00:00:00 IGIHE NETWORK KN KINYARWANDA EN ENGLISH FR FRANCAIS

Umuceri, akawunga n’ibishyimbo mu biribwa by’ibanze bikomeje kuzamura ibiciro

Yanditswe na Ntabareshya Jean de Dieu
Kuya 15 Ugushyingo 2022 saa 01:46
Yasuwe :

Umwaka ugiye gushyira intambara y’u Burusiya na Ukraine itangiye kandi yagize ingaruka zikomeye ku izamuka ry’ibiciro rya bimwe mu bikenerwa hirya no hino ku Isi no mu Rwanda birimo.

Muri byo harimo ingano, amavuta yo guteka, ibikomoka kuri peteroli n’ibindi bitandukanye.

Ku ruhande rw’u Rwanda guverinoma yemeye guhara imisoro yatangwaga ku bikomoka kuri peteroli kugira ngo ibiciro bigabanuke nubwo kuri ubu bisa n’aho bikiri hejuru. Litiro ya lisansi igura 1580 Frw naho mazutu ikagura 1587 Frw.

Ibi bikomeje kugira ingaruka zikomeye ku biciro by’ibintu bikenerwa n’Abanyarwanda umunsi ku wundi ku isoko kuko aho kugira ngo bigabanuke, bimwe biri kwiyongera kurushaho.

Kuva u Rwanda rwatangira kubona isukari iturutse muri Zimbabwe, ikilo cyagiye kigabanuka kiva ku 2000 Frw, ubu kigeze nibura kuri 1300 Frw cyangwa 1400 Frw bitewe n’aho umuntu aguriye.

Ikilo cy’umuceri gishobora kugura 2000 Frw, kawunga 1500 Frw…

Mu ntangiriro za 2022, ibilo 25 by’umuceri waguraga 24000 Frw ubu igiciro cyawo gisa n’icyikubye kabiri ugera hagati ya 40.000 na 42.000 Frw mu gihe cya mezi atarenze umunani. Ibi bivuze ko ugiye kuwugura ku kilo azajya uwugura hagati ya 1600 Frw na 1800 Frw.

Umuceri uri mu bigurwa cyane n’Abanyarwanda kuko nubwo mu Rwanda hari inganda nyinshi ziwutunganya ariko uri mu bitumizwa mu mahanga ku bwinshi kuko buri mwaka nibura rutumiza toni 26,736.

Ikindi gikunzwe kugurwa na benshi ni ifu y’ibigori (kawunga) ndetse mu byo u Rwanda rutumiza mu mahanga kari imbere kuko mu 2021 hatumijwe toni ibihumbi 140.

Kuri ubu ni indyo yihagazeho ku isoko ry’u Rwanda kuko kavuye ku mafaranga 600 Frw ku kilo kaguraga mu ntangiriro z’umwaka kagera ku 1200 Frw n’icya 1300 Frw bitewe n’aho ukaguriye kuri ubu.

Ukurikije uko gakenerwa n’uburyo igiciro cyako kiri kuzamuka umunsi ku wundi mu gihe cya vuba ikilo gishobora kugera 1500 Frw.

Ibi bizaba bivuze ko umuntu ukorera 1500 Frw ku munsi atazaba agishobora kwigondera iri funguro.

Umwe mu bakora akazi ko gucururiza undi mu iduka, Sibomana Athanase, yemeza ko ahembwa ibihumbi 50.000 Frw kandi asabwa kwishyura inzu y’ibihumbi 15.000 Frw abamo ndetse no kurya.

Uyu kimwe n’abandi biragoye kubona ifunguro ribatunga akaba ari ho ahera yemeza ko umuntu ukirya kabiri ku munsi aba ari umukungu.

Ati “Nkubwije ukuri kurya kabiri byo ntibishoboka. Iyo ugize amahirwe ubona uriye iby’ijoro kuko ubuzima bwarahenze cyane ku buryo natwe twibaza uko tuzabigenza bikatuyobera.”

Ifarini n’ingano na byo biri mu byuriye cyane ku buryo bugaragarira buri wese kuko kuri ubu ibilo 25 cy’ifarini yavuye kuri 13000 Frw iri kugura 28000 Frw.

Ibishyimbo byarahenze bikabije

Hambere aha umunyarwanda ku ifunguro rye ntihaburagaho ibishyimbo na cyane ko biri mu byera mu duce tumwe na tumwe. Umwaka watangiye ikilo kigura 500 Frw none ubu yikubye inshuro hagati y’ebyiri n’eshatu.

Ukuzamuka kw’ibiciro by’ibishyimbo kandi kuri mu biteye inkeke kuko nubwo bimeze bityo muri iki gihembwe cy’ihinga byabuze imvura bimwe biruma ku buryo hari impungenge ko mu minsi iri imbere bizarushaho kubura.

Ibirayi na byo byarahenze ku buryo ikilo cyaguraga hagati ya 200 na 300 Frw ubu kiri kugura 500 Frw na 600 Frw, ibitoki byaguraga 150 Frw na 200 Frw ubu biri hagati ya 350 Frw na 400 Frw.

Ku rya imbuto byo bishobokera bake kuko usanga urwaguraga 100 Frw yarabaye 200 Frw, urwa 200 Frw aba 400 Frw byagereranwa n’ibindi nkenerwa hakarebwa iby’ibanze kurusha.

Itumbagira ry’ibiciro byageze no ku nyama; kuri ubu ikilo cy’inyama kiri hagati ya 3700 Frw na 4000 Frw.

Ntawukuriryayo Aimable, akora akazi ko gutwara abagenzi kuri moto muri Kigali, aganira na IGIHE yemeje ko nubwo ibiciro bya lisansi byazamutse, nta mafaranga bagisubiza inyuma kuko nabo baba bashaka icyatunga umuryango.

Ati “Ubu aho ibintu bigeze nta mugenzi wasubiza inyuma, ayo aguhaye ushobora kuyafata kuko uba uhanganye n’uko umuryango uza kubona icyo kurya. Ubuzima buragoye cyane kuko ibintu byose byarahenze.”

Ukwiyongera gukabije kw’ibiciro kwageze no ku bindi biribwa byabonekaga imbere mu gihugu nk’ibijumba, imyumbati, amateke, ibikoro n’ibindi.

Hari ibyagabanutse

Mu muvumba wo kuzamuka ku ibiciro, amavuta yo guteka n’Isukari biri mu byazamutse mbere aho Litiro y’amavuta yageze no kuri 3500 Frw ndetse isukari ikagera ku bihumbi 2000 Frw.

Ibi byashakiwe igisubizo ku buryo uyu munsi biri kugenda bigabanuka aho amavuta litiro igeze kuri 2500 Frw naho isukari ikaba iri kugura nibura 1300 Frw na 1400 Frw.

Imbaraga zakoreshejwe muri ibyo ariko zishobora no gukoreshwa ku bindi mu kugabanya ikiguzi kuko ubuzima bwa benshi bugihenze kurusha uko byatekerezwaga.

Umucuruzi mu ku maduka ya Nyabugogo, Nsabimana Bosco yemeza ko hari ibiri kugabanya ibiciro ariko batewe impungenge n’ubwiyongere bukabije bwa buri munsi kuri bimwe.

Ahazaza hahatse iki?

Urebye umubano w’u Rwanda n’ibindi bihugu by’ibituranyi bigaragara ko ibintu bishobora kujya mu buryo mu gihe cya vuba nk’aho rubanye neza na Uganda ahakundaga guturuka ibicuruzwa byinshi kandi n’umubano warwo n’u Burundi wongeye kuzahuka nyuma y’imyaka warazambye. Ubu ahakiri ibibazo ni mu mubano warwo na Repubulika Iharanira Demokarasi ya Congo.

Abasesenguzi mu by’ubukungu basanga ukwiyongera kw’ibiciro ku isoko gushobora gukomeza cyane mu gihe nta gikozwe nk’uko Habyarimana Straton yabigarutseho.

Ati “Hari ibintu byinshi binakomoka hano twebwe twibonera byazamuye ibiciro, abantu bakeka ko bifitanye isano n’ibiri kubera hanze ariko buri gihe siko biba bimeze. Hari ibizamura ibiciro bitewe n’impamvu zitandukanye. Nk’iyo umusaruro utagenze neza nkuko bikwiye, kubona isoko hanze y’igihugu cyangwa uburyo ibicuruzwa bikenerwa na benshi.”

Yavuze ko kuba ibihugu byinshi byarafashe ingamba zo gushyira amafaranga menshi mu baturage kugira ngo bizahure ubukungu bwari bwarashegeshwe na Covid-19 biri mu byatumye ibiciro ku isoko byiyongera kuko amafaranga yari yabaye menshi mu baturage.

Ati “Iyo tubara amafaranga menshi mu gihugu ntabwo tureba ku muturage umwe ahubwo turebe muri rusange. Hari abo Leta yagiye iha ubufasha mu kuzahura ubukungu, mwabonye ko abarimu bongejwe imishahara ibyo byose byazamuye amafaranga atembera mu baturage.”

Yakomeje avuga ko hari icyizere ku igabanyuka ry’ibiciro ku bicuruzwa binyuranye kuko hari n’ibindi bihugu ibiciro byatangiye kugabanyuka ariko ko hakenewe ingamba zikomeye zo guhangana nabyo by’igihe kirekire.

Ati “Turacyafite urugendo rurerure kuba tutabasha kwihaza mu biribwa, tugicunga ngo imvura yaguye cyangwa ntiyaguye; dukwiye gushyira ingufu mu gutuma ibihe byaba bibi cyangwa byiza umusaruro ukaboneka. Gukomeza gukoresha ikoranabuhanga mu kuhira, ubuhinzi butekereza ku mbuto zihanganira ibihe bibi n’inyongeramusaruro nibyo bizatuma twihaza mu biribwa.”

Mu Ukwakira 2022, Banki y’Isi yatangaje ko u Rwanda ruri mu bihugu 10 ku Isi bigira ibiciro bihindagurika cyane mu gihe muri Afurika ari urwa kabiri nyuma ya Zimbabwe, rugakurikirwa na Ghana.

Ibiciro by'amavuta yo guteka ari mu byagabanyutse ku isoko
Ibiciro by'ibirayi byaratumbagiye cyane
Uwifite ni we ubasha kurya ibishyimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .