00:00:00 IGIHE NETWORK KN KINYARWANDA EN ENGLISH FR FRANCAIS

REG ikeneye miliyari 600 Frw ngo izabashe gucanira Abanyarwanda bose

Yanditswe na Kanamugire Emmanuel
Kuya 8 September 2022 saa 05:27
Yasuwe :

Ubuyobozi bwa Sosiyete y’u Rwanda ishinzwe Ingufu (REG), bwatangaje ko kugira ngo Abanyarwanda bose babashe kugerwaho n’umuriro w’amashanyarazi hakenewe ingengo y’imari igera kuri miliyoni 600 z’amadolari (arenga gato miliyari 600 z’amafaranga y’u Rwanda).

REG itangaza ko kugeza ubu ingo zigerwaho n’amashanyarazi zigeze kuri 73% mu gihe intego ari uko mu 2024 zizaba zigeze ku 100%.

Imbogamizi zikomereye iki kigo muri iyi gahunda ni ibura ry’ingengo y’imari nk’uko byatangajwe n’Umuyobozi Mukuru wa REG, Ron Weiss kuri uyu wa 7 Nzeri, ubwo yitabaga Komisiyo Ishinzwe Gukurikirana Imikoreshereze y’Imari n’Umutungo by’Igihugu, PAC, ku isesengura rya raporo y’Umugenzuzi Mukuru w’Imari ya Leta.

Ron Weiss yavuze ko iki kigo kiri gukorana na Minisiteri y’Imari n’Igenamigambi hamwe na Minisiteri y’Ibikorwaremezo hashakwa uburyo ingengo y’imari ikenewe ngo hashyirwe mu bikorwa imishinga yo gutunganya no gukwirakwiza umuriro w’amashanyarazi iboneke.

Yakomeje agira ati “Dufite urutonde rurerure rw’imishinga igomba gukorwa; abafatanyabikorwa bazatanga agera kuri miliyoni 308 z’amadolari. Iyo mishinga izatugeza ku kigereranyo cya 80%. Kugira ngo tugere ku ntego 100%, kuri iyo 20% isigaye tuzaba dukeneye izindi miliyoni 600 z’amadolari; ni yo mafaranga dukeneye ubu.”

REG ubwayo nta bibazo mu micungire y’umutungo umugenzuzi w’imari yayisanganye. Ubuyobozi bwayo bwitabye PAC kubera ko iki kigo ari cyo kireberera EDCL (Energy Development Corporation Limited) na EUCL (Energy Utility Corporation Limited) bigishamikiyeho.

EDCL ni Ikigo gishinzwe ibikorwaremezo byo gukwirakwiza umuriro w’amashyanyarazi mu gihe EUCL ishinzwe ibijyanye n’ubucuruzi bw’abo mashanyarazi.

Umuyobozi Mukuru wa REG, yavuze ko iki kigo atari nta makekwa mu bintu byose kuko mu bijyanye no kubahiriza amategeko no gukurikirana agaciro k’amafaranga (uko ashorwa n’inyungu ivamo) bagifite ibibazo bagomba gukemura.

Mu bibazo byagaragajwe muri Raporo y’Umugenzuzi Mukuru w’Imari ya Leta y’umwaka w’ingengo y’Imari warangiye ku wa 30 Kamena 2021, harimo ibijyanye n’imitangirwe y’amasoko.

Hari nk’aho EDCL yimye isoko Sosiyete ya NCC yari yapiganwe kandi itanga igiciro cyo hasi bigatera igihombo kinini.

REG yasobanuye ko yafashe icyemezo cyo kudaha isoko NCC nubwo yari yatanze ibiciro bito bitewe n’uko amasoko ya mbere yakoze itayatunganyije neza.

Ron ati “Mu byo tugenderaho dufata ba rwiyemezamirimo bakora neza, abadakora neza ntidushobora gukomeza gukorana na bo.”

Na none igenzura ryasanze EDCL yaratanze isoko ry’ibikoresho byo kubaka by’amashanyarazi ku giciro kirenze ingengo y’imari yari iteganyijwe.

Umuyobozi Mukuru wa REG, yavuze ko bari gukosora amakosa yagiye agaragara kandi bizeye ko bazagera kuri raporo ya ntamakemwa mu gihe cya vuba.

Ati “Turi gukorana imbaraga, umugenzuzi w’imari arimo kudufasha cyane agaragaza bimwe mu byo dushobora kuba tutitayeho uko bikwiye ariko buri cyumweru turahura tukaganira ku bibazo dufite tugakurikirana impinduka.”

“Ishyirwa mu bikorwa riri ku rwego rwo hejuru kandi nizeye ko kuri buri rwego tuzagenda dukosora ibintu kugeza tugeze kuri raporo ya nta makemwa mu nzego zose.”

Mu mbogamizi iki kigo cyahuye na zo mu ishyirwa mu bikorwa ry’imishinga harimo kuba mu gihe cya Covid-19 imikorere yari igoranye.

Abahawe amasoko ngo bari bafite ibibazo byo kubahiriza igihe, kugura ibikoresho no kwishyura imishahara y’abo bakoreshaga mu byo bari bakeneye byose ngo bayashyire mu bikorwa.

Kuvana ibikoresho hirya no hino biza mu gihugu ntabwo byari byoroshye kubera za Guma mu Rugo. Ibi byiyongeraho ikiguzi cy’ubwikorezi cyari gihanitse.

Ron yongeyeho ati “Nubwo bimeze bityo twabashije gushyira mu bikorwa imishinga myinshi, imwe yararangiye, indi iri ku kigero gishimishije. Sitasiyo ya Mukungwa-Nyabihu irakora, imiyoboro y’amashanyarazi mu Majyaruguru n’Uburengereazuba yaravuguruwe.”

EUCL imaze imyaka itatu yikurikiranya yuzuza neza ibitabo by’ibaruramari ariko iracyafite intege nke mu kubahiriza amategeko no mu bijyanye no kubyaza amafaranga inyungu.

Ibibazo mu mitangire y’amasoko hari aho batamenyesheje akanama gashinzwe amasoko, ibikorwaremezo by’imiyoboro y’amashanyarazi bitabyazwa umusaruro na Cashpower zihabwa abakiliya zigapfa nyuma y’igihe gito.

Abayobozi ba REG na EDCL ubwo batangaga ibisobanuro imbere ya Komisiyo ya PAC
Abayobozi batandukanye mu Kigo Gishinzwe Ibikorwaremezo by'amashanyarazi, EDCL bari bitabye PAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .