Umujyanama w’ubuhinzi w’i Rwamagana yatsindiye miliyoni 1Frw mu IKOFI ya Banki ya Kigali

Yanditswe na Evariste Nsengimana
Kuya 3 Nzeri 2019 saa 09:34
Yasuwe :
0 0

Nikuze Angela usanzwe ari umujyanama w’ubuhinzi mu Murenge wa Nyakariro mu Karere ka Rwamagana, yabaye umunyamahirwe wa 16 watsindiye miliyoni imwe 1 Frw binyuze mu gukoresha IKOFI, serivisi ya Banki ya Kigali ifasha abantu kubona serivisi z’imari kuri telefoni.

IKOFI yatangijwe muri Gicurasi 2019, ifasha abahinzi kugaragaza ishoramari bakora, kohereza no kubikuza amafaranga ku buntu, kwishyura ibintu binyuranye byifashishwa mu buhinzi nk’imbuto n’inyongeramusaruro, ubwizigame n’ibindi.

Ubu buryo bukimurikwa hatangijwe ubukangurambaga bw’ibyumweru 30, butuma buri cyumweru umuhinzi w’umunyamahirwe atsindira miliyoni 1 Frw.

Nikuze w’imyaka 47 akagira umuryango w’abana batatu n’abuzukuru babiri yabwiye IGIHE ko gahunda y’Ikofi yatangiye kuyumva bayamamaza kuri radiyo igitangira, ariko atangira kuyikunda ari uko yumvise abanyamahirwe batsindiye amafaranga kubera kuyikoresha.

Nyuma y’ibyumweru bitanu nibwo yiyemeje kwinjira muri iyo gahunda imaze guhesha abanyamahirwe batanu miliyoni imwe imwe nawe yizeye kuzahita akuriraho.

Ntabwo byahise bimuhira kuko nyuma yo kuyifunguza akabitsaho 3000Frw yamaze igihe yumva batangaza abatsinze we ntiyiyumve atangira kwibaza ko ari ubutekamutwe.

Ati “Nanone ngeze aho ndongera ndabikora icyumweru cya mbere, icya kabiri ndakomeza n’icya gatatu sinacika intege ku bw’amahirwe ngiye kumva numva barampamagaye nuko mba nshimye Imana.”

Uyu mugore yasobanuye ko uretse ibyo bihumbi 3000Frw bihoraho yashyizeho nyuma yakomeje akajya abitsa ariko akongera akayabikura, agatsinda afiteho 6900Frw.

Ati “Mbere nabikijeho asaga 4000Frw, nkajya mbikuraho 500Frw.. ndongera mbitsaho 6000Frw nkajya mbikuza nkongera nkabitsa ariko bya 3000Frw bikagumaho kugeza ubwo nagize amahirwe mfiteho 6900Frw.”

Iyo nkuru nziza y’uko yatsindiye ayo mafaranga yamugezeho ku wa Gatanu w’icyumweru gishize nyuma ya saa 17h00.

Ati “Nari mu muhanda ngenda ncuranga telefone agakinamico kavuga ku IKOFI gacaho kararangira numva bagiye muri gahunda yo gutombora, umunyamakuru arabara 1, 2, 3 mpita numva avuze izina ryanjye mpita nsimbukira mu birere numva nishimye cyane.”

Nikuze yavuze ko nyuma y’akanya gato yahise anabona nimero idasanzwe imuhamagaye, bamusobanurira neza ko yatsinze n’uko azafata amafaranga ye.

Yavuze ko ayo mafaranga agiye kuyaguza ubuhinzi bwe asanzwe akora ashaka ibimutunga n’umuryango we, akazajya akoresha inyongeramusaruro ku buryo azajya yeza agasagurira isoko. Uretse ibyo, ateganya no kwagura umushinga we w’inkoko asanzwe yororo nkeya zikaba nyinshi, agahinga urutoki na Makadamia.

Ati “Nanjye mbere nabanje kujya mbisuzugura mvuga ngo ni ukubeshya ariko kuva nanjye byangezeho nashishikariza abandi kubitsa no kubikuza bakoresheje ikofi nabo bakabona ayo mahirwe nk’uko nanjye nayagize.”

IKOFI ikoreshwa kuri telefoni aho umuhinzi yiyandikisha akoresheje *334*2# na nimero y’indangamuntu; yegera umucuruzi w’inyongeramusaruro ugomba kubyemeza, akamuha umubare w’ibanga akoresha.

Udafite telefoni abifashwamo n’umucuruzi w’inyongeramusaruro akandikwa, agahabwa agafunguzo (Near Field Communications, NFC) gafite ikoranabuhanga ribikwamo amakuru ye, akakifashisha mu kubitsa no kubikuza kuri telefoni.

Muri iyi serivisi umuhinzi ashobora kubitsa, kubikuza, kohereza amafaranga ku buntu mu Rwanda, kwishyura imbuto n’inyongeramusaruro. Indi serivisi IKOFI itanga ni iyo kugura umusaruro no kwishyura ubwiteganyirize bwa ‘Ejo Heza’.

Rucyahana Kevin ukora mu ishami ry'itumanaho rya BK ashyikiriza Sheki Nikuze
Nikuze yavuze ko aya mafaranga azayifashisha mu mishinga itandukanye afite
Nikuze Angela niwe watsindiye miliyoni 1Frw

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza