Access Bank yabaye iya mbere mu Rwanda ihawe impamyabushobozi eshatu zishimangira umutekano n’imikorere ihamye

Yanditswe na Twarabanye Venuste
Kuya 22 Ugushyingo 2019 saa 12:45
Yasuwe :
0 0

Access Bank Rwanda Plc yahawe impamyabushobozi eshatu zikomeye ku rwego rw’amabanki, zishimangira ubushobozi bwayo mu gutanga serivisi nziza ku bakiliya no kurinda umutekano wa konti zabo n’uw’amakuru ya banki muri rusange.

Ni impamyabushobozi bashyikirijwe n’ikigo cy’impuguke mu bugenzuzi bw’ikoreshwa ry’ikoranabuhanga, Digital Jewels, nyuma yo kugenzura iyo banki, kuyigira inama zo kunoza ibijyanye n’umutekano w’abakiliya na konti zabo no kuba amakuru yose y’ibyo banki ikora atahungabana ku buryo bworoshye.
 
Mu bugenzuzi icyo kigo cyabakoreye harimo ibijyanye no kubika amakuru, harebwa niba iyi banki ifite nibura ahantu habiri abikwa, ku buryo hamwe habaye ikibazo amakuru yabasha kugarurwa cyangwa imirimo igakomereza ahandi ntakibazo abakiriya bagize.
 
Hari kandi kureba niba abakozi bafite ubushobozi, hakaba n’ubushobozi bw’abashobora gusimbura abandi igihe byaba ngombwa. Harebwe kandi ibijyanye n’umutekano kuva ku muryango kugeza mu biro, mu bikoresho birimo za mudasobwa n’uburyo bwo kuzinjiramo.
 
Mu byagenzuwe harimo n’ ibijyanye no kugaragaza uburyo umutekano w’abakoresha amakarita y’ikoranabuhanga ugenzurwa, harebwa niba igihe yakoreshejwe ku cyuma nta kibazo agira, cyane ko ibyuma by’ikoranabuhanga bikorana.
 
Umuyobozi mukuru wa Digital Jewels, Adedoyin Odunfa yatangaje ko nyuma y’ubugenzuzi, basanze nta makemwa kuri Access Bank Rwanda Plc, ibiherwa impamyabushobozi.
 
Ati “Access Bank Rwanda yabashije kongera umutekano aho utacungwaga neza, n’uburyo bwo gutahura ko bari kugabwaho ibitero by’ikoranabuhanga no kongera ubwirinzi mu byo bashoboraga kugabwaho.”
 
Umuyobozi mukuru wa Access Bank Rwanda, Jean Claude Karayenzi, yijeje abakiliya ko ibikorwa bijyana na konti zabo bicungiwe umutekano.
 
Agaruka kuri izi mpamyabushobozi, Karayenzi yagize ati “Kuri banki bisobanuye byinshi kubera ko turi banki mpuzamahanga, ibi bivuze ko amakuru yacu arinze, ikoranabuhanga ryacu ririnzwe, ubu turi gukora ubucuruzi koko burinzwe ibitero by’ikoranabuhanga, ntabwo ari ukubona impamyabushobozi gusa, byereka abakiliya ko Access Bank Rwanda ari Banki yo kwizerwa.”
 
John Karamuka ushinzwe serivisi zo kwishyurana muri Banki nkuru y’u Rwanda (BNR), yashimiye Access Bank Rwanda kuba ari Banki y’ubucuruzi ya mbere mu Rwanda ibashije kubona izi mpamyabushobozi eshatu.

Umuyobozi wa Access Bank, Jean Claude Karayenzi, yatangaje ko abakiliya bayo bafite banki yo kwizerwa
Ubwo abayobozi ba Access Bank bamurikirwaga ibyavuye mu igenzura
Umuyobozi muri Banki Nkuru y’u Rwanda (BNR) ushinzwe serivisi zo kwishyurana, John Karamuka, yashimiye Access Bank Rwanda kuba ari banki y’ubucuruzi ya mbere mu Rwanda ibashije kubona izi mpamyabushobozi eshatu
Abayobozi ba Access Bank bishimiye impamyabushobozi bahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza