Uko imyumbati yahoze ari igihingwa ngandurarugo isigaye yarabaye mbaturabukungu mu Rwanda

Yanditswe na Prudence Kwizera
Kuya 20 Ukuboza 2020 saa 09:07
Yasuwe :
0 0

Mu myaka yo hambere mu Rwanda imyumbati yahoze ibarizwa mu bihingwa ngandurarugo kuko abahinzi bayihingaga mu buryo gakondo bagamije kuyirya gusa kugira ngo birinde inzara, ariko muri iki gihe isigaye ihingwa kijyambere igatanga umusaruro mwinshi ujyanywa mu nganda, bikinjiriza ba nyirayo amafaranga bagatera imbere mu bukungu.

Abanyarwanda bita igihingwa ko ari ‘ngandurarugo’ bashaka kuvuga ko kibereyeho kurinda urugo inzara naho bacyita ‘mbaturabukungu’ bashaka kuvuga ko cyinjiza amafaranga menshi harimo n’amadevize akomoka mu mahanga.

Imyumbati yamye ihingwa mu buryo bwa gakondo mu Rwanda ku buryo umusaruro wayo wabaga ari muke ariko kuri ubu isigaye ikorwaho ubushakashatsi bumara imyaka igera kuri 12 kugira ngo haboneke imbuto nshya itanga umusaruro mwiza. Kuri ubu mu Rwanda hasigaye hari uruganda ruyitunganyamo ifu nziza y’ubugari ikanakorwamo imigati n’ibindi.

Umunyamabanga wa Leta muri Minisiteri y’Ubuhinzi n’Ubworozi, Dr Ngabitsinze Jean Chrysostome, aherutse gutangaza ko mu Rwanda imyumbati ihingwa mu gihugu hose ku buso bwa hegitali hafi ibihumbi 200 kandi bafite intego yo kongera umusaruro uboneka kuri hegitali imwe.

Avuga ko hashize imyaka igera kuri 13 mu Rwanda hatangijwe gahunda y’imbaturabukungu mu buhinzi kugira ngo ibihingwa bitandukanye bitange umusaruro ushimishije mu bwiza no mu bwinshi hagamijwe guteza imbere abahinzi n’igihugu muri rusange.

Yagize ati “N’imyumbati rero yazamukiye muri iyo gahunda n’ubwo haje kuzamo ibibazo bijyanye n’ubushakashatsi ariko birakemuka. Uyu munsi imyumbati mu Rwanda ihingwa ku buso bwa hegitari hafi ibihumbi 200, hakavaho toni hafi miliyoni eshatu z’umusaruro, wabishyira ku mpuzandengo ugasanga ni hafi toni 14,5 kuri hegitari.”

Yasobanuye ko imbuto nshya y’imyumbati imaze iminsi ibonetse ifite ubushobozi bwo kwera igatanga umusaruro mwinshi ugera kuri toni 40 kuri hegitari imwe.

Ati “Iyi myumbati mishya yakozwe, ibonye ifumbire nziza ikitabwaho, yagera no kuri toni 40 kuri hegitari.”

Bamwe mu bahinzi b’imyumbati baganiriye na IGIHE bavuga ko kera bayihingaga bagamije kubona iyo kurya gusa, ariko kuri ubu basigaye bayihinga bagamije no kubona amafaranga.

Dusabe Marie Claire wo mu Karere ka Bugesera ati “Njyewe mpinga hegitari enye nkasaruramo toni 35, ikilo kimwe mba nagitangiye amafaranga 150 cyangwa 200. Imyumbati ikintu yangejejeho ni uko maze kwigurira isambu ya hegitari eshatu zivuye mu myumbati nahinze. Mfite intego yo kuzagura imodoka izajya imfasha kuyigeza ku ruganda.”

Nsengimana Onesme na we avuga ko amaze imyaka 17 ahinga imyumbati kandi yamufashije gutera imbere.

Ati “Umusaruro mbasha kubona kuri hegitari ungana na toni 30 kugeza kuri toni 32. Guhinga imyumbati nabigize umwuga, kugeza uyu munsi mpingira isoko, ibyo kuvuga ngo ndahingira inda ntabwo bikirimo. Ku mwaka iyo nahinze nko kuri hegitari enye mba mfitemo amafaranga byibura agera muri miliyoni umunani. Kuri hegitari imwe nkuramo miliyoni eshatu nashoye nk’ibihumbi 700.”

Mu turere twa Kamonyi, Muhanga, Ruhango na Nyanza two mu Ntara y’Amajyepfo hahingwa imyumbati ku bwinshi kandi ni igihingwa cyibasha kwihanganira ibihe by’izuba bikunze kuhaboneka. Ahandi hakunze guhingwa imyumbati ni mu Karere ka Bugesera ko mu Ntara y’Iburasirazuba

Kugeza ubu mu Rwanda hari uruganda rumwe rutunganya imyumbati rwa Kinazi ruri mu Karere ka Ruhango. Bamwe mu bahinzi bavuga ko rutabasha kwakira umusaruro wabo wose kuko uba ari mwinshi.

Hamwe mu hagaragara icyo kibazo ni mu Karere ka Nyanza aho imyumbati ihingwa ku buso bwa hegitari ibihumbi umunani.

Umuyobozi wungirije ushinzwe iterambere ry’ubukungu mu Karere ka Nyanza, Kajyambere Patrick, avuga mu myumbati ihera, iri ku kigero cya 15% ariyo ibasha kugezwa ku ruganda mu buryo bworoshye.

Ati “Ibyo ni bimwe bigaragaza ko n’ubwo hari intego yo kugira ngo twongere ubuso buhingwaho imyubati, birasaba ko hagenda hashakwa n’ibisubizo bitandukanye byafasha kugira ngo wa muhinzi ushaka kwiteza imbere abigereho kuko yabonye iryo soko.”

Dr Ngabitsinze avuga ko kuzamura umusaruro w’imyumbati bisaba ko n’ururerekane nyongeragaciro rugira imbaraga kugira ngo icyo gihingwa kibyazwemo ibiribwa n’ibinyobwa byinjiza amafaranga kandi Leta iri kubitekerezaho kugira ngo bishyirwe mu bikorwa

Yakomeje avuga ko bifuza ko imyumbati imenyekana ku rwego mpuzamahanga ku buryo umunyarwanda azajya agera mu kindi gihugu yavuga ko akomoka mu majyepfo y’u Rwanda hagahita humvikana ahantu haba imyumbati iryoha.

Ukuriye ishami rikora ubushakashatsi ku gihingwa cy’imyumbati mu Kigo cy’igihugu gishinzwe guteza imbere ubuhinzi n’ubworozi (RAB) Nduwumuremyi Athanase, yavuze ko bifata imyaka igera kuri 12 hakorwa ubushakashatsi kugira ngo haboneka imbuto nshya bifuza ishobora kwihanganira indwara kandi itanga umusaruro mwiza.

Ati “Kugira ngo imbuto y’imyumbati ikorwe igere ku muhinzi bitwara imyaka itari munsi ya 12 mu buryo busanzwe kandi nibwo turi gukoresha muri iyi minsi, ntabwo turatangira gukoresha bwa buryo bw’uturemangingo kuko bwo bumara imyaka nk’itanu.”

Nduwumuremyi avuga ko hari imbuto z’imyumbati nshya zamaze gushyirwa hanze zifite ubushobozi bwo guhangana n’indwara zikunze kuyibasira, kandi butanga umusaruro kugeza kuri toni 40 kuri hegitari imwe, uvuye kuri toni 14,5.

Avuga ko usibye izo mbuto hari n’izindi nyinshi ziri mu bushakashatsi kandi zitanga icyizere cyo guhangana n’indwara.

Imibare ya RAB yerekana ko kuri hegitari ibihumbi 200 zihingwaho imyumbati mu Rwanda, haterwaho ingeri hafi miliyari ebyiri.

Imbuto nshya y'imyumbati yamaze gukorwaho ubushakashatsi ikaba iri gutuburirwa ahabugenewe mu kigo RAB
Imbuto y'imyumbati iyo imaze gukorwaho ubushakashatsi ivanwa mu mashini igaterwa ahabugenewe kugira ngo ituburwe
Imyumbati yamaze kwera nyuma yo gukorwaho ubushakashatsi
Kugira ngo haboneke imbuto y'imyumbati nshya bisaba ubushakashatsi buhambaye bukorerwa muri Laboratwari
Mu Karere ka Ruhango ni hamwe mu hari ubutaka bweraho imyumbati ku bwinshi
Umunyamakuru wa IGIHE Prudence Kwizera yasuye Ikigo RAB ahakorerwa ubushakashatsi ku gihingwa cy'imyumbati asobanurirwa uko bukorwa
Umushakashatsi ku bihingwa bitandukanye muri RAB Uwimana Jeanne d arc asobanura uko basuzuma uburwayi bw'ibihingwa muri Laboratwari
imbuto y'imyumbati nshya yamaze gutuburwa no guhabwa izina rishya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .