00:00:00 IGIHE NETWORK KN KINYARWANDA EN ENGLISH FR FRANCAIS

Ubumenyi buke n’ubwoba bw’ibihombo byugarije ibigo by’indege muri Afurika

Yanditswe na Ntabareshya Jean de Dieu
Kuya 30 August 2022 saa 03:17
Yasuwe :

Ubushakashatsi bwakozwe ku bwikorezi bwo mu kirere muri Afurika, bwagaragaje ko uru rwego rufite ibibazo birimo ubushobozi bw’abakozi n’ubushake buke mu gufungurirana ikirere, ku buryo bikeneye gushakirwa umuti mu maguru mashya.

Abakora mu bijyanye n’ubwikorezi bwo mu kirere mu bihugu byo muri Afurika y’Iburasirazuba, Amajyepfo n’ibihugu bikora ku Nyanja y’u Buhinde, byahuriye i Kigali mu nama y’iminsi itatu guhera ku wa 29 Kanama.

Ni inama igamije kurebera hamwe uko ibibazo by’ingendo zo mu kirere bihagaze muri Afurika, imbogamizi zihari n’ingamba zikwiye gufatwa.

Ni imiryango ihuriye mu mushinga w’imyaka ine watewe inkunga n’Ubumwe bw’u Burayi (EU), bwatanzemo miliyoni $8 (8.3 Frw).

Ugamije gufasha Afurika kugira ngo isoko nyafurika ry’ubwikorezi bw’indege (Single African Air Transport Market, SAATM) rishyirwe mu bikorwa, kongerera ubushobozi inzego ngenzuramikorere mu by’indege, ibigo bigenzura indege za gisivili no koroshya ingendo z’indege mu karere.

Uyu mushinga wamuritswe mu 2018 nka kimwe mu bigize icyerekezo 2063 cy’Ubumwe bwa Afurika, ugamije koroshya ingendo z’indege ku muntu uva mu gihugu kimwe ajya mu kindi.

Umwe mu bakoze ubushakashatsi, Dr Eyden Samunderu, yavuze ko kimwe mu bibazo Afurika ifite harimo ubushobozi bw’abakora mu bwikorezi bwo mu kirere.

Ni ikibazo ahanini giterwa no kuba ingengo y’imari igenewa amahugurwa ikiri nke, ugasanga ibihugu bimwe bitumva ko guteza imbere ubu bwikorezi byafungura amahirwe menshi y’ubukungu.

Ngo usanga hakenewe ubumenyi guhera ku buryo bwo kwakira abakiliya, abakora imbere mu ndege, abakora ibya tekiniki n‘abandi.

Ati "Hakeneye kubaho uburyo butuma tuziba icyuho kijyanye n’ubumenyi. Kugira ngo iri soko rusange ryihutishe iyo gahunda, dukeneye guhuza politiki zacu, niba umwe yarahuguriwe mu Rwanda akaba yabona akazi n’ahandi kuri uyu mugabane."

Yagaragaje kandi ko ibihugu bya Afurika bitanganya ubushobozi, bimwe ugasanga bifite ibibuga by’indege bigezweho, ibindi ugasanga bidahagije.

Umuyobozi Ushinzwe Ubwikorezi mu Isoko rusange rya Afurika y’Iburasirazuba n’Amajyepfo (COMESA), Bernard Dzawanda, yagaragaje ko ibihugu bya Afurika bikigorwa cyane no kwemera guhangana hagati yabyo.

Muri ubwo buryo ngo usanga igihugu gifite ikigo cy’indege kigikomeyeho, ntigifungurire ikirere abandi ngo bahatane.

Usanga ngo ibihugu bimwe bitinya ihatana, cyane cyane ibyashoye amafaranga menshi mu bigo byabyo ariko bikaba butaragera ku rwego rukomeye.

Ati "Imbogamizi dufite ni uko usanga buri gihugu gifite sosiyete y’indege itwara abagenzi. Niba hano dufite RwandAir, ahandi Kenya Airways, Ethiopian Airways, Air Malawi n’ahandi, usanga buri wese aharanira ko atahomba."

Muri ubwo buryo, ngo usanga ibyo bihugu bitemerera ibindi kugenda mu kirere cyabyo, ntibinabashe kuba byatwara abagenzi baturutse muri ibyo bihugu.

Ibi bibazo ngo bituma ingendo zigorana, nyamara gufungura ikirere byatuma ibiciro bigabanyuka ndetse imitangire ya serivisi ikazamuka, kubera ihangana mu bucuruzi.

Umukozi mu Kigo gihinzwe ubwikorezi bwo mu kirere muri Afurika, African Civil Aviation Commission, Butera Emmanuel Mwesigye, yavuze ko imbogamizi nyinshi zishingiye ahanini kuri politiki y’ubwikorezi idahuza n’imiyoborere y’ibihugu.

Yagaragaje ko guhuza ubwikorezi bwo mu kirere hagati y’ibihugu bya Afurika bishoboka, kandi bikwiye nyuma yo gukuraho imbogamizi zose.

Mu bigomba kunozwa, harimo gukuraho imwe mu misoro ijyana n’ingendo z’indege hagati y’ibihugu bya Afurika no gufungurirana ikirere.

Gushyiraho uburyo bumwe bwo korohereza ubwikorezi bwo mu kirere, bigamije gukuraho gusinyana amasezerano hagati y’ibihugu, ibiciro bihanitse, koroshya urujya n’uruza no guharanira iterambere ry’ubwikorezi bwo mu kirere.

Kuri ubu ibihugu 35 muri Afurika nibyo byamaze kwemeranya koroshya ubwikorezi bwo mu kirere.

South African Airways ni kimwe mu bigo by'indege bimaze iminsi mu bibazo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .