00:00:00 IGIHE NETWORK KN KINYARWANDA EN ENGLISH FR FRANCAIS

Umusaruro mbumbe w’u Rwanda wazamutseho 7,9 ku ijana

Yanditswe na Cyprien Niyomwungeri
Kuya 16 June 2022 saa 10:58
Yasuwe :

Ikigo cy’igihugu cy’ibarurishamibare (NISR) cyatangaje ko nubwo u Rwanda kimwe n’ibindi bihugu rugihanganye n’ingaruka za Covid-19, ingamba zo kuzahura ubukungu zatumye mu gihembwe cya mbere cya 2022 umusaruro mbumbe wiyongera ku rugero rwa 7.9 ku ijana.

Mu buryo bw’amafaranga, umusaruro mbumbe w’igihugu kugeza ku wa 31 Werurwe 2022 wari miliyari 3,025 Frw, uvuye kuri miliyari 2,588Frw mu gihembwe cya mbere cya 2021.

Ubuhinzi bwiyongereyeho 1 ku ijana mu gihembwe cya mbere, inganda ziyongera ku 10 ku ijana naho serivisi ziyongera kuri 11 ku ijana.

Muri rusange, umusaruro mbumbe urimo uruhare rwa serivisi rungana na 47 ku ijana, ubuhinzi bwatanze 23 ku ijana naho serivisi zitanga 22 ku ijana.

Umuyobozi wungirije wa NISR, Ivan Murenzi, yavuze ko muri iki gihe ubukungu bw’isi bukibangamiwe n’ibibazo bishingiye ku guhererekanya ibicuruzwa ndetse n’ingaruka z’intambara ya Ukraine n’u Burusiya.

Ati "Ingamba zagiye zifatwa zirimo kugeza inkingo ku bantu benshi bigatuma serivisi n’ibindi bikorwa bifungura, byatumye ubukungu bwongera kuzamuka".

Yakomeje avuga ko ubwiyongere bwa 7.9 ku ijana mu gihembwe cya mbere cya 2022, ahanini bwagizwemo uruhare n’inganda na serivisi, kuko ubuhinzi bwagabanyutse cyane.

Nk’ikawa, umusaruro wayo wagabanyutseho 41 ku ijana, mu gihe icyayi cyo cyiyongereyeho 3 ku ijana gusa kandi ari bimwe mu by’ingenzi u Rwanda rwohereza mu mahanga.

Ku rundi ruhande, umusaruro wa serivisi zo gutwara abantu n’iz’ubwikorezi wazamutseho 19 ku ijana. Umusaruro wa serivisi z’amahoteri na resitora (restaurant) wiyongereyeho 80 ku ijana, mu gihe wari waragabanyutseho 34 ku ijana mu mwaka wa 2021.

Umusaruro wa serivisi z’ibigo by’imari n’ubwishingizi wazamutseho 13 ku ijana, uwa serivisi z’ikoranabuhanga n’itumanaho wiyongereyeho 17 ku ijana, naho uwa serivisi z’ubuzima wiyongeraho 22 ku ijana.

Minisitiri w’imari n’igenamigambi, Dr Uzziel Ndagijimana, yavuze ko kuba ubuhinzi butari bwifashe neza byatewe n’ibihe, ariko guverinoma irimo gushyira imbaraga muri gahunda zo kuhira no kugeza ifumbire ku baturage, kugira ngo hakumirwe ko ubuhinzi bw’u Rwanda bwakomeza gushingira ku mvura gusa.

Ku kijyanye n’izamuka ry’ibiciro ku masoko, Dr Ndagijimana yavuze ko guverinoma irimo kugerageza kubishyira ku murongo binyuze kongera umusaruro w’ubuhinzi no gushyiraho za nkunganire, kugira ngo umuturage yoroherwe n’ibiciro.

Dr Ndagijimana yanasobanuye ko ku bijyanye no kuba ubuhinzi butarazamutse ntaho bihuriye n’intambara yo muri Ukraine, ahubwo ari ikirere, aho umusaruro usanzwe uturuka haba amapfa.

Ati "Ntaho bihuriye n’intambara kuko ibikoreshwa mu buhinzi byarabonetse kandi umwaka ushize bwazamutse 7 ku ijana. Impamvu nyamukuru ni ikirere cyatumye umusaruro utaragenze neza, kandi twizeye ko mu bindi bihembwe bizagenda neza."

Ubwiyongere bw'Umusaruro mbumbe w'u Rwanda mu bihembwe bya mbere by'imyaka ine ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .