezo yasuwe igera kuri 23 ni yo ifite amazi mu gihe mu isanzwe 31 igera kuri 19 ari yo iyafite.

Amashyanyarazi nayo basanze ataragezwa mu midugudu yose kuko muri 31 basanzwe igera kuri irindwi itagira amashyanyarazi mu gihe mu y’icyitegererezo 36 umwe ari wo utayagira.

Minisitiri w’Ubutegetsi bw’Igihugu, Gatabazi Jean Marie Vianney, yameye ko hagaragaye amakosa mu gukurikirana imidugudu y’icyitegererezo n’indi yatujwemo abaturage hirya no hino mu gihugu, yizeza ko atazasubira

Mu bindi bibazo basanzemo ni icy’abana bavuye mu ishuri kuko hari umudugudu umwe basanzemo abana 40 bataye ishuri; ubworozi bw’inkoko butagenda neza; inka zabuze ubwatsi n’ibindi.

Hakozwe amakosa….

Minisitiri w’Ubutegetsi bw’Igihugu, Gatabazi Jean Marie Vianney, yemeye ko hagaragaye amakosa mu gukurikirana imidugudu y’icyitegererezo n’indi yatujwemo abaturage hirya no hino mu gihugu.

Mu ijambo yavugiye mu Karere ka Nyaruguru ku wa 4 Nyakanga 2022 ubwo hizihizwaga ku nshuro ya 28 Isabukuru yo Kwibohora kw’Abanyarwanda, yijeje Minisitiri w’Intebe Dr Ngirente Edouard, ko ayo makosa atazasubira.

Yagize ati “Turabizeza tudashidikanya ko ibyagaragaye nk’amakosa twatangiye kubifatira ingamba, ibibazo byatangiye kugaragara muri iyi midugudu, ku buryo tubizeza y’uko bizakemuka cyane cyane ko uturere twatangiye gushyiraho ingengo y’imari ifasha mu gukemura ibibazo bigaragara mu midugudu ndetse n’uburyo bwo gukurikirana abaturage batuye mu midugudu kugira ngo bakomeze kuba aheza kandi n’imishinga bahawe ikomeze gutera imbere.”

Yavuze kandi ko bazajya bafatanya n’abafatanyabikorwa barimo abikorera, ba rwiyemezamirimo, amadini n’amatorero, imiryango itari iya leta n’abandi kugira ngo bikorwe neza.

Ati “Turabizeza Nyakubahwa Minisitiri w’Intebe ko ibyatashywe n’ibindi bizatahwa mu gihe kiri imbere tuzakomeza kubisigasira.”

Abaturage bagomba gusigasira ibyo bahawe

Aganira n’itangazamakuru, Minisitiri Gatabazi yavuze ko mbere na mbere abaturage bahawe inzu mu midugudu bafite inshingazo yo kuzifata neza ariko n’ubuyobozi buzakomeza kubaba hafi.

Ati “Haba hari icyangiritse kuri ayo mazu nabo bakagisana, niba ari urugi rugize ikibazo, niba ari ibati ripfumutse ntabwo ari ko buri gihe Leta izagaruka ngo ize kubisana.”

Yavuze ko mu gihe cy’imyaka ya mbere Leta iza kubafasha gusana ibikorwa bimwe na bimwe birimo nk’amazi yagize ikibazo, amashanyarazi yapfuye n’ibindi mu buryo bwa rusange ariko yibutsa ko buri wese mu bimureba mu nzu ye afite inshingano zo kubifata neza.

Mu bibazo basanze mu midugudu hirya no hino, yavuze ko harimo n’ikijyanye n’imyumvire y’abaturage itarazamuka ngo igere ku rwego rwiza, atanga urugero ku bafunze imiyoboro isohora imyotsi.

Ati “Abaturage nabo hari ibintu bafunga kubera imyumvire bagafunga hahandi imyotsi yacaga kugira ngo bitabamarira inkwi ariko wabaganiriza ugasanga koko ari ubujiji. Ibyo rero byagiye bikosorwa.”

Minisitiri Gatabazi yavuze ko hari n’ikindi kibazo cyagaragaye kijyanye na biogaz aho basanze inka zitanga amase yo kuyicanisha zidahagije cyangwa abaturage bakayakuramo bakayakoresha nk’ifumbire.

Minisitiri Gatabazi yavuze ko bamaze kubona ibyo bibazo byose bafashe umwanzuro wo gushyiraho umukozi uhoraho muri buri mudugudu w’icyitegererezo kandi akagira n’abandi bafatanya mu kwita ku mibereho y’abaturage umunsi ku wundi.

Ati “Buri mudugudu w’icyitegererezo ukagira ubuyobozi, ni ukuvuga Umukuru w’Umudugudu, ushinzwe imibereho myiza y’abaturage, umujyanama w’ubuzima, ushinzwe kubigisha iby’iterambere ry’ubukungu, bari muri abo baturage bakigishwa bagahugurwa.”

Uwo ushinzwe imibereho myiza ni we uzajya abigisha uko bakoresha ibikoresho bishya baba babonye, ubwiherezo bushya, gas na biogas, kugira isuku n’ibindi.

Muri buri mudugudu w’icyitegererezo hari irerero rifite abakozi bahoraho bigisha abaturage uko barera abana neza, uko bategura indyo yuzuye n’ibindi kandi n’abatuye hafi y’iyo midugudu bakaza kuhigira.

Minisitiri Gatabazi yavuze ko mu rwego rwo gukumira mu buryo burambye ibibazo bigaragara mu midugudu yatujwemo abaturage, bagiye kubishyira mu mihigo basinyana na Perezida wa Repubulika.

Minisitiri Gatabazi yavuze ko hagomba gushakwa ingengo y’imari yo gukemura ibibazo byagaragaye muri iyo midugudu yatujwemo abaturage ndetse no gukumira ko byagaruka cyangwa bikaba byaboneka ahandi.

Ati “Muri uyu mwaka turimo uturere twateganyije amafaranga asaga miliyari yo gukemura ibibazo byagaragaye muri iyo midugudu. Nitugira amahirwe tukabona ingengo y’imari yindi bitewe n’uko ubukungu bugenda buzamuka, ibibazo birimo tuzabirangiza.”

Hazakurikiraho kugirana amasezerano n’abaturage y’imicungire y’inzu baba bahawe kugira ngo bumve ko ari izabo, bahabwe n’ibyangombwa byazo bazanditsweho.

Mu bindi bazitaho ni ugufasha abo baturage kubyaza umusaruro ibyo baba bahawe kugira ngo babihereho mu kwiteza imbere.

Yatanze urugero ku Mudugudu wa Munini mu Karere ka Nyaruguru aho abawutujwemo bahawe ingurube, zimwe zikaba zaramaze kubwagura ibyana bigera kuri 11 kandi hari n’izigeza kuri 14.

Hari ibyamaze gukemurwa…

Minisitiri Gatabazi yavuze ko ikibazo cy’ubworozi bw’inkoko cyari cyagaragaye mu mudugudu wa Norvège mu Mujyi wa Kigali, cyamaze gukemuka kuko bashyizeho ugomba kubikurikirana bityo inkoko zikaba ziri gutera amagi ku kigero gishimishije.

Yavuze ko no mu midugudu irimo uwa Kinigi muri Musanze, ubworozi bigenda neza, n’ahandi bari bafite ibibazo by’ubwatsi bw’amatungo nko mu Bugesera byamaze gukemuka.

Ati “Akarere ka Bugesera kabafasha kubona ubwatsi buri munsi ariko bari gushakirwa ukuntu haboneka ahantu hahagije ho gutera ubwatsi ku buryo bashobora kugaburira amatungo yabo.”

Yibukije ko muri rusange ikiba kigamijwe ari ugutuza abo baturage ahantu heza no kubaha ibibabera umusingi wo kwiteza imbere.

Yasabye abaturage gufata iya mbere bakumva ko ibyo bahabwa bagomba kubifata neza bakava mu bukene, ntibakomeze kugaragara mu byiciro by’abakeneye ubufasha.

Yasabye n’abayobozi b’inzego z’ibanze kuba hafi y’abaturage kugira ngo ibyo bakora birambe kuko ‘iyo abaturage batakoze neza n’abayobozi baba batakoze neza’.

Umuti urambye w’ibibazo byugarije abatujwe mu midugudu y’icyitegererezo
Abayobozi basabwe gukomeza kuba hafi y'abaturage kugira ngo ibyo bahawe bibagirire akamaro
Abaturage basabwe kujya bafata neza ibikorwa remezo bahabwa kandi bakabibyaza umusaruro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .