{Kuri miliyari 2,5 (1,715,000,000,000 mu manyarwanda), Folorunsho Alakija w’umunyanijeriyakazi niwe mugore wa mbere wo muri Afurika ubashije kwinjira ku rutonde rw’abaherwe ku isi.}

Kuri uru rutonde rwa Forbes hagaragazwaho abantu baba batunze kandi bafite ubukire bubarirwa hejuru ya miliyari y’amadolari ya Amerika (miliyari ziyingayinga 700 z’amanyarwanda) mu mitungo yabo, amafaranga aba aruta ingengo y’imari y’ibihugu bitari bike ku isi, birimo n’u Rwanda mu myaka yo hambere mbere ya 2011.

Alakija ku myaka 63 ubu niwe wabashije kuza imbere nk’umwiraburakazi ukize ku isi, aho yasimbuye Oprah Winfrey, usanzwe azwi mu matereviziyo, kuri uru rutonde rwa Forbes kuva mu mwaka washize wa 2013.

Ubukire bwe ntibukomoka ku gucuruza peteroli gusa, kuko uyu mugore ukomoka mu muryango w’abategetsi b’imiryango iwabo muri Nigeria, yize amashuri ye mu bwongereza, atangira gukorera amafaranga mu 1974, akora nk’umunyamabanga nshingwabikorwa muri banki imwe yo muri Nigeria, nyuma aza kwinjira mu guhanga imideli, kwamamaza no gushushanya gufotora no kwandika.

Kugira ngo abashe kubaka izina cyane, ndetse anagire amafaranga menshi yo kuba yabasha no kugera aho kuba umucuruzikazi ukomeye wa peteroli, uyu mugore yabashije gukorana n’abagore b’abakomeye n’abaherwekazi, aho yagiye aba umwe mu babambika bihenze ndetse akanabashakira imikufi ihenze.

N’ubwo nta Munyarwanda uragaragaramo akarere ka EAC kahagarariwe

Bwa mbere mu mateka y’urutonde rw’abaherwe n’abanyemari bakize kurenza abandi ku isi, rukorwa n’ikinyamakuru Forbes Magazine, hagaragayeho abanyafurika benshi ndetse by’igitangaza hanabonekamo abo mu karere ka Afurika y’Uburasirazuba bitari byarigeze kubaho.

Urutonde rw’uyu mwaka rugizwe n’abantu 1645, hagaragayemo Umugande, Umunya-Tanzania, n’uriya mugore w’Umunyanigerizakazi ndetse wanasimbuye Opra Winfrey ku kuba umuherwekazi w’umwirabura wambere watunze miliyari ku isi, kandi n’umuherwe usanzwe kuri uru rutonde w’umwirabura, Umunyanijeriya, Aliko Dangote, yinjiye muri 25 ba mbere ku isi na miliyari 25 z’amadolari ya Amerika, akaba yazamutseho imyanya 20 yose kuko ubushize yari uwa 55.

Ikindi kintu gitangaje ku rutonde rwa Forbes rw’uyu mwaka, ni uko bwa mbere mu mateka habashije kuboneka Abaherwe batunze miliyari y’amadolari bakomoka muri Afurika y’Uburasirazuba, aho hagaragayemo Umugande witwa Sudhir Ruparelia ufite miliyari 1,1 y’amadolari ya Amerika, ndetse n’Umunyatanzania witwa Rostam Azizi utunze miliyari imwe y’amadolari.

Uru rutonde ruracyayobowe na Bill Gates ku mwaka wa 16 aruyoboye

Uru rutonde rw’abaherwe b’isi ruracyayobowe n’Umunyamerika Bill Gates na miliyari 76 z’amadolari, wongeye kwisubiza umwanya wa mbere mu mwaka ushize wa 2013, nyuma y’imyaka ine ruyobowe n’umunya-Mexique Carlos Slim Helu kuri ubu uri ku mwanya wa kabiri na miliyari 72 z’amadolari ya Amerika.

Mark Zuckerberg, washinze Facebook niwe wagize inyungu nini bitangaje mu gihe cy’umwaka umwe, kuko noneho yaje ku mwanya wa 21 na miliyari 28,5 z’amadolari ya Amerika, mu gihe mu mwaka ushize wa 2013 yari yaguye akagera kuri miliyari 15, none kubera ukuntu ku isoko ry’imigabane yagurishije neza yabashije kwiyongeraho arenga miliyari 13 zose mu mwaka umwe.

Mu bashyashya binjiye kuri uru rutonde, ubahiga mu kugira menshi ni uwitwa Jan Koum wahoze ari nyiri WhatsApp akaza kuyigurirwa ku kayabo ka miliyari 19 z’amadolari na Zuckerberg nyiri Facebook mu kwezi gushize.

Uru rutonde rw’uyu mwaka, rugizwe n’abaherwe bagera ku 1645 batunze ageze cyangwa arenga miliyari y’amadolari, muri bo harimo abashya bagera kuri 268, uru rutonde kandi rwiyongereyemo abagore cyane kuko umubare wabo wavuye ku 138 ukaba wageze ku 172.

Ibihugu byose biracyahatse na Amerika

Leta Zunze Ubumwe za Amerika ziracyayoboye urutonde mu kugiramo abaherwe benshi kuko zifitemo zonyine abagera kuri 492, zigakurikirwa n’u Bushinwa bufitemo 152, ndetse n’u Burusiya bufitemo 111. Ibihugu bidasanzwe bigiramo abantu, nabyo byagaragayemo nka Algeria, Lithuania, Uganda na Tanzania.

2/3 by’aba baherwe, ni abantu bikorereye amafaranga ubwabo, 13% ni abayarazwe n’imiryango n’ababyeyi, 21% ni abagiye bakora bakongera kuyo bari bafite cyangwa barazwe.

Gusa uyu mwaka ntiwahiriye ibihugu byose, kuko nk’igihugu cya Turkey cyatakaje abantu 19 bajyaga bagaragara kuri uru rutonde, bitewe n’uko habayeho gutakaza agaciro kw’ifaranga ryaho gukomeye. Indonesia nayo yagize gutakaza agaciro kw’ifaranga, yatakaje abantu umunani ku rutonde.

Abantu bose hamwe batongeye kugaragara kuri uru rutonde ni 100, harimo n’abagera kuri 16 bitabye Imana.