00:00:00 IGIHE NETWORK KN KINYARWANDA EN ENGLISH FR FRANCAIS

Umujyi wa Kigali wasobanuye iby’imihanda ikeneye gusanwa n’imishya igomba kubakwa

Yanditswe na Ntabareshya Jean de Dieu
Kuya 9 April 2022 saa 02:28
Yasuwe :

Ubuyobozi bw’Umujyi wa Kigali bwatangaje ko hari ibikorwaremezo bigiye gushyirwamo imbaraga birimo kwihutisha iyubakwa ry’imihanda itandukanye yagaragajwe nk’ifite ibibazo.

Ibibazo by’imihanda mu Mujyi wa Kigali biri mu byafashe umwanya munini bisobanurirwa abaturage kuko bamwe bari bafite ibibazo bijyanye n’ikorwa ryayo ndetse n’ibindi bitandukanye bituma ubuhahirane butagenda neza.

Mu nama yahuje abayobozi b’Umujyi wa Kigali n’abaturage bifashishije ikoranabuhanga ‘Smart Inteko’ yabaye ku wa Kabiri tariki 5 Mata 2022, ubuyobozi bwasobanuye ko hari imihanda imwe n’imwe iri kubakwa, gusanwa ndetse n’iyo bateganya gutangira vuba.

Umuhanda wa uhuza Masaka-Nyakariro

Abaturage batuye i Masaka bagaragaje ko hari imbogamizi ku muhanda uhuza Akarere ka Kicukiro na Rwamagana wakozwe igice kimwe cya Rwamagana Umujyi wa Kigali ukaba utarakoze uruhande rwawo.

Umuyobozi w’Umujyi wa Kigali wungirije ushinzwe imiturire n’ibikorwaremezo, Mpabwanamaguru Merard, yavuze ko uyu muhanda uva i Masaka wambuka Nyakariro biteganyijwe ko uzubakwa ugashyirwamo kaburimbo.

Yasobanuye ko kugeza ubu wangiritse biturutse no ku kuba i Masaka hari kubakwa bityo ukwiye kubanza gusanwa.

Ati “Iyo umuntu awugezemo ubona ko utakiri umuhanda, ubu abatekinisiye bari gukora ingengo y’imari ikenewe n’imirimo izakorwa kugira ngo ubanze gusanwa.”

Meya w’Umujyi wa Kigali, Rubingisa Pudence yasobanuye ko ibigiye gukorwa kuri uyu muhanda ari ukuwusana kugira ngo nibura ubashe gukoreshwa ariko mu ngengo y’imari y’umwaka utaha ukazubakwa mu buryo bwo kuwushyiramo kaburimbo kuko bibangamira ubuhahirane hagati ya Rwamagana na Kicukiro.

Umuhanda Nzove-Ruli-Gakenke

Uyu muhanda abaturage bavuga ko ukeneye gushyirwamo kaburimbo cyane ko uhuza uturere dutandukanye.

Umuyobozi Mukuru Ushinzwe Imyubakire mu Mujyi wa Kigali, Asaba Katabarwa Emmanuel, yavuze ko hari gukorwa ibiganiro hagati y’Umujyi wa Kigali n’Ikigo gishinzwe guteza imbere ubwikorezi mu Rwanda, RTDA, ku ikorwa ry’uyu muhanda.

Yagize ati “Ni umuhanda koko uzenguruka mu Mujyi wa Kigali kandi ubona ufite ikibazo ukwiye gukorwa bitewe n’uko kariya gace kagenda gatera imbere. Ubu rero turimo kuvugana n’Ikigo cy’Igihugu gishinzwe gutunganya Imihanda, RTDA, ngo turebe ko mu ngengo y’imari itaha bazawushyiramo.”

Umuhanda wa Masizi-Kami

Ni umuhanda utangirira mu Zindiro ugaca i Kami ukanyura Gasanze ku buryo uzahura n’uva Nyacyonga ugatunguka i Batsinda.

Katabarwa yavuze ko uyu muhanda na wo uri gukorerwa inyigo kandi igomba kuba yarangiye bitarenze uku kwezi hagakurikiraho ibikorwa byo kubarira abaturage imitungo ishobora kwangirika.

Imirimo yo kuwubaka iri mu cyiciro cya kabiri cy’umushinga w’Umujyi wa Kigali w’ubwubatsi bw’ibikorwaremezo. Icyiciro cya mbere gikubiyemo imihanda kuri ubu iri kwihutishwa kugira ngo izakoreshwe mu gihe cy’inama ya CHOGM.

Umuhanda Miduha-Mageragere

Uyu ni umuhanda uri muri gahunda ya ‘Kigali Infrastructure Project’ y’ibirometero 215. Uyu mushinga uri mu byiciro bitandatu; umuhanda wa Miduha-Mageragere uteganyijwe mu cyiciro cya kabiri.

Umuyobozi ushinzwe Imyubakire mu Mujyi wa Kigali yasobanuye ko kugeza ubu kuri uyu muhanda bamaze kubara imitungo y’abaturage ishobora kugirwaho ingaruka n’ikorwa ryawo kugira ngo bazabanze kubishyura nyuma hakurikireho gutangiza imirimo y’ubwubatsi.

Yavuze ko ibi bigiye kwihutishwa ku buryo mu gihe cy’icyumweru kimwe amakuru ku mitungo yabaruwe azaba yamaze guhuzwa hanyuma bitarenze ukwezi kumwe abaturage bakazatangira kwishyurwa ndetse n’imirimo igahita itangira.

Umuyobozi Mukuru Ushinzwe Imyubakire mu Mujyi wa Kigali, Asaba Katabarwa Emmanuel yasobanuye ko hari imihanda iri kubakwa hirya no hino mu Mujyi

Umuhanda wa Gasogi

Uyu ni umuhanda w’ibirometero icyenda, biteganyijwe ko uzazenguruka Gasogi ugaca Rusororo ugahinguka Kabuga.

Ni umuhanda kandi na wo uri mu cyiciro cya kabiri cy’igombva kubakwa muri ‘Kigali Infrastructure Project’.

Kuri ubu inyigo yawo yamaze gukorwa ndetse iri gusuzumwa n’abatekinisiye kugira ngo irangizwe hatangire kubarura imitungo y’abaturage.

Ubuyobozi bw’Umujyi wa Kigali bwihaye icyumweru kimwe cyo kuba iyo ngingo yamaze kunonosorwa ku buryo bigenze uko babivuga nibura mu mpera za Kanama cyangwa mu ntangiriro za Nzeri 2022 baba batangiye kubaka.

Abaturage bari kwiyubakira imihanda y’imigenderano bahabwa ubufasha

Kuri ubu hari abaturage bo mu bice bitandukanye bishyira hamwe bakiyubakira umuhanda w’umugenderano.

Meya w’Umujyi wa Kigali Rubingisa Pudence, yavuze ko ari ibyo kwishimira iyo abaturage batekereje kwiyubakira imihanda kandi ko hari ubufasha umujyi ushobora kubagenera bujyanye ahanini no gukora inyigo zihamye zayo.

Ati “Icya mbere twishimira ni uko abaturage bari gufata iya mbere mu gukora imihanda migenderano y’aho dutuye. Kugeza ubu mu Mujyi wa Kigali abaturage bamaze kwiyubakira hafi ibirometero 67. Ibi bishimangira ko turi guhuza imbaraga.”

Yasobanuye ko Umujyi wa Kigali ufatanya na bo mu bijyanye no gukora inyigo zihamye no gukurikirana uko imirimo ikorwa, kuyicanira, kuyisana mu gihe yangiritse n’ibindi.

Abaturage biyubakira imihanda y'imigenderano bashimiwe uruhare rwabo mu iterambere
Imihanda ihuza ibice bimwe na bimwe by'i Kigali igiye kwitwabaho
Umuhanda wa Nzove biteganyijwe ko uzashyirwamo kaburimbo mu mwaka utaha
Iyi nama yitabiriwe n'abayobozi banyuranye b'Umujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .