00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rumaze gushora miliyari 4,2$ muri gahunda yo guteza imbere inganda

Yanditswe na Igizeneza Jean Désiré
Kuya 20 February 2024 saa 07:43
Yasuwe :

Mu rwego rwo guteza imbere inganda ziri mu gihugu kugira ngo zirusheho gutanga umusaruro no kugira uruhare mu kuzahura ubukungu bw’igihugu, Guverinoma y’u Rwanda imaze kuzishoramo arenga miliyari 4,2 z’Amadolari ya Amerika.

Ni amafaranga imaze gushyira muri gahunda yatangijwe mu 2021 yitwa (Manufacture and Build to Recover Program: MBRP), yibanda ku mishinga yose igamije gushyigikira abashoramari bifuza gushora imari mu bijyanye n’inganda n’ibijyanye n’ubwubatsi bwazo mu Rwanda.

MBRP yagombaga kwita ku byiciro birimo icy’ubwubatsi aho ku mushinga wose ufite ishoramari ringana na miliyoni 10$ cyangwa zirenga, wagombaga kuzajya usonerwa umusoro ku nyongeragaciro ku bikoresho by’ubwubatsi byakorewe mu Rwanda no ku bitumizwa mu mahanga bitaboneka mu Karere.

Iyi mishinga kandi yagombaga gusonerwa amahoro kuri ibyi bikoresho bitumizwa mu mahanga ariko bitaboneka mu Rwanda cyangwa mu Karere, isonerwa rikazajya ryemezwa nyuma yo gusuzuma umushinga ukwawo.

Harimo n’icyiciro cy’imishinga y’ibitunganyirizwa mu nganda, aho zagombaga koroherezwa mu gusonerwa umusoro ku nyongeragaciro ku mashini n’ibikoresho by’ibanze bikoreshwa mu nganda byakorewe imbere mu gihugu.

Ikindi cyiciro cyari kijyanye n’ubwubatsi bw’inganda, aho umushinga wabarizwagamo wagombaga kuba ugamije gushora imari itari munsi ya miliyoni 1$, yo kubaka inganda nshya.

Ku mishinga yari isanzwe ihari, imari ikenerwa yagombaga kuba itari munsi ya miliyoni 1$ cyangwa 20% by’ishoramari ryari risanzwe, mu gihe ku mishya y’ubwubatsi bw’inganda zitunganya umusaruro ukomoka ku buhinzi n’ubworozi, umushinga ugomba gushora imari itari munsi y’ibihumbi 100$.

Nk’uko bimeze ku byiciro bya mbere, iyi mishinga na yo isonerwa umusoro ku nyongeragaciro ku bikoresho by’ubwubatsi bikorewe mu Rwanda n’ibitumizwa mu mahanga bitaboneka mu Karere, bikaba uko no ku mahoro, ariko hasuzumwa umushinga ukwawo.

Icyiciro cya kane cya MBRP cyo cyagombaga kureba ku mikorere myiza y’inganda aho izikirimo zoroherezwa mu kugabanyirizwa umusoro ku bihembo by’abakozi mu mwaka wa 2021, ndetse no mu kwishyura umusoro ku nyungu z’amasosiyete.

Minisitiri w’intebe, Dr Edouard Ngirente, ubwo yagezaga ku Nteko Ishinga Amategeko imitwe yombi ibyakozwe mu kuzahura ubukungu nyuma ya Covid-19 ku wa 13 Gashyantare 2024, yavuze ko iyi gahunda ikataje ndetse imaze guhanga imirimo myinshi ku Banyarwanda.

Ati “Kugeza ubu iyi gahunda imaze gushorwamo imari isaga miliyari 4,2 z’Amadolari ya Amerika kandi imaze guhanga imirimo isaga 21.400. Biteganyijwe ko indi mirimo irenga 42.700 nayo izahangwa muri iyi gahunda.”

Minisitiri Dr Ngirente yavuze ko igihugu cyakomeje gushora imari muri uru rwego mu buryo rwo kongera imbaraga mu kuzahura ubukungu hibandwa ku guteza imbere inganda.

Byatewe n’uko Covid-19 yagize ingaruka ku iterambere ry’inganda mu Rwanda, mu 2020, bituma umusaruro uziturukaho usubira inyuma ku kigero cya 4% munsi ya zeru.

Mu kuziba icyo cyuho no gukomeza guteza imbere inganda, guverinoma yongereye imbaraga mu gushyira hirya no hino mu ihugu, ibyanya byahariwe inganda, bizamura umubare w’inganda aho mu myaka ine uvuye mu 2019 hubatswe inganda nshya 219.

Ati “Agaciro k’umusaruro ukomoka ku nganda na ko kakomeje kwiyongera. Kavuye kuri miliyari zirenga 1500 Frw mu 2019 kagera kuri miliyari zisaga 3200 Frw mu 2023.”

Yavuze ko umusaruro w’inganda wakomeje kwiyongera aho agaciro k’ibicuruzwa byatunganyirijwe mu nganda z’imbere mu Gihugu, u Rwanda rwohereje mu mahanga, kavuye kuri miliyari 1,9$ mu 2020 kagera kuri miliyari zisaga 2,9$ mu 2022.

Ibi byajyanye no guhanga imirimo nyuma y’iki cyorezo cyari kimaze igihe kizahaza abatuye Isi mu nguni zose aho nyuma yacyo imirimo yahanzwe mu rwego rw’inganda yavuye ku bihumbi birenga 34,8 mu 2021 irenga ibihumbi 43, 3 mu 2022.

Mu gukomeza guteza imbere iyi gahunda ya MBRP igitangira byateganywaga ko inganda zizagabanyirizwa ibihumbi 50 Frw by’umusoro kuri buri miliyoni 1 Frw yiyongereye ku byo zinjije cyangwa zohereje mu mahanga. Ku bijyanye n’imirimo, hazabaho kugabanyirizwa 10% by’umusoro ku bihembo kuri buri mukozi mushya uhawe akazi.

U Rwanda rumaze gushora miliyari 4,2$ mu guteza imbere inganda zo mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .